| سەییاد نامت بام، سەییاد نامت بام
|
تۆ نامت چێشەن؟ فیدای نامت بام
|
| سەد جار وە سەرگەرد دەست و دامت بام
|
ڕەحمەت بەیۆ پێم تا غوڵامت بام
|
| من پەروانەی وێڵ وادی وێرانەم
|
مەجنوون چۆڵگەرد ڕیسوای زەمانەم
|
| شەوان تا وە ڕۆ جە غەم دارانان
|
ڕەفێق هامڕاز وەحشی سارانان
|
| عەبداڵ بەڕگێڵ بێدی مەکانم
|
جەفا و مەینەت کێش زەردەی هیجرانم
|
| سزا و ستەمکێش غەم نە دەروونم
|
هەردەی «تەبەس» گێڵ ئاوارەی توونم
|
| چەندێوەن جە دین شای شەم دوور کەفتەم
|
سفتەی ئاهرناک ساتێ نەسرەفتەم
|
| هەر وەحشی نە شکڵ شێوەی دۆسمەن
|
ڕەفێق هامڕاز عاسا و پۆسمەن
|
| من زەوقم وە دەنگ ناڵەی ئەوانەن
|
قنیاتم وە دین دیدەی ئەوانەن
|
| دوور جە دیدەی دۆس من بەوان شادم
|
تا ئەو ڕۆ گەردوون بدۆ مرادم
|
| ئەی وەڵەدەی شۆخ تۆ گرتەن نە دام
|
جە شکڵ و شێوەی قیبلەی من تەمام
|
| نیم نگاش نە دڵ ناوک شانۆ
|
دیدەش وە دیدەی قبلەم مەمانۆ
|
| فیدات بام سەد جار سەییاد سارا
|
بەخشش وە بەندەی خەم پێدا وارا
|
| ئازادش بکەر ئامان جە دامت
|
یە خەیلێ نەنگین مەبۆ پەی نامت
|
| ئەو وەڵەدەی وەحش ئازاد کەی جە دام
|
ئینشاڵڵا جە دوو دنیا وێنی کام
|
