| شیرین پەیوەندەن، شیرین پەیوەندەن
|
دوو ئەبرۆی سیات بە هەم پەیوەندەن
|
| دوو شیرازەی قەوس ئۆسای غەیب ژەندەن
|
هەریەک سەد پەیکان وە جەرگم شەندەن
|
| جەو دەستەی زوڵفان حەیران مەندەنان
|
دامەن یا شا مار، یاخۆ کەمەندەن!
|
| خاڵی جەمینت زوڵفی چین چینت
|
چوون دانەو دامەن سەیادان تەندەن
|
| هەر تارێش سەد تا، پێچ دان وە هەمدا
|
هەر تارێش سەد دڵ پەنەش پا بەندەن
|
| ئەر من شەیداش بیم، نەکەران مەنام
|
بێ حەد زەریفەن، بێ سامان ڕەندەن
|
| باڵات وێنەی سەوڵ سای سەهەندی باخ
|
شۆخەن، وەش تەرحەن، بەرزەن بوڵەندەن
|
| دوو دیدەی سیات فیتنە ئەنگێزەن
|
سەرمایەی ئەفسوون، هەم جادوو بەندەن
|
| خەمزە و لارو لەنج، دیای بە نازت
|
بنچینەی یانەی سەبووریم کەندەن
|
| گوفتوگۆی شیرین، کەلامت، ڕازت
|
شەهدەن، شەکەرەن، نەباتەن، قەندەن
|
| بەهای دانەی خاڵ سەفحەی جەمینت
|
موڵکی هیندوستان شاری خەجەندەن
|
| عومرم شی وەباد تاقێق نەزانام
|
بێ مەیلیت تاکەین؟ جەفات تا چەندەن؟
|
| خواجەی ساحێب شەرت چی ڕەنجیانی
|
مەیلت، مۆبەتت، هیچکام نەمەندەن
|
| کەی جە بەندەگیت سەرکێشان سەیدی
|
هەر غوڵامی تۆن هەرتاکە زیندەن
|
| حەڵقەی غوڵامیت مەکەرۆ نە گۆش
|
بەندەن، پێش واچە، یە کەمتەر بەندەن
|
