عمر ساری غلطیاں تے غلطیاں کھاندا رہیا
عمر ساری غلطیاں تے غلطیاں کھاندا رہیا
سادگی وچ سادگی دی میں سزا پاندا رہیا
خاراں نوں گُل جان کے گُل نال لٹکاندا رہیا
میں سمجھ کے لعل انگیاراں نوں ہتھ پاندا رہیا
بجلیاں چمکن تے میں سمجھاں تجلی طور دی
میں بھلاوے پانی دے ریتاں دے ول جاندا رہیا
آب خنجر نوں رہیا میں آکھدا آب حیات
زہر نوں تریاق دی تھاں اپنے مونہہ لاندا رہیا
میری بے سُرتی تے اوہناں آن کے کیتے مخول
مینوں فرقت وچ جہناں دی غش تے غش آندا رہیا
بے قراری تھیں نہ ایہہ مُڑیا نہ اوہ رون تھیں
میں کدی دل نوں کدی اکھیاں نوں سمجھاندا رہیا
اوس کافر دا دل اپنا تے کدی ہویا نہ موم
شعر پڑھ کے فضل دے لوکاں نوں تڑپاندا رہیا
|
This work is now in the public domain in Pakistan because it originates from Pakistan and its term of copyright has expired. According to Pakistani copyright laws, all photographs enter the public domain fifty years after they were published, and all non-photographic works enter the public domain fifty years after the death of the creator. | 
|