نئی نامه
| نئی نامه یازار: مولوی |
دینله نئیی، گؤر نئجه حیکایت‌لر سؤیله‌ییر،
آیریلیق حسرتیندن شیکایت‌لر ائیله‌ییر.
-وطنیم قامیش‌لیق‌دان، سالمیش‌لار آیری منی،
سسیم نالان ائیله‌میش، نالمی ائشیده‌نی.
آیریلیق فراقیندان سینه‌م‌دیر پاره-پاره،
درد سؤیله‌مک‌دن قئیری، یوخوم‌دور باشقا چاره.
هر کیم سویوندان کنار دوشموش اولارسا اگر،
نه قدر عومر ائدرسه، ویصالا حسرت چکر.
من هر بیر جمعییت‌ده یانمیشام، زار اولموشام،
یاس‌دا آغلار اولموشام، توی‌دا غم‌خوار اولموشام.
هر کس اؤز ظننی ایله، اولسا صادق یار منه،
آختارماسا تاپامماز، ایچیمدن اسرار یئنه.
چونکی نالم‌دن منیم، دئییل‌دیر سیرریم اوزاق،
گؤزلر گؤرمه‌سی اوچون، نور اولموش گؤزه یاساق.
منیم جانیم تنیم‌دن، تن جان‌دان گیزلی دئییل،
جانیما گؤرونمه‌یه ایزین وئریلمه‌میش، بیل.
آتشیم‌دیر نئی سسیم، سن اونو سانما کولک.
کیم‌ده آتش اولماسا، گل اونو اؤلموش بیلک.
عشقیمین آتشی‌دیر، دوشموش نئیین اوستونه،
قاینارلیغین آتشی، دوشموش مئی‌ین اوستونه.
یاردان آیریلان‌لارا، دوست اولار نئیین سسی،
داخیلی پردمیزی، ییرتار نئیین پرده‌سی.
نئی زهر تک، همچینین، پادزهر تک ایچیلن،
نئی کیمی غم دوستو یوخ، هم سئون، هم سئویلن.
نئی اؤزو درددن یانیر، اودلانیر، قان آغلاییر،
مجنون عشقیندن دئییر، وئره‌رک جان آغلاییر.
واریمیزدیر نئی کیمی، همیشه دیلبیر آغیز،
نئی لبینده گیزله‌نیب، همچینین بیر دیل، آغیز.
بیر آغیز نالان اولوب، سسی سیزلره طرف،
های-هارایی گؤی‌لره، یایماغی سئچمیش هدف.
هر کیم اونا باخارسا، درک ائدر ناله‌سینی،
بو باشیندا فغانی، او باشیندا سسینی.
بو نئیین شیرین سسی، اوندان آلمیش نفسی،
روحونون های-هارایی، اوندان آلمیش بو سسی،
بو هوشا محرم اولماق، بی‌هوش اولماق‌دیر، ائی دیل،
دیل‌لرین موشتریسی، بیل کی، قولاق‌دیر ائی دیل.
خئییرسیز اولسا، اگر غم‌لی نئیین ناله‌سی،
دونیایا یاییلماز هئچ، نئی‌لرین شیرین سسی.
درد الیندن گون‌لرین، لذذتی یوخ، آدی یوخ،
ناله‌لی گون‌لر اؤتور، مزه‌سی یوخ، دادی یوخ.
قورخوموز یوخ، گئتسه‌ده هفته‌لر، آی‌لار هدر،
قال منیم‌له بیرلیک‌ده، داخیلن پاکسان اگر.
بالیق جینسی اولماسان، سو سنی سیراب ائدر،
روزین اولماسا سنین، گون‌لرین اوزون کئچر.
هوشیارین حالینی هئچ، آنلایا بیلرمی خام؟!
موختصر اولسون سؤزوم، دئدیگیم بو، وسسالام!
باده قاینارلیغییلا، نوشوموزون گیداسی،
دونیا اؤز گردیش‌ایله، هوشوموزون فداسی.
باده بیزدن اولوب مست، بیز اوندان مست دئییلیک،
جان دا بیزله وار اولوب، بیز اوندان هست دئییلیک.
قالیب گله بیلمه‌ییب، راستا خاریج بیر زامان،
انجیر اولماز قوش‌لارا، دادلی یئمک هر زامان.
قیر اوغول، زنجیرلری، زحمت چک، آزاده اول،
سیم-و-زردن قاچ یئنه، گئت، اوزاق‌لاش، ساده اول.
تؤکولرسه کوزه‌یه، دنیز قدر سو اگر،
کوزه‌نین توتدوغو سو، بیر گونه بس ائیله‌یه‌ر.
دویماز هئچ حریص‌لرین، تاماه‌کار گؤز کوزه‌سی،
صدف‌لر دویماییب‌سا، یوخ اولار دوردانه‌سی.
هر کیمین کی، لیباسی، عشق اوزوندن چاک اولار،
عشقین گوناه‌لاریندان، تامامی‌له پاک اولار.
سئوین، عشق منبع‌یمیز، حبیب‌یمیزسن بیزیم،
دردلره علاج ائدن، طبیب‌یمیزسن بیزیم.
ائی، گیدی دونیامیزین، داوا-درمانی اولان،
افلاطون، ارسطون تک، یادداشیمیزدا قالان.
عشق الیندن روح اؤزو اوچوب قالخدی گؤی‌لره،
داغ‌لار سانکی رقص ائدیب، شؤوق‌له باخدی گؤی‌لره.
چاتدی عاشیق توروندا، اؤزونون دیلدارینا،
تور سئوینجدن مست اولدو، موسی چاتدی یارینا.
چوخ سیرلر گیزلنمیش‌دیر، نئیین زیل-و-بم‌ینده،
اگر آچسام سیرری من، دونیا ایتر غمینده،
لب‌لریم‌له یار لبین، اگر بیر ائیله‌سم من،
نئی کیمی من ده داییم، غم‌لی داستان سؤیله‌رم.
هر کیم اؤز دیل‌داریندان، قالارسا چوخ آرالی،
نه قدر نغمه دئسه، یئنه قلبی یارالی.
چونکو گول‌لر تئز سولوب، گولوستان اولوب خاراب،
داها گولون عطرینی، عوض ائیله‌ییر گولاب.
جومله معشوق اولموشدور، عاشیق قالمیش پرده‌ده،
معشوق همیشه ساغ‌دیر، عاشیق اؤلموش پرده‌ده.
عشقه مئییل ائتمز او، های دا وئرمز هایینا،
او، بیر قوش کیمی اولار، سس وئرر هارایینا.
قول-قانادی وئرمیشیک، او عشقین کمندینه،
ساچیندان توتوب چکر، اؤز دوستونون کندینه.
اول-آخیر بئینیم‌ده، نه قدر کی، شوعور وار،
یاریمین دا اوزونده منیم اوچون، نور وار.
نوردور ساغ-سولوم منیم، هم آرخام، اؤنوم منیم،
باشیم‌دا واردیر تاجیم، حلقه‌ده‌دیر گرده‌نیم.
عشقیمیز اولمالی‌دیر، بیز ده سؤز قوشا بیلک،
گوزگویه باخماق اوچون، بیزه گؤز قوشا گرک.
بیلیرسنمی، گوزگویه باخمیر، قانمازلار نئچین؟!
چونکو باخسا گوزگویه، صورتین گؤرر چیرکین.
گوزگو تمیزلنرسه، چیرکی اوست‌دن پاک اولار،
تانری‌نین گونشی تک، پارلایان نورلا دولار.
سن ده گئت سیل، تمیزله بیر توزون، پاسین اونون،
درک ائیله تمیزلیگی، گؤر تجللی‌سین اونون.
قلبی‌نین دویغوسویلا، بو حقیقتی ائشیت،
چامیرلیق‌دان چیخاراق، دوز یولو مردانه گئت.
اگر وارسا آغلینیز، تعیین ائدین دوز یولو،
اوندان سونرا شؤوق ایله، سیز گئدین دوم-دوز یولو.