| خوسرەو جە دمای ئەی سوخەنخوانی
|
وێنەی دەریای ژەرف گەوهەر فشانی
|
| بە لەفز فەسیح شیرینتەر جە قەند
|
پەرێ بزورگان بەزم دڵپەسەند
|
| چەند نوکتەی شەریف شۆخ دڵپەزیر
|
بە دوڕڕ کەلام بەی تەور کەرد تەقریر
|
| واتش: هەر شەخسێ ساحێب شعوورەن
|
مەعلووم جە ئاداب نادانی دوورەن
|
| چون زومرەی بەعزێ بەدجینس بێ پیر
|
نەشمارا ئەرباب دەروێش بە فەقیر
|
| پەی چێش؟ نە ڕووی دەور دنیای بێ ئەندێش
|
موحتەشەم تەرێ نیەن جە دەروێش
|
| هەرکەس جە بەدیی مەردان نێک زات
|
زوبان بەستە نیشت نە ڕووی کائینات
|
| ئەوکەس ستارەش سەعد ئەکبەرەن
|
بەرگوزیدەی زات دانای داوەرەن
|
| دوورەن جە ڕای دین ڕەویەی کافری
|
تۆ بە عەیب وێت هیچ ڕا نەبەری
|
| بەڵێ هەردەم عەیب مەردوم بشماری
|
عەیب وێت ڤە خەڵق پەنهان بداری
|
| ئەمانەت فەرزەن ئەر هەنت شوعوور
|
بە خوردیی دوشمەن هیچ مەبەر مەغروور
|
| مکەرۆ عاجز بە دانای داوەر
|
پەششەیێ سەد پیل ئەژدەها پەیکەر
|
| هیچکەس جەی دنیای ئاشفتەی پڕشۆر
|
دامان دەوڵەت نەگرتەن بە زۆر
|
| دەوڵەت نە بە زۆر نە بە کردارەن
|
دەوڵەت هەر بە داد پەروەردگارەن
|
| ڕازیەن پەی وێش گەدای پارسەگەر
|
ببۆ چون شاهان بە ساحێب ئەفسەر
|
| بەڵێ هەر سەرێ یاران سەروەر
|
نیەن نە ڕووی دەور شایستەی ئەفسەر
|
| بەهرام چۆپین بە جەننەت بۆ شاد
|
من خوسرەو بیم هەم خوسرەو نەژاد
|
| تا بە ڕۆی ئەو گیان بە حەق سپەرد
|
هەر جە من دەعوای خوسرەوی مکەرد
|
| چون فەرقش نەبی سزای تاج و تەخت
|
ئاخر بەردش چەرخ نە دنیا شنەخت
|
| بزورگان جەی وەعز شیرین خوسرەو
|
کەردشان زاریبە ڕۆ تا بە شەو
|
| خوسرەویچ جە ڕای بزورگی ئەو ڕۆ
|
وەردش پەی بەهرام تەئەسسوف بێ شۆ
|
| تەعزیەتش گرت ئەو شای جەم مەقام
|
سێ شەبانە ڕۆز پەی فەوت بەهرام
|
| جەودما خێزا مەجلیس تازە کەرد
|
موغەنی چەنگش پڕ ئاوازە کەرد
|
| ئەوەند بەخشا گەنج دێبای گوڵ جە زەڕ
|
سارا و سەرزەمین تەمام بی پەڕ
|
| جەودما دیسان هیجران شیرین
|
دوودی دەرد داخ ئەو زوڵف عەبیرین
|
| گڕەی ئایرێ وەستش نە دەروون
|
پڕشنگ شۆڵەش ویەرد نە گەردوون
|
| پەی ڕەفع خومار کۆی خەرامان دەرد
|
«باربود» چەنی سازش تەڵەب کەرد
|
