| چون میشکین پەڕەند شەو جە شۆڵەی نوور
|
نە عەرسەی دەوران گێڵیا بە کافوور
|
| جە مەرز موغان شیرین و پەروێز
|
باز کەردن خەیمەی خوسرەویی گوڵ بێز
|
| چەنی ناڵەی چەنگ، نەغمەی بانگ عوود
|
بەردشان تەشریف بە سەحرای شەهڕوود
|
| گاهێ جە شاڕوود کەردشان شکار
|
جە مورغ وەحشی کوشتشان هەزار
|
| گاهێ چون بەهرام نە سەحرای هیندوور
|
وستن بە یەکدا چەند ئاهوو و چەند گوور
|
| دنیا بەی دەستوور بەسەر مبەردن
|
گا عوشرەت، گاهێ نەچیر مکەردن
|
| چون سەواد خەت زوڵمەتدا دیار
|
مەخفی بی خورشید نە پەردەی پێوار
|
| نەوبەر نەمامان دەستەی زوڵف چین چین
|
ئاراستنن پەی شا بیساتێ ڕەنگین
|
| زێبا عورووسان تا کە شەق بئ شەو
|
پەی تەفریح تەبع شیرین و خوسرەو
|
| ڕەقسان بین چەنی نەوای ساز نەی
|
شیرینتەر جە ڕەقس ڕەشحەی جام مەی
|
| ناڵەی نەوای ساز موغ بەچەی مەی نۆش
|
سەدای مەیکەشان سەبووی مەی بە دۆش
|
| جە سەومەعەی قودس چەرخ ئەخزەری
|
ماوەردش بە ڕەقس زوهرە و موشتەری
|
| جە بۆی میشک و عوود عەبیر و عەنبەر
|
جە عەتر گوڵاو، جە دوود مەجمەر
|
| جەرگەی خوسرەوی دەشت و کۆ و سارا
|
مبێزا بۆی بەزم ڕەنگین دارا
|
| غەرز هیچ شەوێ جە شەوان بەی تەور
|
نمەوین بێ عەیش عوشرەت نە ڕووی دەور
|
| یاران نە عەرسەی ئەی دنیای فانی
|
جەی وەشتەر چێشەن سا زیندەگانی
|
| بویاری دەوران چون کەیان کەی
|
بە ساز و سوحبەت، بە مەعشووقە و مەی
|
| دوو دەست حەمایڵ بێ خۆف جە ئەغیار
|
بکەی نە گەردن دۆست وێت هەر جار
|
| بنیشی نە سای زوڵف عەنبەربۆش
|
بگێری بە دەس شەمامەی لیمۆش
|
| نە جارێ سەد جار بە شەو تا بە ڕۆ
|
چون دەستەی نەرگس بۆش نیا وە بۆ
|
| هەی هەی جەو توغیان عەیش و ئیقباڵە
|
جەو جۆش شادیی شای کەمەر لاڵە
|
| گا چەنی شیرین سەرگۆشی مکەرد
|
گا شەربەت جە لەعل شیرین موەرد
|
| گا مبی پەشتان وە بەژن باڵاش
|
گا مکەردش سەیر خاڵان ئاڵاش
|
| بەی تەور موبارا شای نەزەر بازان
|
شەو چەنی شیرین شای شەکەر ڕازان
|
