| دمای شۆر و شین شەیدای شۆر شەو
|
ئاما بە سەرکار سامان خوسرەو
|
| خێزا خەرامان شەو شووم دێرین
|
بە سۆز دەروون، بە سەیل ئەسرین
|
| جامەی بەرگ بەژن هوونین خوسرەو
|
سەد پارەی ئەڵماس تێغ دەشنەی شەو
|
| غەڵتان هوونین حەریر واڵاش
|
کەندش سەراپا جە بەژن باڵاش
|
| هوونالووی ڕەنگ بەست زووخ زەیت ئامێز
|
جامەش جیا کەرد جە بەژن پەروێز
|
| بە شین و شیوەن داخ دەردەوە
|
پەروێزش جە بەرگ عوریان کەردەوە
|
| دەم دەم منگەرا بە پەروێزەوە
|
دەم منیا نە زام دەشنەی تێزەوە
|
| مبۆسا غەبغەب جەمین جامش
|
بەلەب ملێسا زووخ نە زامانش
|
| بە ئاو گوڵاو عەتر و عەبیرات
|
بە موشک و مێخەک دەوای زەروورات
|
| کەردش شوستوشۆ سەر تا بە دامان
|
جە هوون خەنجەر، جە زووخ زامان
|
| پاکش کەرد جە هوون بە زاری زەروور
|
غوسڵ و عەترش دا بە سیدر و کافوور
|
| شانا پێشەدا عارەق گوڵاب
|
دەرمان دارووی عەتر موشک ناب
|
| پێچاش بە کەمەند خاسەی هیندی باف
|
تەرح تەبەڕڕو، بافتەی سووف ساف
|
| بە عەتر عارەق کەردش موشک ئامێز
|
پێچا سەرتاپاش بە تای زوڵف دێز
|
| دانەبەتد داو غەوواسان خاس
|
یاقووت و زومڕوود جە سەنگ ئەڵماس
|
| زیب و زەبەرجەد دانەی لاڵ دێز
|
زەڕکار زەڕکەش تەخت تەڵا ڕێز
|
| دوڕڕ و جەواهیر، دانەی دیاری
|
مەرجان و لوولووی لالای مراوری
|
| لاشە و نەعش ناز خوسرەو بەو قەرار
|
نیا نە ڕووی تەخت کورسیی زەڕ نیگار
|
| شیرین بە شیوەن نیشت نە بالینش
|
یاوا بە گەردوون ناڵەی ناڵینش
|
| کەردش ڕەستاخێز نەسل کەی کەیان
|
تا سەواد سوبح سەحەر بی عەیان
|
| شکاوا شەفەق بەیان بێگەرد
|
هۆردا خیابان خەیمەی زیب و زەرد
|
| سەحەر سوپای نەو عالەم کەرد وە پا
|
جە حاڵ خوسرەو خەبەر بی سوپا
|
| قاو کەفت نە قۆشەن، سوپا خورۆشا
|
زیللە و زەلالەت جیهانش پۆشا
|
| سان سەفداران ئامان بە دەودا
|
واران بە لاشەی نەعش خوسرەودا
|
| دڕین یەخەشان، بەرگ بەدەن چاک
|
سەرتاپای وێشان نیان نە ڕووی خاک
|
| خێزا ڕەستاخێز غەوغا بە هەی هەس
|
گێسوو کەردن قەد، گەردەن کەردن پەی
|
| زیللەی زەلالەت، زایڵەی زاری
|
واوەیلا کەردن پەی شای دیاری
|
| دما شۆر و شین ڕۆز ڕەستاخێز
|
ئامان بە سەرکار ئاداب پەروێز
|
| کەندن قەبر تەنگ خانان غەمناک
|
کەیانی خوسرەو سپەردن بە خاک
|
| چەنی سەراچەی سەنگش ب گڵکۆ
|
پۆشاشان پەروێز بە خاک سەرکۆ
|
| شیرین وێش بێ شەرم بە ئاواز بەرز
|
نۆحە موانا هومیلانە تەرز
|
| نیشت نە سەرینش بە دیدەی نمین
|
ئەمانەت شا مدا بە زەمین
|
| زەمین ئەمانەت بادا، هۆشت بۆ
|
بە کەیخوسرەوان سپەردم بە تۆ
|
| با لێت نەڕەنجۆ شاهـ کەمەر لاڵ
|
منەت بار تۆم تا بە هەزار ساڵ
|
| شیرین کەردش شین هەرتا کە تاوا
|
کێلش کەند جە سەنگ، گڵکۆش وڵاوا
|
| ئاوەردش بینای جە بونیاد بەرد
|
بە گەچ و ئاجوڕ تاقش بینا کەرد
|
| سازاش گومەزێ غەیر جە خشت خام
|
زەڕئەفشان جە سیم لاجیوەرد تەمام
|
| تاقش تەڵا کەش، دەرگاش دانە ڕێز
|
پەی یادگاریی نیشانەی پەروێز
|
| خوسرەو خامۆش بی بە مەوت مەدهۆش
|
بێدەنگ و دوان نە خاو خامۆش
|
| گرتش مەنزڵگەی ماڵ و ماوای نۆ
|
سەرای سەنگ سەرد، سەیوان گڵکۆ
|
| جە زەوق و زینەت دنیا مەند تەهی
|
بێ یار و یاوەر، بێکەس هەمڕەهی
|
| خەیمەی عەمارەت نەوبەدار شەو
|
سەف ئارای سەیران نەمەند جە خوسرەو
|
| دیدەی دنیا و دین زەین عەیشش کوور
|
کاسنیش کاوان جە مار و جە موور
|
| کاڵای گۆشت و پۆست بەرگ بەدەن چاک
|
مۆرەی ئێسخوانش ڕێزا نە ڕووی خاک
|
| دارات دیوان دانای کەمەر لاڵ
|
فەرمان فەرمای فەرد شاهیش بی بەتاڵ
|
| دەرگاش بی دەربەست، قاپی بی خاپوور
|
هۆرپێچا سەیوان سەف ئارای ستوور
|
| سەردار سەر وە گڵ، خانان غەرق خاک
|
کڵاو زەڕ نیان، بەرگ بەدەن چاک
|
| چاوشان چەوگان نە ڕووی چەنگەوە
|
جاڕچیان جقە دان بە سەنگەوە
|
| خواجە سەرایان کارد و کەمەر زەڕ
|
تاج و تەل نە خاک غوڕڕەی شین شەڕ
|
| تیپ کەنیزان لاڵای لالە گوون
|
کڵاو زەڕ نیان، تاج و تەل نیگوون
|
| خواجە و غوڵامان مورەسسەع کەمەر
|
یەخە و جامە چاک، خاک و خوون نەسەر
|
| یەدە و بەحرییان کەمەند پەروەردە
|
یاڵ و دم قەڵەم، تەمام پەی کەردە
|
| سوپا سەرگەردان بە زاری کەردەن
|
دەرد دڵ بە جۆش دەوار نە گەردەن
|
| جیهان تا جیهان جۆشیا بە جۆش
|
پەی خان خوسرەو بی وە سیا پۆش
|
| شیرین بە شیوەن بە زاریدا ڕەو
|
هیممەت خواهی کەرد جە خان خوسرەو
|
| لوا بە مەنزڵ خاتر خەتەر ڕێش
|
حوجرە نشین بی جە یاتاخ وێش
|
| ناڵا ب ناڵین سفتەی سیا پۆش
|
جە دوود ئەندۆهـ بە زاری و خورۆش
|
| بەرگ ئازیەت دەروون کەردەوە
|
سەرنیا جە پشت نە پای پەردەوە
|
| دەردین دڵ ڕێش بە دڵ گرانی
|
نیشت بە زاری و شین دەستە زرانی
|
| دڵ جە شادی و زەوق دنیا بەستەوە
|
دەسنیا نە ڕووش خاس کەستەوە
|
