| وەختێ ڕەخشان بی جە میسباح خۆر
|
میشکات شیرین شۆخ سوب سەحەر
|
| شەهریار بە تاج دەیهیم شاهی
|
وەش دەماخ جە لای شەکەر بی ڕاهی
|
| بزورگان شار ئەسفەهان یەکسەر
|
تەڵەب کەرد جە باب ئاداب شەکەر
|
| جە حوزوور شا داشان گەواهی
|
بە پاک دامەنیی ئەو شەمع شاهی
|
| شا تەعەججوب مەند شیرینیی شەکەر
|
جەی چەندین مەگەس چۆن شیەن وە بەر
|
| ئاخر بە شەکەر شۆخ عەنبەرین
|
کەردش یاگەی وێش بە قەسر شیرین
|
| ڕاهیبان بە ڕەسم ئاداب ئەوجا
|
وەندشان سیغەی نیکاحش پەی شا
|
| شا وێنەی نەسیم تا پەنەش یاوا
|
غونچەی نەشکفتەش دەرلاد شکاوا
|
| دیش جە بەکارەت ئەو شۆخ دڵدار
|
دەستماڵ ڕەنگین کەرد چون لالەی وەهار
|
| فرێ مەحفووز بی ئەو والا گەوهەر
|
وات ڕووت سفید بۆ، ئافەرین شەکەر
|
| ئاخر بە دەوڵەت شای دارا نەبەرد
|
خێزا جەسفەهان موراجەعەت کەد
|
| بە فەڕڕ مەقەدەم شەکەر، جیهاندار
|
مشکۆی وێش چون میسر کەردش شەکەربار
|
| شا ئیرادەش بی بەر کەرۆ جە سەر
|
شیرینیی شیرین بە شێوەی شەکەر
|
| خۆ هەرچەند ماما شیرین بە شەکەر
|
شیرینتەر مبی جە لاش زیاتەر
|
