غئیب‌دن گلن طبیبین خسته‌نین اوستونه آپاریلماسی
| غئیب‌دن گلن طبیبین خسته‌نین اوستونه آپاریلماسی یازار: مولوی |
مجلیس سونا یئتیشدی، سوفره‌نی جمع ائتدی‌لر،
طبیبین الین توتوب، خسته اوسته گئتدی‌لر.
خسته‌ایله چوخ دانیشدی، خسته‌لیک‌دن سؤز آچدی،
خسته‌نی دعوت ائتدی، دوز یانیندا اه‌یلشدی.
نبضینی یوخلاییب تئز، رنگی-روحونا باخدی،
اونون علامت‌لرین، اؤیرندی یئنه باخدی.
دئدی:موعالیجه‌ده، ضید یول ایله گئدیب‌لر،
موعالیجه یئرینه، یئنه خسته ائدیب‌لر.
اونلار خبرسیز ایدی، قلبی‌نین دردلریندن،
تانریدان رحم ایسته‌مک، کئچمیردی قلب‌لریندن.
خسته‌لیگی کشف ائدیب، طبیب دوشدو اوستونه،
سولطانا سؤیله‌مه‌دی، دردی گیزلتدی یئنه.
اذییت‌ی، آغری‌سی، دالاق، اؤددن دئییلدی،
اودونون کئیفیتی، توستوسوندن بللی‌یدی.
عاشیق‌لییی معلو‌م‌دور، اورک آغری‌سی گیزلین،
بدنی چوخ ساغلام‌دیر، آغری‌لار قیرمیش بئلین.
عاشقین خسته‌لیگی بوتون دردلردن فرق‌لی،
عشقین ایضطیراب‌لاری، تانریدان گلیر دردلی.
عاشیق‌لیک بیر طرف‌دن، یا دا آیری طرف‌دن،
بیزه رهبرلیک ایسه، داییم تانری طرف‌دن.
عشق‌دن هر نه دئسم‌ده، شرح ائدیب سؤیله‌سم‌ده،
عشقه چاتارامسا من، عاجیز اولارام من‌ده.
باخما کی، دیل‌ده تفسیر، داها تئز اوزه گولور،
عشقین دیلی یوخسادا، آیدین باشا دوشولور.
قلم تلسدیگیندن شوتویوب یازیردی تئز،
عشقه دوشندن سونرا، یازدیغین پوزوردو تئز.
سؤز بو یئره یئتیشدی، وصف ائتمک یادا دوشدو،
کاغیذلار پارچالاندی، قلم‌لر اودا دوشدو.
عاغیل اونون شرحینده، اولاق تک لیمه باتدی،
عاشیق‌لیک اؤز شرحینی، عشقین اوستونه آتدی.
گونش تئزدن بویلاندی، تانرییا اولدو دلیل،
حاق‌دان اوز دؤندرمه‌دی، قلبینه دولدو دلیل.
گر اوندان کؤلگه قالسا، هر طرف کؤلگه اولسا،
تانری جانا نور وئریر، جان اؤزو هاردا قالسا.
کؤلگه افسانه کیمی، سن‌سه یوخولار آرا،
گونش یئردن بویلانسا، آی اولار بیر آیپارا.
بو دونیادا شمس تکین، قریب گؤرمک یالان‌دیر،
شمس‌دن باشقا یالان‌دیر، چونکی جانلار آلان‌دیر.
شمس اگر خاریج‌دسه، فرض‌له دادا بیلریک،
او فردی هر بیر زامان، تصویر ائده بیلریک.
لاکین بو شمسه ایسه، وارلیق اولموش‌دور اسیر،
اونون بنزری یوخ‌دور، ذهنیمیزده‌دیر بو سیرر.
تصووورده ذاتی‌نین، شرفی‌نین هجمی یوخ،
نئجه تعریف اولونسا، تعریفی‌نین هجمی یوخ.
شمس-ی تبریزیم منه، نور، گونش اولموش یئنه،
چونکی او ناقق نورودور، بیر گونش اولموش منه.
ائله کی صؤحبت‌لریم، گلدی شمسین اوستونه،
سمادا دؤردونجو شمس، پرده چکدی اوزونه.
واجیب اولدوغو اوچون، آدینی چکدیم یئنه،
رمزلرینی شرح ائتدیم، آدینی اکدیم یئنه.
بو نفس منیم ایچیمدن، پارلایاراق گؤرونموش،
سانکی یوسیف کؤینه‌یی، منه انعام وئریلمیش.
او باره‌ده ناققیما، ایل‌لرله دوعا ائتدیم،
رمزی تکرار ائتمک‌له، اؤزومو اؤجا ائتدیم.
کی، سمایلا یئر اوزو، گولسون چیچک‌له دولسون،
آغلی، روحو، یوزلرله، آرتسین حیساب‌سیز اولسون.
دئدیم ائی حبیبیندن، اوزاغا دوشوب قالان،
سانکی بیر خسته کیمی، طبیب‌دن اوزاق اولان.
منه ظولوم ائتمه‌سن، چونکی فنادایام من،
داها گوجوم توکه‌نیب، تعریف دئیه بیلمیرم.
کیم نه دئییرسه دئسین، اؤزو عاغیلا گلسین،
ساختاکارلیق ائتمه‌یین، فایداسی اولماز بیلسین.
رقیب نه سؤیله‌ییرسه، هئچ ده مووافیق دئییل،
زحمتیم، اذیتیم،بیلسین نالاییق دئییل.
من نه دئییم، سؤیله‌ییم، دامارلار هوشیار دئییل،
یاری اولمایان «یارین»، شرحین وئرمک زوردور بیل.
اؤزون تعریف ائیله‌مک، سانکی ترکی ثنادیر،
او وارلیغین دلیلی، وارلیق اؤزو خطادیر.
بو هیجرانین، افقانین، شرحی چتین‌دیر-چتین،
بو شرحین زامانینی، ده‌ییشدیر سن اول متین.
دئدی: منه طعام وئر، چونکی آجمیشام یئنه،
سؤیله‌دی سن تلس کی، قیلینج آچمیشام یئنه.
صوفی واختین «اوغلودور» ائشیت منی ائی رفیق،
گونو آتماق صاباحا، دئییل‌دیر شرطی طریق.
اگر اؤز-اؤزلویونده، صوفی دئییلسنسه سن،
نقدی نیسیه ائتمک‌له، یوخلوغو گتیریرسن.
سؤیله‌دیم اونا بئله، یارین اؤرپه‌یی گؤزل،
قولاق آس حیکایته، اونون هر نه‌یی گؤزل.
داها یاخشی او اولار، اؤزللیگی دیلبرین،
حدیث‌ده سؤیله‌نیلسین گؤزللیگی دیلبرین.
سؤیله‌دی کشف ائتمه‌سن، خیانتی خیصلت‌ی،
اذیت وئرمه منه، ائتمه بو حرکتی.
آچ پرده‌نی آچیق دئ، بو ایش‌ده من نئجه‌یه‌م،
بو کؤینه‌یه سیغیشمام، او گوندوز، من گئجه‌یم.
دئدیم: گر بَیان اولسا، هامیی‌چین اولسا عیان،
نه سن وار اولاجاقسان، نه اطرافین، کئچمه یان.
سن آرزو ائدیرسنسه، اونو اؤلچوسونده ائت،
پارلاق ائتمز بیر داغی، سامان چؤپو سن درک ائت.
اونون گوج قودرتی‌یله، شوعاسین یایار گونش،
گر گوج‌لو شوعا وئرسه، یئری یاندیرار گونش.
بو دونیانین جانی تا، اولمایینجا قان تامام،
دوداق‌لاری سیخ تامام، گؤزلرین یوم یان تامام.
فیتنه تلاطوم‌لری، قان‌لاری آختارما سن،
بون‌دان سونرا بیر داها، شمسی یادا وارما سن.
بونون آخیری یوخ‌دور، اوول‌دن باشلا یئنه،
داوام ائت حکایه‌نی، قاییت اؤز بیلدیگینه.