| خوسرەو دیش فەرهاد وێڵ زام خەتەر
|
هیچ مەیلش نیەن بەو گەنج و گەوهەر
|
| بەی تەور چەنی ئەو دەروون خەستەی دەرد
|
چەند عەقد دانەی لوولوو گوشاد کەرد
|
| خوسرەو وات: فەرهاد تۆ نە چ جایی؟
|
فەرهەد وات: جە موڵک خۆش ئاشنایی
|
| خوسرەو وات: چۆگە چ تەور موویاران؟
|
کارشان چێشەن، چ سەنعەت داران؟
|
| فەرهاد وات: چۆگە بە سەد ئارەزوو
|
مەورەشان گیان، مستانان ئەندوو
|
| خوسرەو وات: فەرهاد مەگەر بێ هۆشی
|
دوورەن جە ئاداب گیان فرۆشی
|
| فەرهاد وات: عاشق بێ ئەدەب نیەن
|
ئەر بوورەشۆ گیان هیچ عەجەب نیەن
|
| خوسرەو وات: فەرهاد نادیرەی ڕووی دەور
|
بە دڵ سۆزانی، عاشقی بەی تەور
|
| فەرهاد وات: بیلا دین و ئیمانم
|
نەک عەشق بە دڵ، بە دیدە و گیانم
|
| خوسرەو وات: فرێن خۆ زوڵف عەنبەرین
|
بۆ دەست هۆرگێرە جە عەشق شیرین
|
| فەرهاد وات: خوسرەو مەر ئەوسا جە تەن
|
گیان شیرینم بەرشۆ جەی وەتەن
|
| خوسرەو وات: بە خاو موینیش هەر شەو
|
فەرهاد وات: خوسرەو خاو نیەن، کۆن خەو؟
|
| خوسرەو وات: جە عەشق ئەو شۆخ سەرمەست
|
کەی نە ڕووی دنیا هۆرمگێری دەست؟
|
| فەرهاد وات: ئەوسا پارە بۆ جەرگم
|
شیرین بوانۆ یاسین مەرگم
|
| خوسرەو وات: چ تەور مکێشی نازش؟
|
ئەر بەیۆ چێشەن ئەو پایەندازش؟
|
| فەرهاد وات: دیدەم یاگەی نازشەن
|
سەرێ کە داروو پایەندازشەن
|
| خوسرەو وات: چۆنەن شیرین بە خەنجەر
|
بە یەک دیدەی تۆ بیانۆ زەرەر؟
|
| فەرهاد وات: بە مەرگ شیرین دڵبەر
|
دەرسات ئەو دیدەیچ ماوەروو وە بەر
|
| خوسرەو وات: فەرهاد چێش مواچی، چێش
|
ئەر کەسێ شیرین بەرۆ پەرێ وێش؟
|
| فەرهاد وات: ئەو کەس ئەر سکەندەرەن
|
ئەگەر پادشای هەر هەفت کیشوەرەن
|
| مکەروون بە تێغ سیمات گوون ڕەنگ
|
عەرسەی سەر زەمین وەنەش تار و تەنگ
|
| خوسرەو وات: دۆستیش بۆ بەر کەر نە دڵ
|
دۆستیش پەرێ تۆ نەدارۆ حاسڵ
|
| فەرهەد وات: دۆستیش شای کەیخوسرەو خوو
|
سەوگەند بە تاجت مەر ئەوسا بەرشۆ
|
| زۆر پەنجەی مەرگ بستانۆم نەفەس
|
تەزەرو ڕۆحم بەرشۆ جە قەفەس
|
| خوسرەو وات: فەرهاد بۆ ئاسوودە بەر
|
ئەی کارە خامەن، دارۆ چەند زەرەر
|
| فەرهاد وات: ئەی کار پوختەن ئەر خامەن
|
ئاسایش پەی من مەحز حەرامان
|
| خوسرەو وات: پەی چێش سەبرت لێ دوورەن
|
فەرهاد وات: یانەی سەبرم خاپوورەن
|
| ئاخر عاجز بی شای فەڕڕوخ نەژاد
|
جەی موکابەرەی وێش چەنی فەرهاد
|
| فەرماش: چ عەجەب شیرین خیتابەن
|
سوخەن سەنجیدە وحازر جەوابەن
|
| نە بە گەنج و ماڵ، نە بە حەرف و سەوت
|
نمەیۆش عیلاج ئیللا هەر بەمەوت
|
| ئیمجار ناعیلاج شای فەرەیدوون فەڕ
|
سالار شاهان تاج و کەمەر زەڕ
|
| زوان کەرد بە تێغ جەوهەری فۆلاد
|
پەی کەندەی کۆی سەنگ بێستوون کەرد یاد
|
| فەرما بە فەرهاد بەور پۆڵا چەنگ
|
نە گوزەرگامان کوێی هەن جە سەنگ
|
| ئیرادەی خاتر هومایوون بەی تەور
|
تەعەللووق گرتەن نە ڕووی عەرسەی دەور
|
| نە کۆی خار و سەنگ بۆڵەند بێ دەر
|
بکەری گوشاد ڕایێ پەی گوزەر
|
| مزانوو کە حەل ئەی کار موشکوڵ
|
غەیر جە تۆ بە کەس نمەبۆ حاسڵ
|
| بە عەشق شیرین ڕازش قەند بێزەن
|
بە دەستەی زوڵفش عەنبەر ئامێزەن
|
| بە پێچ حەڵقەی گێسووی کەمەندش
|
بە دیدەی بارام دەهان قەندش
|
| هەرچەند مکێشی فرێ دەرد سەر
|
جە فەرموودەی من خودداری مەکەر
|
| فەرهاد هۆرێزا بە تاجیل و دەو
|
بۆسا پای سەریر بۆ موشک خوسرەو
|
| واتش: بە شەرتێ شای دارا نگین
|
جە وەسڵ شیرین شۆخ جام جەمین
|
| دەست هۆر بگێرۆ شاهانە دەستووڕ
|
ڕەنج بەردەی من بدارۆ مەنزوور
|
| خوسرەو شی بە خیشم بەو تەور جە فەرهاد
|
وەخت بی باوەرۆ بێخش جە بونیاد
|
| دیسان وات بە وێش ئەو شای جەم شکۆ
|
کەسێ جەی شەرتە پەی چێش باکش بۆ
|
| هەتا کە فەرهاد مشکاوۆ ئەو سەنگ
|
دنیا مگێڵۆ بە سەد هەزار ڕەنگ
|
| خوسرەو وات: فەرهاد وەها شەرت کەردم
|
ئەگەر هۆرگێڵوون جە شەرت نامەردم
|
| سا تۆیچ چون هوژەبر بەور پۆڵا چەنگ
|
ڕووکەر پە نەبەرد ئەو کۆی خارا سەنگ
|
| جە لای خاس و عام دنیا سەراسەر
|
دەست و برد وێت نومایان بکەر
|
| فەرهاد خەم کێش جە مەینەت دارا
|
پەرساش: جە کۆن ئەو کۆی سەنگ خارا؟
|
| شەخسێ بە دروست کەردش ڕەهنموون
|
بە قوللەی کۆی سەخت سەنگ بێستوون
|
| فەرهاد پڕ سام ئاشفتەی سەرکەش
|
هۆرێزا نە جا چون کوورەی ئاتەش
|
| هۆرگرت چون زەرغام پڕ زۆر جەنگی
|
تێشە و قوڵنگەی سەد مەنیی سەنگی
|
| دڵ سەرشار جە عەشق باڵا زەڕ ستوون
|
لوا تا یاوا وە پای بێستوون
|
| چون یاوا بەو کۆ مولاحەزەش کەرد
|
گرەوا زار زار کێشا ئاهـ سەرد
|
| ئەووەڵ ئاما ئاو بێچارەی دڵ ڕێش
|
پەی تەسکین دڵ، هەم تەماشای وێش
|
| بە تێشەی سەنگ تاش پۆڵای ئەڵماس ڕەنگ
|
ساف کەرد چون کاغەز قەدرێ جە ئەو سەنگ
|
| چون مانیی نەققاش نە دەورانش کەند
|
نەقش ئەسلەمی شۆخی دڵپەسەند
|
| کێشا هەم جە ڕای ساحێب کەماڵی
|
نە پای ئەسلەمی نەقش خەیاڵی
|
| ئیمجار بە دانش تا تێشە شەندش
|
بە سەد غەمزە و ناز نەزاکەت کەندش
|
| شیرین بەو شۆخی، خوسرەو بەو ڕەندی
|
شەبدێز هەر بەو شکڵ، بەو دڵپەسەندی
|
| پەی چێش؟ مەر بەو نەخش شۆخ دلارام
|
پەرێ کەندەی سەنگ بگێرۆ ئارام
|
| بەڵێ واچە هەی فەرهاد دڵتەنگ
|
وەختێ کەندی شکڵ شیرین نە ڕووی سەنگ
|
| چۆنت دڵ ئاما بە بێ ئەندیشە
|
سووڕەت شیرین تاشای بە تێشە
|
| دەیسە ڕێزە بای وەر جە گیان کەندەن
|
کێ تێشەش نە ڕووی یار وێش شەندەن
|
| بە ئەروات قەسەم یە جە تۆ فەرهاد
|
هیچ قەبووڵ نەکەرد«خانای خان قوباد»
|
| ئاحر بەی دەستوور فەرهاد دڵتەنگ
|
پەی تەسکین دڵ کەندش نە ڕووی سەنگ
|
| شیرین بەو بەرقە و خوسرەو بەو تۆمار
|
بە غەیر جە شاپوور، شەودێز نازار
|
