خامەی شیرین نەخش شۆخ عەنبەرین
|
بەی تەور کەرد تەحریر ئەی نامەی شیرین
|
چون خوسرەو نە دەور ئەو چەشمەی زولال
|
دوور کەفت بە دڵتەنگبە خاتر مەلال
|
بە هەر مەنزڵێ چون بەرق میاوا
|
ئاهش چون شەهاب گەردوون مشکاوا
|
هەر شەو جە هیجران تا سوب مناڵا
|
سەیل ئەسرینش کوان مماڵا
|
مشی بە فەرسەخ دەنگ ناڵینش
|
تەڕ مبی بە زووخ زامەت باڵینش
|
بەڵێ بە ئومێد وەسڵ پەریزاد
|
مویارا سات سات ڕۆزگار بە شاد
|
غەرەز تا بە مەرز کۆهستان یاوا
|
بەرق هەناسەش سەما مشکاو
|
چون جە کۆهستان ئەرمەن کەرد گوزەر
|
سەرحەد نشینان ئەو بووم و ئەو بەر
|
زاناشان بەرزەن پایەی ئیقباڵش
|
وێشان مومتاز کەرد بە ئیستیقباڵش
|
کێشاشان پێشکەش شاهانە بە ڕەنج
|
جە دێبا و جە ئەسپ، جە ئەسباب و گەنج
|
چەندی جەو مەکان ئەو وێنە دارا
|
بە شادی و بە عەیش عوشرەت مویارا
|
چۆگە هەم خوسرەو شای دارا نگین
|
نەوەی نەوشیروان نادیرەی زەمین
|
سوار بی وە ڕەخش باد پای پڕ هونەر
|
نە موڵک موغان بە دەو کەرد گوزەر
|
یاوا بە مەکان فەڕبەخش شیرین
|
بە جای ئەو یاران زوڵف بۆ عەنبەرین
|
چون مەهین بانوو ڕازان شەکەر ڕێز
|
یاوا پێش ئەحواڵ خوسرەو پەروێز
|
چەنی سوپا و سان شۆخ زەڕ باف پوش
|
حەوبە و دەس شیرین، نەی ئەژدەر بە دۆش
|
شی بە ئیستیقباڵ شای کیسرا نەژاد
|
سانیی نەوشیروان ساحێب عەدڵ و داد
|
بە ڕەسم شاهان پێشکەش بەردن
|
ئەنفاس شاهان بە جا ئاوەردن
|
نیشت نە خزمەتش تا هەفت ڕۆ تەمام
|
نۆشا چەنیش جام بادەی عەنبەر فام
|
بانووی پڕ تەمکین ساحێب سایەی فەڕ
|
بە جای تەخت نیا پەرێش تەختەی زەڕ
|
جە دمای هەفت ڕۆز هۆرێزا یەک شەو
|
عەرز کەرد وە پای تەخت فەڕبەخش خوسرەو
|
وات من جە خدمەت شا ئێد ئەرجوومەن
|
چون وەڵگەی بەردەع گەرمەسێر بوومەن
|
زمستان چۆگە خەم دەریم وە باد
|
بە عەیش و عوشرەت بە خاتر گوشاد
|
خوسرەو پەسەند کەرد حەرف ئەو دڵبەر
|
چون سوب جە مەشریق شوعلەوەر بێ خۆر
|
خەیمەی خوسرەوی بە دەو بار کەردن
|
تەشریف شەریف بە بەردەع بەردن
|
بانوو جە خدمەت ئەو شای بێ نەزیر
|
بە شەو هەم بە ڕۆ هیچ نەکەرد تەقسیر
|