| شێرۆ جە واتەی سەرو خەرامان
|
جە شەرمندەگی سەر وست نە دامان
|
| نە داشتش جواب، سەرش وست نە پێش
|
شیرین ڕوخسەت دا شی نە یاگەی وێش
|
| شێرۆ شەرمەسار مەند نە خەجاڵەت
|
دەرمانش نەبی، زاتش بە نالەت!
|
| شی نە فکر خام چ ڕەنگ بکاروون
|
چل ڕۆژەی وەعدەش چەنی بویاوون؟
|
| ئاوەرد نە خاتر دەردین دارا
|
هیچ خاستەر نییەن جە سەیر سارا
|
| وەرنە مەحاڵەن بگێروون تاقەت
|
بێ شک متۆقۆ دڵم جە حەسرەت
|
| شێرۆ پەی سەیران سەنجەق ونارا
|
داش نە سۆز ساز، کێشاش نە سارا
|
| تیپێ غوڵامان چەنی ساز و سۆز
|
خەیمە و خیابان تۆشەی چهل ڕۆز
|
| لادێ جڵەوڕێز جریت و چەوگان
|
نەشم نەی بازی نە مەوج مەیدان
|
| گا سەیر سەگان نەسەر دیاران
|
شکار شاهێن تیپ تەیاران
|
| گا سەدای خۆشخوان نەغمەی دەف و چەنگ
|
سازان دڵگیر شۆخ خۆش ئاهەنگ
|
| شێرۆ بەی دەستوور نە سەیر سارا
|
چل ڕۆژەی وەعدەی شیرین ویارا
|
| هۆرگێرا شێرۆ جڵەو بە شیتاب
|
یاوا بە مەنزڵ، هەوا دا ڕیکاب
|
| بە تاو و تەعجیل پیا بی جە زین
|
دووبارە جە نەو تەڵەب کەرد شیرین
|
| خواجە سەرایان جەهد و جەخت کەردن
|
بە تاو و تەعجیل شیرین ئاوەردن
|
| یاوا بە خدمەت شێرۆی بەد نەسەب
|
سەر بەرد بە سوجوود، مدرا بە ئەدەب
|
| شێرۆ وات: شیرین وەعدە تەمامەن
|
وادەی وەختمەن، دنیا بە کامەن
|
| هەنی ئەمرێ هەن باوەروون بە جا
|
جە ئینە فێشتەر چێشتەن ڕەزا
|
| شیرین جە دەروو فکرش بەردەوە
|
قاپیی خەیاڵان دەروون کەردەوە
|
| واتش جە دنیا نامانوون درێغ
|
خۆ دمای خوسرەو وێم بدەون بە تێغ
|
| با دا دمای وێم شێرۆی بەد ئەندێش
|
میرات خوسرەو نەمانۆ پەرێش
|
| بە فریب و فەن کارێ پێش کەروون
|
ئەساسەی خوسرەو جە دەستش بەروون
|
| وەختێ ئەساسش بەرکەردم جە مشت
|
ئەوسا جەودما وێم بدەون وە کوشت
|
| وەرنە چ حاسڵ وێم بدەون وە باد
|
شێرۆ دەمای من بنیشۆ بە شاد؟
|
| شەوق و شادیش بۆ بە ڕۆژ و بە شەو
|
بە ماڵ مەندەی میرات خوسرەو
|
| بەس من جە دنیا چێشم مەقامەن
|
ئینە من کەردم، کردارم کامەن
|
