| مونشیی ئینشای شەرح ئەیشیرین نامە
|
بەی تەور بە خامەی میشکین شەمامە
|
| کێشا کەتیبەی ئەی تەرح قەند بێز
|
شەیدا بی جە عەشق شیرین و شەودێز
|
| واتەش هەی شاپوور جیهان گەردیدە
|
دانای موو شکاف سوخەن سەنجیدە
|
| حەرفت گشت مەربووت، واتەت سەنجیدەن
|
پەسەندیدەی تۆ گشت پەسەندیدەن
|
| حەق عەقڵ و دانش پەرێت کیاستەن
|
هەرچی کە واتت بێ درۆ ڕاستەن
|
| عەجەب ئاهیرێ وەستی نە جەرگم
|
ساکن نمەبۆ تا بە ڕووی مەرگم
|
| یە چ وەسفێ بێ تۆ پەی من کەردی
|
بێ مروەت، تاقەت توانام بەردی
|
| یا بە جەستەی قەیس پەی لەیلا سەرسام
|
عەقڵ و هۆش چون باد گورێزا جە لام
|
| یانەت وێران بۆ، وێران بی یانەم
|
عەقڵم شی جە دەست، کەردی دێوانەم
|
| سا کە چون وەی تەور زامم بی کاری
|
چێش مەبۆ جە ڕای خزمەت گوزاری
|
| سوبوکتەر جە باد سوبخێز خوتەن
|
بشی وە پای تەخت شیرین ئەرمەن
|
| ئیزهار کەی جە لاش ڕەستاخێز من
|
دوودی هەناسەی دەیجوور بێز من
|
| واچی خوسرەوێ دارای دەریا دڵ
|
نەوەی نەوشیروان پادشای عادڵ
|
| یە چەندێ وەختەن وەسفت شنەفتەن
|
جە شاهی و جە تەخت خوسرەوی کەفتن
|
| وەختەن چون مەجنوون ڕیسوای زەمانە
|
بشۆ بە چۆڵدا ببۆ دێوانە
|
| ئەر چون ئوستورلاب مۆم حەرفش نەرمەن
|
پەی نەخچیر چون باز خۆش خوو و سەرگەرمەن
|
| بکیانە بە دەو چون باد سوب خێز
|
نامەی فەرەحبەخش موشتاقی ئامێز
|
| وەر جە تاڵەی من مۆبەتش سەردەن
|
چون مۆرەی نەڕڕاد دایم کەچ گەردەن
|
| باز هەم بە تەعجیل ڕۆ مەکەر بە شەو
|
باوەرە پەرێم زوو هەواڵ ئەو
|
| سا کە ئێد شنەفت شاپوور جە پەروێز
|
تووتیی زوبان کەرد وەی تەور شەکەر ڕێز
|
| واتش هەی خوسرەو دانای ساحێب فام
|
جەمشید جەم بەزم نادیرەی ئەییام
|
| دنیا تا بەندەن نە گاو و ماهی
|
مومتاز بی بە تەخت بە تاج شاهی
|
| خاترت، نەواب ڕەفیع ئەشرەف
|
شەهزادەی شەش دانگ، مەوج مینا کەف
|
| پەی ئەو پەریزاد پەیکەر پەری سام
|
جەم بۆ، تەوفیق «حَي لايَنام»
|
| ئەر بشۆ وە پشت قەسر قوللەی قاف
|
ماوەرووش وە بەر بێ درۆ و گەزاف
|
| شەرت بۆ تا شیرین نە موڵک ئەرمەن
|
ناوەرووش وە شار پەی تۆ بەی وەتەن
|
| لادێ، درەنگێ، نەگێرووم ئارام
|
نەنیشوو ڕاحەت نە عەرسەی ئەییام
|
| ئێد وات وسوجدەی تەخت شاهی بەرد
|
سەر چاک دامان ئەو بە لادا کەرد
|
| ڕووش کەرد نە ئێڵاخ ئەرمەن، شیابان
|
وادی بەوادی تەی کەر بیابان
|
| جە عەرز یەک ماهـ وەتەن بە وەتەن
|
تەی کەرد تا یاوا بە موڵک ئەرمەن
|
| سا یاوا بەو موڵک ڕەوزەی بەهەشت بۆ
|
دیش گوڵشەن گوڵشەن گول نە سارا کۆ
|
| بە ڕەنگ خیتمی، چیهرەی چینی
|
بەردەن جە ڕەوزەی ڕیزوان ڕەنگینی
|
| هەر جە خوڕەم کۆ تا سەرای بەغدا
|
نەقش گوڵ کەفتەن چون توڕەی توغرا
|
| نەپای خوڕەم کۆ دەیرێ عەجەب تەور
|
تێدا ساکن بین چەند کەشیش گەور
|
| شاپوور شی نە دەیر ئە لای کوهەن ساڵ
|
میهان بی چۆگە بە ڕەسم عەبداڵ
|
