| خوسرەو وات جە نۆ: ئەرێ دلارام
|
حەرف سەرد وەسەن پێم نەمەند ئارام
|
| مەکەر تۆ حیساب شۆخ و شەنگیی وێت
|
بزورگی و تەمکین سام و سەنگیی وێت
|
| شێوەت شیرینەن، شاهان پەسەدەن
|
خورشید جە حوسنت سەرمەشقێ سەندەن
|
| ئەر ڕووی وێت نە جام بوینی وە چەم
|
شێت مووی و سەرسام، عومرت مبۆ کەم
|
| ئەر ڕوێ نە جام بوینی ڕووی وێت
|
شێت مبی دەرسات، چون من مەیۆ پێت
|
| ئیحتیاج نییەن وێت کەری تەعریف
|
زەریفی، نییەن وێنەی تۆ زەریف
|
| لاڵ جە بەدەخشان سەر مدۆ بە سەنگ
|
نییەن وێنەی لاڵ لەبانت خۆس ڕەنگ
|
| قەند ئەر دەهانت بوینۆ نە خاو
|
دەرسات دەهانش پڕ مبۆ جە ئاو
|
| شۆخیی شێوەی تۆ حەق شەریف کەردەن
|
شیرینیت، شیرین، جە شەکەر بەردەن
|
| ئەر بوورەشی تۆ بە چون من شایێ
|
جە دەستەی بۆ موشک زوڵفانت تایێ
|
| بیللا مستانووش بە هەر هەفت کیشوەر
|
بە هەزار خەروار عەبیر و عەنبەر
|
| دیدەی بەد دوور بۆ جە شۆخیی شێوەت
|
جە لوول زوڵفان لوولیای لێوەت
|
| دڵ سەرشام جە جام جورعەی بادەی تۆن
|
قەند قەندەهار غوڵامزادەی تۆن
|
| تووبا جە بەهەشت سەرئەفگەندەی تۆن
|
سونبول بەندەی زوڵف شەماڵ شەندەی تۆن
|
| چون بەی تەور نە دەور نەخشبەند نەخشان
|
شێوەی شیرینی گشت بە تۆ بەخشان
|
| سا وەس بە عەبەس شۆخ لەب شەکەر
|
چون سرکەی ناڕەس لێم ترش و تاڵ بەر
|
| ئەر ڕاسەن پەی من بەی تەور وێڵەنی
|
پەی من سەرگەردان ئەرا گێڵەنی
|
| دەروونم وەی تەور بە زوخاڵ مەکەر
|
شیرینیی دنیام، شیرین، تاڵ مەکەر
|
| سەوگەندم بە عەتر موشکین خامەی تۆ
|
بە خاڵ لیمۆی بۆ شەمامەی تۆ
|
| یا مبۆ بدەی جە وەسڵت وایەم
|
بکەری سای چەتر زوڵفت بە سایەم
|
| یا مبۆ چێگە هەر وە دەست وێت
|
بڕێزی هوونم، نینەن واتم پێت
|
| ئەر نەبیام مەردەی زوڵف گرنجت
|
داخدار نوختەی خاڵ پای زنجت
|
| پەی چێش یەند جە تۆ مناڵامەوە
|
یەند بە شاهیی وێم ملاڵامەوە
|
| تۆ بکەر دەرمان زام سەخت من
|
تالوخش بە تۆن تاج و تەخت من
|
| پەی تۆ نیشتەن بار سیا جە لێوم
|
ڕەحمێ کەر بە حاڵ جەستەی پەشێوم
|
| ئیمشەو ڕوخسەت دەر شیرین چەنی هەم
|
بویارمێ بە شاد تا وە سوبح دەم
|
| ئاخر شەرمێ کەر جەی حاڵ نەزانی
|
جەفا خاس نییەن ئەوەند بنمانی
|
