| وات ئەرێ سالار سوپای نەوهاڵان
|
باس باڵا دەس وەنەوشە خاڵان
|
| یە تەسویر شای ئەو هەفت کیشوەرەن
|
نەوەی نەوشیراوان والا گەوهەرن
|
| کەیخوسرەو مەوکیب، توهەمتەن تەورەن
|
ئەسکەندەر ئایین، ئاسووب دەورەن
|
| تەنتەنەی عەزیم تەمتووراق ئەو
|
نەدیەن دیدەی زاغ دنیای دوون بە خەو
|
| حوسنش شەوق جە شەوق سیمای خۆر سەندەن
|
سەد کەس چون یۆسف کەنعانش بەندەن
|
| ماچی ڕۆستەمەن بە تەرکیب و تەور
|
نامش خوسرەوەن پەروێز بە ڕووی دەور
|
| هومای خەت نە ڕووی حوسنش سروشتەن
|
ڕوخسارش چون ماهـ هالە نەبەستەن
|
| توڕەی کاکۆڵش چون زوڵف حوورەن
|
گەردەنش تلووع سوبح بلوورەن
|
| گوڵ جە شەمع حوسن ئەو چون پەروانەن
|
سەد پەری پەیکەر پەرێش دێوانەن
|
| وەنەت مەعلووم بۆ شیرین ئەرمەن
|
زوڵف پەخش، بۆ میشک، مودبیرەی خوتەن
|
| بە شێوەی سوورەت ئەو شەهریارەن
|
تۆ پەرێش بەی تەور دەروونت خارەن
|
| ئەر ساحێب سوورەت بە وێش بوینی
|
بەو شکڵ و شێوە، بەو نازەنینی
|
| «نعوذ بالله» زوڵفان بۆ عەنبەر
|
جە سەودای شێوەش چێش مەیۆت وە سەر
|
| شیرین جە تەعریف دڵ پەسەندیدە
|
جەی دوڕڕ تەقریر تەمام سەنجیدە
|
| خێزاش نە دەروون جە شەوق پەروێز
|
ئاهێ چون ئاهیر عەرسەی ڕەستاخێز
|
| جە بازووی پڕ زۆر عەشق بێ ئەندێش
|
ئاشفتەتەر بی ئەو جە زوڵف وێش
|
| بەڵێ زۆر عەشق زەرب پەنجەی دەرد
|
سەد ئەسکەندەر مکەرۆ بە گەرد
|
| بەرق شۆڵەی عەشق نە ڕووی عەرسەی دەور
|
بگنۆ بە هەرکەس چون ترێشقەی هەور
|
| تا زهوور سەخت ڕۆی «يوم القرار»
|
مکەرۆش وە پەند واتەی ڕۆزگار»
|
| سوود سەودای عەشق دایم گریانەن
|
قنیاتش هەر زووخ جەرگ بوریانەن
|
| شەڵڵا کەس سەرسام سەودای عەشق نەبۆ
|
منەت زەدەی دەرد مەجنوون مەشق
|
| ئاخر تووتی ڕاز شۆخ لەب شەکەر
|
شیرین شەم شەوق فەرخوندە ئەختەر
|
| واتش ئەی جوان جیهان گەردیدە
|
خیرەدمەند دەور سوخەن سەنجیدە
|
| مەعلوومەن خەیلێ دانشمەندەنی
|
ئاگا جە ئەحواڵ سوورەت بەندەنی
|
| بۆ بە عەشق زات بینای کردگار
|
چون من دەرد وێم بە تۆ کەرد ئیزهار
|
| ئەی سوورەت بەردەن ڕەنگ جە ڕوخسارم
|
واچە چۆن مبۆ عیلاج کارم
|
| وەختێ ئێد شنەفت شاپوور نەققاش
|
چون خڕخاڵ زەڕ کەفت نە خاکپاش
|
| واتش ئەی خورشید خاتر پەسەندم
|
من ئوستاد نەقش ئەی سوورەت بەندم
|
| ئەی نەخشە بە ڕەشح خامەی شەکەرڕێز
|
من کێشام بە شکڵ خوسرەو پەروێز
|
| پەی چێش، ئەی خوسرەو دانای موو شکاو
|
شەوێ بە تەقدیر تۆ دیەن نە خاو
|
| بەو شکۆ و شەوکەت شەهریاریوە
|
بەو فەڕ فەڕبەخش کامگاریوە
|
| هەر جەو وەختەوە تۆش نە خاو دیەن
|
لادێ، درەنگێ ئارامش نیەن
|
| سەودای عەشق تۆ کارێ کەردەن پێش
|
بێزارەن جە تەخت پادشاهی وێش
|
| نە زەوق جورعەی جام چەنیشەن
|
نە مەیل شەراب شەو نشینیشەن
|
| بەندە بە فەرمان ئەو کەیخوسرەو خوو
|
بەی تەور مومتاز بیم نە خاک پای توو
|
| ڕاستش هەر ئێدەن عەرز کەردم تەمام
|
«الأمرُ مِنكُم، باقي والسَّلام»
|
