شەوێ جە شەوان خوسرەو بە زەروور
|
تەڵەب کرد بە جەخت فەرخوندە شاپوور
|
واتش: مروەتەن شاپوور چینی
|
دڵ پۆشان جە خەم پەردەی موشکینی
|
ئەوەندە تەن سوفتەی عەشق شیرینەن
|
کۆگای زوخاڵم بۆ عەبیرینەن
|
جە جەرگم قرچەی بوریان مخێزۆ
|
جە زامم قەترەی زوخاو مڕێزۆ
|
تۆمار شاهی و تاج زەڕ نیگار
|
بیللا لێم بیەن بە تەوق زوننار
|
دیدەم بێ خاوەن چەنی خەیاڵان
|
پەشێوم چون زوڵف وەنەوشە خاڵان
|
چێش مبۆ شەوێ چو بەدر کامڵ
|
ئەو سەمەن سیمای زوڵف دەستە سونبوڵ
|
چون جەوانمەردان نادیرەی ئەییام
|
مریەم نەزانۆ باوەریش وەلام
|
مەعلووم بۆ جە لات دەروون پڕ دەردەن
|
نەواچی جە ئەو یە مەیلش سەردەن
|
من پەرێ سەڵاح دەوڵەت خواهیی وێم
|
پەی حیفز ئیقباڵ پادشاهیی وێم
|
مەحرووم پای تەخت ئەو خورشید شێوەم
|
مەلوولتەر جە زوڵف لوولیای لێوەم
|
نەوا بواچۆ ئەو شای بێ ئەندێش
|
خودا نەخواستە من بێزارم لێش
|
نمەدوون بە زات پاک ئیلاهی
|
تایێ جە زوڵفش بە تاج شاهی
|
خودا شاهیدەن نەققاش چینی
|
بێزارم هەر شەو کە شەو نشینی
|
پەی چێش؟ پەی ڕوخسار خورشید بێز ئەو
|
پەی پەی مەیگوون لەبان شەکەر ڕێز ئەو
|
نەشئەی بادەی ساف ئەرغەوانی ڕەنگ
|
بەدتەرەن جە ژا هەفت تاس فەرهەنگ
|
بەڵێ چون مریەم کناچەی قەیسەر
|
فرێ سەرکەشەن مدۆم دەردسەر
|
سەڵاح هەر ئێدەن هیچ نەزانۆ ئەو
|
بە جایێ خەڵوەت بنیشیم چەند شەو
|
بویارمێ بە شاد دنیا چەنی ئەو
|
ئەو هەر شیرینەن، من هەر ئەو خوسرو
|
وەرنە ئەر مریەم پێمان بزانۆ
|
دەرلاد گیان وێش با وێش مستانۆ
|
شاپوور «حسب الامر» ئەو شای جەوان بەخت
|
تەعەللول نەکەرد، هۆرێزا بە جەخت
|
ڕەوان بی بە قەسر چون بەتر پڕ جۆش
|
ئاما وە پای تەخت شیرین مەی نۆش
|
حاڵات خوسرەو یەکایەک جە لاش
|
ئیزهار کەرد تەما ئوستاد نەققاش
|
وات زەڕڕە جە سۆنگ کناچەی قەیسەر
|
خوسرەو پەروێز مکەرۆ حەزەر
|
وەرنە پەی نەدیەن بەژن باڵای تۆ
|
هەر وەختەن ببۆ بە خاک نەی کۆ
|
چون شا بەی دەستوور ئارەزووی تۆشەن
|
پەی تۆ فراوان دوود و ئەندۆشەن
|
ئەگەر مەیلت هەن باڵا زەڕ ستوون
|
پا بنیەر بە جەخت نە پشت گوڵ گوون
|
ئیمشەو جە ڕاف لوتف یەلغار دەر بە دەو
|
بشیم و مشکۆی بۆ موشک خوسرەو
|
نیهانی چەنی خوسرەو بە دڵ شاد
|
کۆکۆ کۆی خوسرەو خەم بدەر وە باد
|