| بەی تەور کەرد ئینشای دڵ پەسەندیدە
|
بە میزان عەقڵ سوخەن سەنجیدە
|
| چون هورمز بە حوکم زات ئیلاهی
|
مەعزوول بی جە تەخت فەڕبەخت شاهی
|
| شی بە «دارالملك» خوسرەو نێک بەخت
|
مومتاز بی بە تاج پادشاهی و تەخت
|
| هەرچەند پەی شیرین شەهەنشای لاڵ پۆش
|
دەروونش چون دیگ بوریان مدا جۆش
|
| ئەمما جە ئەدەب ئەو شای جەوان بەخت
|
عەیب بی تەرک تاج پادشاهی و تەخت
|
| وەرنە پەی شیرین جە عەنبەر دارا
|
سوبح و شام وەنەش بەتاڵ مویارا
|
| ئاخر کە خوسرەو جەم قەدر جەم کێش
|
تازە کەرد دەستوور نەوشیروان پێش
|
| ویلایەت بە عەدڵ تەمام مەعموور کەرد
|
جە مەزڵوومان زوڵم زاڵمان دوور کەرد
|
| وەختی جە ڕای عەدڵ ڕەویەی سەروەری
|
خەڵاس بی جە شوغڵ ڕایەت پەروەری
|
| خاستەر جە شاهان جەم جای جەم شکۆ
|
شرووع کەرد بە عەیش بە عوشرەت جە نۆ
|
| منۆشا شەراب جە شام تا شەبگیر
|
بە ڕوو تا بە شام هەر مکەرد نەخچیر
|
| بەڵێ پەی شیرین ئەو شای جەم نگین
|
جە خەڵوەتیدا مکەرد زاری و شین
|
| یەک ڕۆ جە شەخسێ زوڵفان عەنبەرین
|
پەرسا بە زەروور ئەحواڵ شیرین
|
| عەرز کەرد نە پای تەخت ئەو دارا دەستوور
|
یە چەندێ وەختەن شنەفتم شاپوور
|
| ئەو ڕاز ڕێزەی قەند قامەت زەڕ ستوون
|
نیشانا بە پشت سەمەند گوڵگوون
|
| نەو قەسر جام ڕێز بە دەو بەرکەردش
|
بەڵێ نەزانام تا وە کۆ بەردش
|
| خوسرەو جەی نەیرەنگ چەرخ پڕ گەزەند
|
حەیران بی تەمام، خەیلێ عەجەب مەند
|
