| موستەوفیی دیوان دەفتەرخانەی عەشق
|
جە باب پەروێز بەی تەور دا سەرمەشق
|
| «بەهرام چۆبین» جە شاهیی خوسرەو
|
تا کە ئاگا بی بە دەوان دەو
|
| بە کاففەی ئەعیان مەدائین تەمام
|
مەخفیی جە خسرەو شای ئیحتیشام
|
| تەڵەب کەرد وەزیر میشکین خامەیێ
|
تەحریر کەرد بەی تەور شەرەفنامەیێ
|
| خوسرەو تیفلێوەن شووم کەم شنەخت
|
نیەن سزاوار پادشاهی و تەخت
|
| بە مەوت هورمز خەیلێ کەرد دڵ شاد
|
عەشقبازەن، ڕەندەن، هەم کەم عەدڵ و داد
|
| هەر شاهێ چون ئەو مەیل بە بادە بۆ
|
دایم جۆیای جام ساقیی سادە بۆ
|
| قوتڵش واجبەن چون نیەن قابڵ
|
پەی چێش، بە ئایین شاهان عادڵ
|
| نمەیۆش بە دەست مەملەکەت داری
|
سەد فرسەخ دوورەن جە شەهریاری
|
| جە لاش یەک جامێ شەراب ئەحمەر
|
گیرامی تەرەن جە شاهی و ئەفسەر
|
| مبەخشۆ موڵکێ بە سەدای سازێ
|
نمەبۆ بە تەخت شاهی ئاوازێ
|
| هێمان جە سەودای شیرین داخشەن
|
هێمان ئەو هەوا نە دەماخشەن
|
| سەڵاح هەر ئێدەن ئەو شۆرێدە بەخت
|
بکەرمێ مەبحووس تا بە چەندێ وەخت
|
| شایەد چون شێتەن پەند پەزیر ببۆ
|
ڕشتێ پەیدا کەر، پەی وێش ژیر ببۆ
|
| تا من بیاون چون مار ئەژدەر
|
بکەردێ کارێ بەرنەشۆ وە بەر
|
| بەهرام بی تەدبیر شووم بەد فەرجام
|
ئومەرای عیزام کاففەی خاس و عام
|
| یاخی کەرد تەمام کیشوەر بە کیشوەر
|
پەی گرتەی خوسرەو بەستشام کەمەر
|
| خوسرەو دیش بەی تەور بەرگەشتەگیی بەخت
|
دەس هۆرگرت جە تاج خوسرەوی و جە تەخت
|
| عاجز بی تەمام پەی بێکەسی وێش
|
عەزم فیرار کەرد ئەو بە خاتر وێش
|
| جە خۆف شمشێر بەهرام خوونڕێز
|
سوار بی نە پشت سەمەند شەودێز
|
| بە جا ئاست ئەورەنگ شاهیی دڵپەسەند
|
وێش بەر کەرد وە بەر بە چەند فێڵ و فەند
|
| نەهیب دا شەودێز نادیرەی زەمان
|
تا یاوا بە موڵک ئازەربایجان
|
| چۆگە هەم ئەو شای ئاشفتەی بێ دڵ
|
بە گوڵزار شۆخ موغان کەرد مەنزڵ
|
| چۆگە هەم ساتێ نەکەرد مدارا
|
تەی کەرد بە دەوان کەش و کۆ و سارا
|
| پەی دین شیرین زوڵف دەستە سونبول
|
ئاخر بە وەڵگەی ئەرمەن کەرد مەنزڵ
|
