| عەرزە داشت بەندەی دڵمەند و ڕەنجوور
|
سەیدی دامی عشق، بە سەیدی مەشهوور
|
| جە ژەهراوی عەشق شەربەت چەشیدە
|
هەرگیز شادی و زەوق بە چەم نەدیدە
|
| خەستەی پەشێو حاڵ پێکیای زامەت
|
خەمناک و خەمبار دایم خەم قامەت!
|
| نە جامی هیجران سەد هووناو وەردە
|
تەرکی وەفاو بەین هەرگیز نەکەردە
|
| دەرد زەدە و هەردەی ئەحبابی شەریف
|
ڕەندی نازداران «زوڵێخا»ی زەریف
|
| خاتر جە «شیرین»، زەریفتەر جە «لەیل»
|
یاری دڵ ئازار، کەم وەفای بێ مەیل
|
| عەرزە جە مەزموون، عەرزە حاڵمەن
|
ئێدەن گوڵ جەمین، سۆسەن خاڵمەن
|
| ئەوەڵ بە ئیخلاس سەوگەندان وەردە
|
ئاخر شەرت و بەین تا سەر نەبەردە
|
| هەرگاهـ جە ڕووی لوتف زوڵفان عەنبەرین
|
ئەر پەرسی ئەحواڵ بەندەی کەمتەرین...
|
| جەلات مەعلووم بۆ سەڵوی خەرامان
|
جە هیجرانی تۆ کارێ پێم ئامان...
|
| زەعیف و زەبوون زەعفەران ڕەنگم
|
چوون نەقشی دیوار دایم بێ دەنگم
|
| شەوو ڕۆ گریان دیدە نمینم
|
بە دڵ سیا پۆش، قامەت خەمینم
|
| جە تێغی هیجران سینە سەد چاکم
|
ئیفتادە و بێ ناز، خەڵتانی خاکم
|
| بێ تۆ زیندەگیم چوون ژەهری مارەن
|
دونیا نە دیدەم چوون شەوی تارەن
|
| مەعلووم بۆ جە لات نەونەمام وەش بۆ
|
سەیدی جە فیراق دووری باڵای تۆ...
|
| حاڵش بەد تەورەن، بە ئایەی کەلام
|
ئیختیار بە دەس تۆن، باقی «وَالسَّلام»
|
