| ئەختەرشناسان دانای دڵپەزیر
|
ئەسحاب نجووم ئەرستوو نەزیر
|
| چون قەرس قەمەر، چون دانای یاقووت
|
خێزا و شی نە بورج فەڕئەنگێز حووت
|
| جە نوورش زوهرە و ستارەی بەرجیس
|
بەخشا شەوق جە فەرق - - - - -
|
| عەتارید جە خەت جەوازی بێ دریخ
|
جە ئەووەڵ کەردش تەماشای میڕڕیخ
|
| ئاخر چون مانگ نیشت نە بورج ماهی
|
پەروێز نیشت نە تەخت فەڕبەخش شاهی
|
| هەر تەرەف شاهان دەور زەمانە
|
ژەندن بە نامش کووس شاهانە
|
| جە شەرق تا بە غەرب، جە مەهـ تا ماهی
|
قەبووڵش کەردن بە پادشاهی
|
| چوم مەملەکەت گرت نیزام بە نامش
|
وێنەی ئەسکەندەر سەنگی بی سامش
|
| تەخت تەعمیر کەرد نە ڕووی عەرسەی خاک
|
بەرزەتەر جە پایەی پەروین ئەفلاک
|
| چەنی دانەی لاڵ لوولووی جیهان تاب
|
مدرەوشا خاستەر جە قورس ئافتاب
|
| جە نەخش نگین سەعادەتمەندش
|
جە عەدڵ و جە داد دانا پەسەندش
|
| کاففەی خەڵق شاناز فاریغی ژەندەن
|
خوتبەی خوسرەوی بە نامش وەندن
|
| وەختێ فەڕڕوخ بی بە ئەو تەخت و تاج
|
باز غەمزەی شیرین ئاماش بە تاراج
|
| گەرمیی سەفرای عەشق ئەو ماوە قەسب پۆش
|
مەغز تاقەتش هەم ئاوەرد بە جۆش
|
| بە غەیر جە شیرین ڕشتەی ئیلاهی
|
بێزار بی جە تاج جە تەخت شاهی
|
| جە شەرم مەریەم شای پەری پەیکەر
|
عەفیفەی دەوران، کناچەی قەیسەر
|
| مەگڕیا چون شەم هەر سوب تا ئێوار
|
دەرد وێش بە کەس نمەکەرد ئیزهار
|
| ئەر دەس نای زەڕڕین خوسرەوی مژەند
|
شمشێر نە ڕووی هەور بە مەردی مشەند
|
| جە دووری شیرین دەردش بیکاری
|
بێزاری مواست جە شەهریاری
|
| جە زایقەش جام بادەی بۆ سونبوڵ
|
بەتەر بی جە ژار کوشندەی قاتڵ
|
| نەغمەی ساز و چەنگ چەنگی خوش ئاهەنگ
|
چمان نە ڕیشەی جەرگش موست چەنگ
|
| گا گا چون نەغمەی ناقووس مناڵا
|
گا گا چون خەستەی زامدار ملاڵا
|
| گا موات بە دڵ پەرێ گومڕاهی
|
عاشقی خاسەن یا پادشاهی
|
| عاشقی و شاهی هەی دڵەی پڕ خەم
|
پەی کەس نە دەوران نمەدران وە هەم
|
| بەڵێ پەی شیرین شاهیم بێ زەوقەن
|
جە لام تاج و تەخت جون پارچەی تەوقەن
|
| ئەر بدان بە من بە دانای داوەر
|
هەر تای جە زوڵف شیرین دڵبەر
|
| موویەروون جە تەخت پادشاهیی وێم
|
با بکەران مەنع، خراب واچان پێم
|
| بە وەسف شیرین شای کەمەر لاڵان
|
مشی بە فامدا، مکەرد خەیاڵان
|
| موات کۆن شیرین باڵا تووڵ نەی
|
هەر شەو جە لەبان پێم بنۆشۆ مەی
|
| نمەز کۆن ئەو بەزم بیسات ڕەنگین
|
کۆن ئەو خاڵ خاسان جام جەم جەمین
|
| شەوان چەنیشان شەربەت موەردم
|
تا سوب چەنیشان بازی مکەردم
|
| کۆن ئەو سواری و ئەو سەفا و ئەو سەیر
|
ئەو شکار گۆر، ئاهووی وەحش و تەیر
|
| ئەو چەوگان بازیی ڕەندان زوڵف شۆڕ
|
ئەو شیخەی شاهێن، ئەو نەچیر پۆڕ
|
| وەی من هامڕازیی ئەو سۆسەن خاڵان
|
یا لێم بی بە خاو ویەردەی ساڵان
|
| ئیسە ئەر سەد تاج شەهریاریمەن
|
من هەر پەی شیرین شین و زاریمەن
|
| جەی گشت نازاران زوڵف بۆ عەبیرین
|
کەس دیار نیەن بە وێنەی شیرین
|
| شەڵڵا کەس چون من مەینەتبار نەبۆ
|
بێ یار و بێ دۆس بێ دڵدار نەبۆ
|
| شەهەنشا بەی تەور خەیاڵان مکەرد
|
پەیوەست مکێشا هەناسان سەرد
|
| ئاخر وات بە وێش وەسکەر خەیاڵان
|
وەس بە پووچ شادیی وێت دەر بە تاڵان
|
| هەرکەس نەی دنیا دەور بە کامشەن
|
چون جەمشید جەم مەی نە جامشەن
|
| هەرتا کە زیندەن یار چەنیش یارەن
|
پەیش مبۆ بە گوڵ ئەر سەد کە خارەن
|
| خۆ بێ دەوڵەت نیت دێوانەی کەم فام
|
جە عەرسەی دەوران نەیاوی بە کام
|
| پەی چێش؟ بێ دەوڵەت دایم خوار مبۆ
|
دۆسش ئەر سەدەن لێش بێزار مبۆ
|
| ئیسە تۆ شوکر دەوڵەت ڕامتەن
|
کام ڕەوانیی دوور بە کامتەن
|
| دا بواچە پێم دەوڵەت چون مبۆ
|
ئەرێ بێ مروەت جە شاهی ئەو کۆ
|
| چون بەی تەور دەوڵەت ئامبارتەن
|
ستارەت سەعدەن، فەڵەک یارتەن
|
| ئاخر مگێڵۆ دەوران بە کامت
|
شیرین هەم دیسان مگنۆ بە دامت
|
| شەهەنشا بەی تەور وێش دا دەڵاڵەت
|
دەمێ ساکن بی گیڵیا جە حاڵەت
|
| پێکا بە ئیخلاس بەور بەهمەن ڕەنگ
|
بە«حَبل المَتين» سەبر و تاقەت چەنگ
|
| فەرماش هەر بە سەبر خاتر مبۆ شاد
|
فرێ کەس بە سەبر یاوان بە مراد
|
