| قیبلەم تاسەمەن، قیبلەم تاسەمەن
|
من پەی تۆ قیبلەم، خەیلێ تاسەمەن
|
| چوون کورەی ئاهێر دووی هەناسەمەن
|
هەرسات نە دڵدا سەدو سوا سەمەن
|
| گا شەیدا، گا شێت، گا سەر سامەنان
|
بێ تاقەت، بێ سەبر، بێ ئارامەنان
|
| گا مەشۆ چوون سەیل ئەسرین نە چەمدا
|
گا غەرقم نە گێج بەحری ماتەمدا
|
| گا ئەیامی وەسڵ مەگنۆوە یادم
|
هیجران مەکەرۆ خاتر ناشادم
|
| جە دووریت نە وەخت، نە بێ وەختمەن
|
دایم ئێشی دەرد زامی سەختمەن
|
| هەردەم بێ دەماخ خاتر زویرم
|
هەرگیز نمەشی تاوێ جە ویرم
|
| قیبلەم جە هەر شار تۆ مەکەری جێت
|
چوون قیبلە نما ڕوو مەکەران لێت
|
| تا گەردوون گەردی من نەدۆ بە باد
|
قیبلەم نمەشۆ هەرگیز تۆم جە یاد
|
| وێم کەردەن پەی تۆ بە قەیسی سانی
|
نەک تۆ من کەم شەرت، بێ وەفا زانی
|
| نە تۆ ئەو خواجەی بێ شەرت و شۆن بێت
|
غوڵامێ و چوون من دوور داری جە وێت
|
| نە من ئەو غوڵام بێ وەفاو بەین بێم
|
پی تەور گنوو دوور جەلای خواجەی وێم
|
| دەوری گەردوون بێ کەردش ئی ستەم
|
دیدەم، من و تۆش دوور وستەن جە هەم
|
| سەد کە دامەنت وەر بی جە دەستم
|
هەر غوڵامی تۆم هەرتاکە هەستم
|
| ئەر تۆ جە «شیراز»، من جە «شام»ەنان
|
تۆ هەر خواجەنی، من غوڵامەنان
|
| یاران چێش مەبۆ ئەگەر چەرخی سەیر
|
ئەمجار بشانۆ پێمان نەردی خەیر
|
| نەردێ بشانۆ نەخشش دوو شەش بۆ
|
پەرێ چەند ڕوێ ژیوایما وەش بۆ
|
| قیبلەم، چراغم، ئەر خواجەی خاسی
|
هەر بەندەی تۆنا من بە ئیخلاسی
|
| سەیدی تا زیندەی دەوری ئەیامەن
|
موخلیسەن، عەبدەن، بەندەن، غوڵامەن
|
