| گوڵچین ئەی باغ پڕ عەتر و سونبوڵ
|
بەی دەستوور بەستش دەستە دەستەی گوڵ
|
| تا بادەی ئەی بەند وەشبۆی عەبیرین
|
مەهین بانوو داش بە خورد شیرین
|
| حوسن سیمابیی سوب جە شەوق نوور
|
درەخشا خاستەر جە شەمع کۆی توور
|
| گێڵا بە قودرەت زات ئیلاهی
|
ڕەنگ تیرەی شەب بە شەمع کاهی
|
| شیرین سەم شەوق بێدار بی جە خاو
|
سەیقەل دا ڕوخسار چون قورس ئافتاو
|
| جە زەڕبەفت چین جە دنیای فەرەنگ
|
پۆشا بەی دەستوور ڕەخت ڕەنگاوڕەنگ
|
| ئەژدەهای گێسو بە دۆشدا کەرد پەخش
|
بەست نە قەد تەرکەش گوڵدۆز پڕ نەخش
|
| شۆخ و شیرینتەر جە تورکان چین
|
کەرد نە بازوو قەوس پڕ شاخ ڕەنگین
|
| پێکا نە پای زنج تۆمار گوڵزەر
|
دوو زوڵفەی یاقووت پەڕ تاوس پەڕ
|
| دوو توڕڕەی بۆ میشک ئاوەرد جە سەردا
|
وەردا چون ئەژدەر وە ڕووی کەمەردا
|
| بەست نە قەد شمشێر جون شاهان پێش
|
بوڕڕانتەر جە تێغ سۆخ ئەبرۆی وێش
|
| دەستماڵێ زەڕبافت تافتەی ئەرمەنی
|
گوڵ قرمز، بووم زەرد سەرگوڵ سۆسەنی
|
| داش بە ناز «بەسەر» کۆڵاچەی سمۆر
|
خێزا بە سەد لەنج، بە سەد ناز و تۆر
|
| شۆختەر جە تەرسای شۆخ فەرەنگی
|
سوار بی نیا پا نە ئەوزەنگی
|
| چون ڕۆستەم نە پای بادپای ڕەخشەوە
|
حەربەی خوسرەوی گرت بە دەسشەوە
|
| جەودما سەدای زومرەی چاوەشان
|
ویەرد نە سارای کۆهـ کەهکەشان
|
| ئەو سێسەد کەنیز پڕ سام سەنگی
|
هەریەک وێنەی شێر دڕوندەی جەنگی
|
| گشت بە ئەسپ خاس پڕ خرۆشەوە
|
چون تووس نەوزەڕ نەی بە دۆشەوە
|
| چەنی شیرین شین بە دەوان دەو
|
تا سەراپەردەی پەروێز خوسرەو
|
| خوسرەو دیش شیرین بەو شۆخ و ڕەندی
|
چەنی ئاو یاران بەو دڵپەسەندیی
|
| مەحفووز بی جە بەخت فەڕڕوخ ئەختەرش
|
کەردش زەڕ وەشان وێش و لەشکرش
|
| دەست شیرین گرت نشاناش بە تەخت
|
خێزا هەم خوسرەو بە دەو پۆشا ڕەخت
|
| وێنەی ئەسکەندەر سوار بی وە ڕەخش
|
کاکۆڵ میشکین وە پێڵدا کەرد پەخش
|
| چەنی سوپا و سان شیرین چون ئافتاو
|
گۆی زەڕڕین وستن نە مەیدان داو
|
| غافڵ بی خوسرەو جەو نازک نازان
|
جەو سوپای شیرین شای شەکەر ڕازان
|
| بە چەوگان بازی مبەردن وە بەر
|
گۆی مەردی نە چەرخ چەواشەی چەمەر
|
| خوسرەو لاڵ پۆش دانای دەماخ بەرز
|
بەور بەهمەن سا تووس نەوزەڕ تەرز
|
| حەیران مەند بە تووڵ بەژن باڵاشان
|
بە جەوگان بازیی شۆخ ئاڵاشان
|
| بە ڕان و ڕەکێف ڕعنای ڕەندشان
|
بە دەست و تەعزەیم دڵ پەسەندشان
|
| جەو مەیداندا دە ساعەت فێشتەر
|
داشان دەو سەمەند باد پای پڕ هونەر
|
| چون بە سواری شیرین شەبدێز
|
شۆخ بی و شیرینتەر خەیلێ جە پەروێز
|
| هەرچەند مکەردش ئەو دارا ئەفسەر
|
گۆ جە مەیدانش نمەبەرد وە بەر
|
| شیرین و خوسرەو جە عەرسەی مەیدان
|
شەودێز و گوڵگوون چەندێ دان جەولان
|
| ئاخر جەو مەیدان بە عەزم شکار
|
ئەو سوپای ڕەنگین ڕەعنای شەکەربار
|
| بەردشان هوجووم نە حەرسەی سارا
|
شکار ئەفگەنان خاستەر جە دارا
|
| بە مەودای سەنان خەدەنگ پڕ زۆر
|
وستن بە یەکدا چەن ئاهوو و چەند گۆر
|
| جە سم ڕەخشان ژار پۆڵا سم
|
کەردشان ڕووی چەرخ نە گەردەدا گوم
|
| خوسرەو عەجەب مەند جە نەی بازیشان
|
جە پێڵ و قەڵخان خۆش ئەندازیشان
|
| جە شەهاب نەخش بەرق ئەنگێزشان
|
جە بریققەی تێغ ئەڵماس بێزشان
|
| شیرین جەو دەمدا مدرا بێ سەرمەست
|
کەمانێ بە چەنگ، خەدەنگێ بە شەست
|
| خوسرەو جە سامش تەمام بی سەرسام
|
پێش نەمەند زەڕڕێ عەقڵ و هۆش و فام
|
| کەمەند گێسووی شیرین دا گیرش
|
چون شێر زامار بی بە نەخچیرش
|
| تا پەڕ نیشت خەدەنگ غەمزەش نە جەرگش
|
ڕەنگ بەست بە زووخاو چون خەزان بەرگش
|
| سا وەختێ تاوس خۆر جە زاغ شەو
|
گورێزا چون باد بە دەوان دەو
|
| میشکین کەمەندان زوڵفان عەبیرین
|
پیادە بین نە دەور سەیوان شیرین
|
| جە شادی و جە زەوق تا وە سوب سەحەر
|
نۆشاشان شەراب گوڵڕەنگ ئەحمەر
|
| هەر وەختێ کە قورس خورشید بێ گەرد
|
سەنگ سەرکوان پۆشا تافتەی زەرد
|
| شیرین چەنی ئەو نازک نەوهاڵان
|
سەف بەستن نە دەور شای کەمەر لاڵان
|
| هەم شرووع کەردن بە چەوگان بازی
|
بە هەی هەی شکار، بە تیرئەندازی
|
| بەڵێ هەرچەند کەرد خوسرەو دارا
|
مەگەر، کە شیرین شای زینەت ئارا
|
| بدەرۆ فرسەت یەک درەنگێ پێش
|
شایەد کە ماچێ ئەو بستانۆ لێش
|
| نەدا پێش فرسەت ئەو زوڵف عەبیرین
|
کەرد بە ژقنەمووت لێش عەیش شیرین
|
