| نیزامی پەی فەوت لەیل عامیری
|
بەی تەر دان داد شیعر و شاعیری
|
| حوکم تەبیعەت کار کردگار
|
ئیقتیزاش پاسەن جە هەر ڕۆزگار
|
| شادابیی بەهار پاییز خەزانەن
|
گەرمای تابستان زمسان بێزانەن
|
| سەبزەی بەهاران جە پاییز زەردەن
|
گەرمیی تابستان زمستان سەردەن
|
| چون قارورەی ئاو جە نەسیم بی سەرد
|
ڕوخسار باغات پاییز مەبۆ زەرد
|
| شاخەی درەختان بەرگش مەڕێزۆ
|
نەرگس و شمشاد تەختش مەبێزۆ
|
| سپای سەمەن سەخت ماوە ڕۆ شکەست
|
گوڵ نامەی غەمش مەگێرۆ بە دەست
|
| پەی زەعیفیی حاڵ سەر سەبزەی چەمەن
|
ئەسرین مەڕێزۆ هەورەکەی بەهمەن
|
| سەرتەرز مێوان وە ڕووی سەنگ خاک
|
مەفتوول مەپێچۆ چون مار زەحاک
|
| باد موخالف چون مەیۆ جە دوور
|
گەڵاڕێز بەرگ درەختەن مەعزوور
|
| ئاوان جە عەرەق لافاو مەگوریزۆ
|
جە ئەنێش باد بەرگش مەڕێزۆ
|
| نازک جگەران باغ ڕەنجووری
|
شیرین نمەکان مایەی مەخمووری
|
| ئوفتادە ئەگوور هیندووی کەدیوەر
|
تاج تاک وە سەر زەنگ خەدیوەر
|
| سێب زەنەخ سورخ بەو سەرنگوونی
|
مەدۆ نە زەنەخ ئەنار کە چۆنی
|
| هەنار جگەرخوون کەف کەردەی وێش
|
هووناو مەڕێزۆ وە ڕووی دڵەی ڕێش
|
| پستە جە سەردی باز مەبۆ دوو لەب
|
عونناب هەرچی دوور لێش مەگێرۆ لەب
|
| بەڵێ جە داوای وەی تەور خەزانێ
|
زام یاوا وە سەر سەرگوڵستانی
|
| لەیلێ سەهی سەرو جە سەربوڵەندی
|
گنا وە چای ژەرف جە دەدمەندی
|
| دیدەی بەد شانا بەهاری باغش
|
باد تەپانچە دا وە چلچراغش
|
| ئەو سەربەند شەدەی زەڕین مەپێچا
|
چادر و چەخ شەوڕەوین مەپێچا
|
| ئەو نازک بەدەن دیبای قەسەبپۆش
|
زەرد بی چون قامەت قاسەب تەهیپۆش
|
| بەدر دوو هەفتەش بی وە هیلالی
|
سەهی سەروش بی وە تاپۆی خاڵی
|
| سەودای دەروونش جە سەر کەرد تەئسیر
|
سەرسامیی سەرش جە دڵ بی جاگیر
|
| گەرمای تەمووزی ژاڵەی لەیلێ بەرد
|
بای خەزان گوڵبەرگ لالەی لەیلێ بەرد
|
| تەب و لەرز لەرزان شیرین پەیکەرش
|
باز گرتش لە بان شەهد شەکەرش
|
| جە زەمین دانەی عومرش شەندەوە
|
سەربەند زەڕین جە سەر کەندەوە
|
| باڵین تەڵەب کەرد باڵای چون سەروش
|
پیادە بی جە زین شیرین تەزەروش
|
| بە زاری و شیوەن دایەش کەرد ئاواز
|
ئاوەردش وە نزیک پەرێ ئیفشای ڕاز
|
| واتش ئەی مادەر چێش کەرین تەدبیر
|
ئاهووی بەڕ زەهر وەردش چەنی شیر
|
| گنان وە کۆچگای هامسەران ڕەختم
|
سست بین ئەو ئەعساب ئەندام سەختم
|
| هوون وێم وەردم جە میهرەبانی
|
گیان یاوا بە لەب جە زیندەگانی
|
| ئەوەن وە پەنهان هوون دڵ وەردم
|
جە دەم و دەهان ها یاوان دەردم
|
| تا گیان جە لێوم نامان وە بێروون
|
با وا چۆم بە تۆ گرد ڕاز دەروون
|
| چون پەردە جە ڕووی ئەسرار هۆرداروم
|
خوداحافیز جە ئی جەهان مەویاروم
|
| دوو دەستت باوەر بوزۆم نە گەردەن
|
هوون من و قەیس ئامات وە گەردەن
|
| مەلووح و مەهدی بابۆی قەیس و لەیل
|
خاسشان نەکەرد قەتع ڕاگەی مەیل
|
| جە پەشیمانی بەران نەدامەت
|
داوەری و دیوان وادەی قیامەت
|
| یەک ساڵ هەرچەند بیم هامسەر شەوهەر
|
ناسفتە مەندەن نازەنین گەوهەر
|
| نەیاوام بە کام هێما هەر بیکرم
|
ئەدا و باب هیچکام نەبین جە فیکرم
|
| ئەو لەحزە وا گیان بە حەق مەسپارم
|
مەردم جە دووریی دۆست دڵدارم
|
| سورمەی دیدەم کەر وە گەرد پای یار
|
نیلیی بەرگم کەر وە فەرش پای یار
|
| فەرقم بە گوڵاو ئەسرین بکەر تەڕ
|
وە دوود دەروون بینیم موعەتتەر
|
| دەهانم هۆرپێچ وە بەرگ گوڵ زەرد
|
کافوور پاشیم کەر بە هەناسەی سەرد
|
| کفنم هوونین کەر چون من شەهیدم
|
بەرگم قرمز بۆ چون بەرگ عیدم
|
| ئاڕاستەی بکەر چون نەوعەرووسم
|
بسپارم وە خاک ئەو پەردە بووسم
|
| ئەو ئاوارەی من چۆن مەبۆ ئاگا؟
|
من ئاوارە بیم جە ئی وەتەن گاهـ
|
| مەزانۆم ئەو قەیس پەرێ سوگواری
|
مەیۆ وە سەلام ئی زەڕ عەماری
|
| مەنیشۆ وە سەر خاک گڵکۆی لەیل
|
نەجای یار وە خاک تازە کەرۆ مەیل
|
| مەناڵۆ بە زار بە سۆز دەروون
|
جە شادی حەقەن بەیۆم وە بیروون
|
| چون ئەو مەحبووب و هەم عەزیز یارەن
|
نەجای من وە لای تۆ یادگارەن
|
| ئەو پەی من پۆستی پڵەنگ کەرد وە کۆڵ
|
پەی من گرت نەوەر بیابان و چۆڵ
|
| پەی من بی موونیس وەحشییان هەرد
|
پەی من تەرک تەخت پادشاهی کەرد
|
| وێش ئاوارە کەرد جە قەوم و وەتەن
|
پەی من بەرگ خاس شاهیی کەند جە تەن
|
| پەی من ڕسوا بی جە ناو خاس و عام
|
پەی من جوانیش نەیاوا بە کام
|
| پەی من بی تانە جە دوشمن و دۆست
|
وێش کەرد وە مشتێ ئیستخوان و پۆست
|
| تۆ پەی ڕازی من دۆستش بداری
|
نەوینی وە قەیس یەک دیدە خواری
|
| ئەوا من لوام چەنی دڵەکەم
|
ئامانەتیی تۆ و تەنیا گوڵەکەم
|
| هەرچی واتم پێت وە قەیس بواچی
|
وەر نە جەرگ من وە تێغ مەپاچی
|
| چون عەزیزمەن با عەزیزت بۆ
|
نە جاگەی فەرزەند با تەمیزت بۆ
|
| واچە چون لەیلێ جەی دنیای دڵگیر
|
پارە کەردش قەید سلسلەی زەنجیر
|
| چەنی میهری تۆ تەن سپەرد نە خاک
|
تەسلیم کەرد بە یاد تۆ ڕەوان پاک
|
| جە ڕای عاشقیت سادقیش کەردەن
|
گیانش وە سەر کار عاشقیت بەردەن
|
| تا ئاخر عەدەد نەفەس شمارش
|
غەیر غەم عەشقت هیچ نەبی کارش
|
| ئەو لەحزە جە غەم تەک و تەنها مەرد
|
خەم و هیجری تۆش وە تۆشەی ڕا بەرد
|
| ئیمڕۆژ کە لوان وە نەقاب خاک
|
بە هەوا و هەوەس تۆن دەردناک
|
| چون مونتەزیران جەی گوزەرگاوە
|
تاکەی یاوی پێش بشی وە ڕاوە
|
| مدیۆ وە ڕاکەت چەم وە دماوە
|
تاکەی تاوی پێش بشی وە ڕاوە
|
| ڕاحەتش بکەر وە ئینتزاری
|
فارغ بۆ جە دەست خەزێنەداری
|
| ئێد وات و ڕاگەی نە سەر گرت نە پێش
|
پەی دار عوقبا و ئارامگای وێش
|
| نام خوداوەند ئاوەرد بە زبان
|
چەم پۆشا جە ئی زەمین و زەمان
|
| گیان وێش تەسلیم جان جانان کەرد
|
داغ وە دڵەی دۆس میهرەبانان بەرد
|
| نام خوداوەند ئاوەرد بە زبان
|
چەم پۆشا جە ئی زەمین و زەمان
|
| ڕاحەت بی جە دەس خوسەی و داخ و دەرد
|
ئەندام گوڵیش بی وە بەرف سەرد
|
| والدەش یانێ دایەی پیر ئەو
|
داغ دیدەی دەور زەمین گیر ئەو
|
| دیا نەوعەرووس کناچەی ناکام
|
بەو تەورە بە مرگ یاوا بە ئاکام
|
| مەعجەز و سەربەند جە سەر شەندەوە
|
مووی سفیدی سەر یەک یەک کەندەوە
|
| ڕوخسار پڕچین بە ناخوون هۆر کەند
|
وێش وەست وە ڕووی نەعش نازەنین فەرزەند
|
| پیرانە گریا وە ڕووی جوانیش
|
هوون وارا وە ڕووی ئاو زیندەگانیش
|
| گا ئەسرین ڕێزا وە ڕووی سەرینش
|
گا بەو ڕووخسار شێوەی شیرینش
|
| چڕیش وە باوان وە قەوم و خوێشدا
|
واران وە سەرنەعش ئەو دەروون ڕێشدا
|
| یەقە پارە بی زڵف خام بڕیان
|
بەرگ قەڵاخی سەر تا پا دڕیان
|
| بوو وە شین و واوەیلا و ڕۆ ڕۆ
|
واتی قیامەت بەرپا بی نە ڕۆ
|
| جە دمای داد و فوغان و فەریاد
|
گریان و ئەسرین زایەڵەی زیاد
|
| مادەر ئەساسەی سەفەر ساز نا
|
بەو تەورە لەیلی عەرووس ڕاز نا
|
| وات یە نەوعەرووس قەیس چۆڵگەردەن
|
ئەی خاک ئەمانەت بە تۆم سپەردەن
|
| نیاش بە کەفەن دمای شست و شۆ
|
بە ئایین دین بەردش وە گڵکۆ
|
| سپەردن وە خاک نازەنین لەیلێ
|
مادەر و خوێشان چەنی واوەیلێ
|
| گێڵانۆ دما بە ئاهـ و زاری
|
گردین سیاپۆش پەی عەزاداری
|
| خاتوون خەیمە چۆڵ بی حەساری
|
ڕاحەت بی جە دەس خەزێنەداری
|
| خانا چەند خانان خاتوون و خانم
|
بەریشن جەی دنیا داخی داخانم
|
| توێش مەشی بە خەیر بە نوور ئیمان
|
یاڕەب جە گوناهـ تەوبە و پەشیمان
|
