| شیرین پەی جەواب خوسرەو پەروێز
|
لەب کەرد بە تووتی ڕێزەی شەکەر ڕێز
|
| وات بە فیدات بام شای فەڕروخ نەژاد
|
نەوەی نەوشیروان ساحێب عەدڵ و داد
|
| مەر فیعل شەنیع وێنەی گومڕاهان
|
خاسەن کە بگنۆ جە دەست شاهان
|
| کوجا حیسابەن وێنەی تۆ شاهێ
|
شاهێ جەم جەناب، حیشمەت پەناهێ
|
| بە وەسوەسەی پووچ نە عەرسەی ئەییام
|
بزورگزادەیێ بکەرۆ بەدنام
|
| بەرز بۆ بە ئاڵەم ساز بەدنامی
|
دوشمن باوەران پێش شادکامی
|
| با وجوود خۆ من جە شام تا شەبگیر
|
ماچم نەکەردەن جە شا هیچ تەقسیر
|
| بەڵێ ئەی ئەمرە جە شایچ سەریحەن
|
ئەمر ناپەسەند فرێ قەبیحەن
|
| پەی چێش؟ نەتیجەش هەر بەدنامیەن
|
ڕوو زەردەیی تەمام، دوشمەن کامیەن
|
| ئەر ڕاستەن کە شای فەرخوندە ئەختەر
|
سەودای عەشق من مدۆش دەردسەر
|
| تا بە چەندێ وەخت بگێرۆ ئارام
|
خاترش جەم بۆ میاوا بە کام
|
| حەیفەن من و شا نە عەرسەی ئەییام
|
بە عەبەس وێمان بکەرمێ بەدنام
|
| نە عەرسەی دەوران ئەی دنیای دەنی
|
بویم بە سەر ژان خەڵق ئەرمەنی
|
| من جە لای بانوو و ئەی پەرستاران
|
بکەری بە پووڵ ناڕەوای شاران
|
| سەڵاح هەر ئێدەن خوسرەو لاڵ پۆش
|
حەرفم جە ڕای لوتف بکەری نە گۆش
|
| فەسخ بیناو بەس ئەی ئیرادەکەر
|
مەیل بە سەرف جام جورعەی بادەکەر
|
| من جە شەهەنشا هەر ئێدەن ئەرجووم
|
جە وڵگەی ئەرمەن نەشۆ ئابڕووم
|
| نەیۆ پێم کاری چون نادروستان
|
بوون بەسەر ژان خەڵق ئاتەش پەرستان
|
| سەوگەندم بە شەرت یەک ڕەنگان عەشق
|
بێ تاقەت مبەر شای سەنعانی مەشق
|
| حەڵوای شیرینم خاس خۆش گەوارەن
|
غەیر جە شا هەرکەس بنۆسۆ ژارەن
|
| مەعلوومەن جە خەڵق کەس لێش نەوەردەن
|
پەی جەناب شام سەر بە مۆر کەردەن
|
| مەتڵەب ئەر جە عیشق من ئازارتەن
|
سەودای سەفرای دەرد باڵام بارتەن
|
| بە حەڵوای وەسڵم وەش تام وەش بۆ
|
مکەروون ئاخر دەفع سەفرای تۆ
|
| وەر نە بە جەختێ بەور دەریا دڵ
|
موددەعات جەلام نمەبۆ حاسڵ
|
