| ئوستاد ئەی نەخش شۆخ دڵپەزیر
|
سوورەت ئەی بەحس بەی تەور کەرد تەحریر
|
| خوسرەو چون نە دەور خاستەر نە دارا
|
بەو تەورە ویەرد وەنەش ویارا
|
| جە مەریەم ئەو داشت «شێرۆیە» نامێ
|
خەرێ، خەر مەغزێ، نا پوختە و خامێ
|
| شووم ئەزڕەق چەم، مایەی هەر شەڕێ
|
دێو ناپەسەند، شووم ئەنقەرێ
|
| زوشت نابەکار، بەدیش برووز دا
|
چراغ چارەی نەحسش فرووز دا
|
| غەزەب خورۆش کەرد نە چین چارەش
|
تاین بی نە تەخت سیا ستارەش
|
| بروت بەد ڕەنگ بەدیش برووز کەرد
|
قەسد قەتڵ قین قەتڵش فرووز بەرد
|
| شێرۆی شەڕ ئەنگێز بلووغش ناشا
|
خیشمش خورۆش کەرد، تاڵەش تواسا
|
| ئاوەردش بەرات ڕەمڵ ڕەمماڵان
|
زیج و ئوستورلاب نوجووم ساڵان
|
| بەدیش بەی دەستوور زوشت زیناکار
|
مگێڵا بە توند وێنەی ژار مار
|
| گا نە سان سەف، گا مبی سوار
|
گا نە شۆر و شەڕ، گاهێ نە شکار
|
| ڕوێ جە تەقدیر چەرخ چەپی باز
|
ئەفسوون گەردوون مەکر و حیلە ساز
|
| سەرکێشا بە سەیر نە حوجرەی حەرەم
|
پەی سەیر و سەفای خەزانە و ئیرەم
|
| کەردش تێدا سەیر بانوان تەمام
|
نەوچە کەنیزان باڵا نەونەمام
|
| تا بە دڵبەران دڵدار دیرین
|
تا یاوا بە سەیر بە شەوق شیرین
|
| دیا بە دیدەی شیرین دڵبەر
|
عەشق عاشقیش نە دڵ کەرد ئەسەر
|
| تیرێ نە موژگان موژەی مەنزڵ موو
|
پڕا تا پەڕ نیشت نە جەرگ شێرۆ
|
| پێکیا بە تیر پەیکان دڵبەر
|
خاتر خەتەرناک جەولاش کەرد گوزەر
|
| شێرۆ شەهید بی بە تیر کاری
|
بەرشی جە حەرەم جە بێ قەراری
|
| گا سەیر سەحرا، گا مشی نە کۆ
|
گا وێڵ و وەیلان شەو مکەرد بە ڕۆ
|
| گا خامۆش نە خاو مبی بێ قەرار
|
بە هیچ ڕەنگ نەبی دڵش بەرقەرار
|
| جەمینش جە دوود دەرد دڵگران
|
زەرد و زەعیف بی وێنەی زافەران
|
| بێ خورد و بێ خاو، ڕەنگ جە هیجران زەرد
|
مکێشا پەی پەی هەناسان سەرد
|
| مەردومان شێرۆ مدین بە ماتەم
|
بی وە پەند عاڵەم وات وات مەردوم
|
| مدیان بە شێرۆ زایف و زەردەن
|
دەیری دڵ ئازار، دەردین دەردەن
|
| مدیان کە شێرۆ خاترش ڕێشەن
|
کەس نمەزاناش دەردش جە چێشەن
|
| شێرۆ شێت عەشق خاتر خەتەرناک
|
بێخورد و بێ خاو واتت بی هیلاک
|
| خوسرەو ملاوناش مپەرسا خەبەر
|
موات جە دەردم مەداروون خەبەر
|
| شێرۆی شەڕ ئەنگێز دەروونش ڕێش بی
|
پەی وێش مزانا کە دەردش چێش بی
|
| ئاخر دوود دڵ مەجاڵش بڕی
|
زوخاو زامەت پەردەی دڵ دڕی
|
| بڕیاش تاقەت و تاب و توانا
|
حوسن و جەماڵش جە ڕەنگ نمانا
|
| دڕی دەرد دڵ نە پەردەی پێوار
|
مدرا نە دەورش عاڵەم ئاشکارا
|
| ئەمجار جە ناچار زامدار دێرین
|
نەبی عیلاجش جە عەشق شیرین
|
| چون قەیس لێوە بە ڕۆژ و بە شەو
|
وێڵ بی نە پای قەسر تەلار خوسرەو
|
| شەوان بە شیوەن یا دۆس مواناش
|
بێ خاوی جە تاف ئاوان ستاناش
|
| بایەقوش بەرشی جە شین و زاریش
|
بڵبڵ بێزار بی جە بێ قەراریش
|
| پەروانان جە بۆی پەرداخش سۆزان
|
قەقنەس جا قرچەی جەرگش گورێزان
|
| هودهود هەوا بەست جە شەو ناڵینش
|
جوغدان تواسان شەو جە بالینش
|
| عەندەلیب جە دەنگ دادش هۆرسا
|
قومری جە قووقووی ناڵەش تواسا
|
| ئینس و جینن و دێو، مەل و موور و مار
|
بێزار بین وەنەش تاویان بە تار
|
| مورغ حەیاتش جە قوڕنەی قەفەس
|
کەفت نە هیلاکەت نەزع نیم نەفەس
|
| هەرچەند کەرد نەبی عیلاج دەردش
|
تواسا جە تۆف هەناسەی سەردش
|
| شێوەی شەرمەسار شووم خاتر ڕێش
|
سەفیل مەند جە کار سەودای سەخت وێش
|
| شێرۆ شی نە بەحر خانای خەیاڵان
|
چێش کەردەن چەنی سەرنەخش خاڵان
|
| سەر بەرد نە دەروون فکرش کەردەوە
|
قاپیی خەیاڵان پەی وێش کەردەوە
|
| شەیتان شی نە جەرگ دڵەی پڕ تەلاش
|
بی بە هام کەلام نە یاگەی سەڵاش
|
| مەشق مەشوەرەت شێرۆ دا بە بەد
|
شێونا عەقڵش، جە ڕا کەردش ڕەد
|
| تەرز فواران بەردش نە گەردوون
|
نە ڕووی سام سەنگ کەردش سەرنیگوون
|
| نەبی عیلاجش شووم شەڕ ئەنگێز
|
خەیاڵ قەرار دا بە قەتڵ پەروێز
|
