| بە خامەی موشکین نەققاش دێرین
|
بەی تەور کێشا نەقش حاڵات شیرین
|
| چون شیرین جە شا دوور کەفت بە دڵتەنگ
|
جە سەنگ دڵیی وێش داش بە سەردا سەنگ
|
| نەرگس جە ئەسرین لالە ڕەنگ کەرد کەیل
|
گوڵ کەرد بە خەزان گوڵناریی سوەیل
|
| شەنگەرفی خاک کەرد بە دیدەی گریان
|
قرچەش کەفت نە جەرگ چون قرچەی بوریان
|
| کەندش بە ناخوون پەنجەی خەڵاوی
|
نە سەحفەی تەڵا فەیرۆزەی ماوی
|
| پارە کەرد چون گوڵ یەخەی عەنبەر بۆش
|
کەفتەوبەر تەمام شەمامەی لیمۆش
|
| ئاهش وێنەی دوود سیای بۆ نەفتین
|
دەم دەم مکێشا بەرمشی چین چین
|
| سا بێتاقەت بی ئەو پەرێ خوسرەو
|
فەرماش تا گوڵگوون ئاوەردن بە دەو
|
| گوڵگوون چەنی سەیل ئەسرین گوڵڕەنگ
|
هۆرکیشا بە جەخت تەنگە و زێر تەنگ
|
| چەنی دوود ئاهـ چون ئاتەش پارە
|
نیشت نە کۆڵ زین دڵ پڕ پەژارە
|
| شەو تاریک چون تار زوڵمات گێسووش
|
ڕا باریک وێنەی پەڕگار ئەبرووش
|
| هەوا خەم ئەنگێز چون مایەی دەردش
|
سارا پڕ جە تەم جە ئاهـ سەردش
|
| جە ڕاهـ و بێڕاهـ گوڵگوون میا دەو
|
تا یاوا بە قورب لەشکرگای خوسرەو
|
| جە شوعلەی قوببەی پڕ شەوقش ئەو شەو
|
نەشناساش جە کۆن سەیوان خوسرەو
|
| بە نەرمە نەرمێ گوڵ بۆی گوڵ نمدار
|
یاوا بە نەزد ئەو سەیوان زەڕ تار
|
| نیگا کەرد مەس مەس ئەو شۆخ دڵبەر
|
کەس بێدار نەبی نە شا نە شەکەر
|
| ناگا نیگا کەرد فەرخوندە شاپوور
|
دیش کە سوارێ پەیدا بی جە دوور
|
| ئاما دیا دیش زوڵف عەبیرینەن
|
پەرساش: تۆ کێنی؟ واتش: شیرینەن
|
| تا شاپوور شنەفت وەی تەور جەوابش
|
هەڵمەت دا دەرسات بۆسا ڕیکابش
|
| شیرین دیش شاپوور، خاترش بی شاد
|
جە پشت گوڵگوون پیا بی دەرلاد
|
| شاپوور جە شادی سوجدەی زەمین بەرد
|
زیاتەر جە حەد مەدح و سەناش کەرد
|
| واتش: شکەر لەب، شەربەت ڕیزەی ڕاز
|
موژان چون خەدەنگ تورک تیرئەنداز
|
| یە چۆن بەی شەوە تەشریف ئاوەردی
|
ئێمە و شا ق قۆشەن موشەڕرەف کەردی؟
|
| هەی بە وەش ئامای شەهزادەی ئەرمەن
|
بووم پەڕەی نەرگس، خاڵ نەخش سۆسەن
|
| پەیکەر پەریزاد، ڕازان ڕێزەی قەند
|
تەحسین کەرد شاپوور ئوستای نەقشبەند
|
| جەو دما شیرین پەی شاپوور ئەو شەو
|
ئیزهار کەرد دەم جەنگ ئەو پەرێ خوسرەو
|
| وات: جە باب شاهـ فرە شۆخیم کەرد
|
نە خیدمەتیشەدا واتم حەرف سەرد
|
| من جە حەرف وێم خراب ئێشام دڵ
|
پەشیمانیم بەرد، بێحەد بیم خەجڵ
|
| وەختێ ڕەنجیا سوار بی جە لام
|
تاقەتم بڕیا پێم نەمەند ئارام
|
| منیچ شیم بە دڵ گوڵگوون بە دڵتەنگ
|
چەنی ئاهـ سەرد ئەسر لالە ڕەنگ
|
| تەی کەردم مەنزڵ دڵ بە خۆفەوە
|
زوڵف بە زەنگوولەی وەفر تۆفەوە
|
| تا یاوام وە تۆ شوکر خوداوەند
|
نەکەفتم بە دەس بەد خوای ناپەسەند
|
| جە لای تۆ شاپوور دانای سوخەنوەر
|
دوو حاجەتم هەن بەرارەش وەبەر
|
| یەکێ وەختێ شای جەم جای جەمشید فەڕ
|
چەنی خوسرەوان تاج و کەمەر زەڕ
|
| منۆشۆ بادەی گوڵڕەنگ بێ ئەندێش
|
گۆش مدۆ بە ساز نۆشین بادەی وێش
|
| من بەری وە سەیر هەر چۆن مزانی
|
قسەم نەکەری پای شا نیهانی
|
| تا سەیرکەرووم بەزم بۆ عەنبەر بارش
|
ڕۆشن بۆ دیدەم هەم جە ڕوخسارش
|
| دووەم حاجەتم هەر ئێدەن شاپوور
|
ئەر شا جە ڕای لوتف منش هەن مەنزوور
|
| بە شیر بەهای عەقد عورووسی
|
بکەرۆم مومتاز بە چاپلووسی
|
| وەرنە ڕام دیەن، خۆ هیچ نامان پێم
|
باز مشوونەوە پەی کلیسای وێم
|
| شاپوور سەوگەند وەرد بە شۆخیی شێوەش
|
بە لوول لاولاو زوڵفان لێوەش
|
| واتش: شەلەر لەب شای شیەین ڕازان
|
نازدار عەزیز نازەنین نازان
|
| ئیمجار چون زانام چۆنەن دەرمانت
|
ماوەروون بە جا ئەمر و فەرمانت
|
| شاپوور بەستەوە گوڵگوون چون شەبدێز
|
بەردش نە چەترێ شیرین چون پەروێز
|
| بەستش پەردەی چەتر زەڕتان زەڕپۆ
|
نیشت تێشدا شیرین شۆخ سۆسەن بۆ
|
| چون ستارەی سەعد نە چەرخ ئەخزەر
|
ئاما بە بالین شای بەرجیس ئەفسەر
|
| خاستەر جە چراغ گوڵاڵەی گوڵشەن
|
شەمع بەزم شا یەک یەک کەرد ڕەوشەن
|
| ناگا شەهەنشا جە خەو بی بێدار
|
دیش هەر نە چەرخەن شاپوور چون پەڕگار
|
| فەرماش: هەی شاپوور ساکنیی داخم
|
ئیمشەو خاوێ دیم پێش وەش دەماخم
|
| بەو تەور دیم بە خاو جە سەحن باغێ
|
ئاوردن پەرێم ڕەوشەن چراغێ
|
| من پێش دڵشادم دانای موو شکاو
|
واچە پێم چۆنەن تەعبیر ئەی خاو؟
|
| شاپوور وات: جە نۆ ئەعلای عەبیرین
|
شاد مبی وە دین دیدار شیرین
|
| سا بۆ بەی مژدە چون کەیان کەی
|
بنۆشیم بادە چەنی ساز نەی
|
| چون خۆر جە مەشریق بگێرۆ جە نوور
|
دێبای موشکیی شەو بە بەعزێ کافوور
|
| بادەی کافووریی گوڵڕەنگ گوڵ فام
|
چەنی بەگلەران بڕێزیم نە جام
|
| بە یاد ئەی خاو بنۆشیم پەی پەی
|
گاهێ گۆش بە چەنگ، گا بە ساز و نەی
|
| شا جە زەوق حەرف ئوستای موو شکاو
|
بە نیشات نەرگس شەهلاش شی نە خاو
|
