نہ کہو اعتبار ہے کس کا
نہ کہو اعتبار ہے کس کا
بے وفائی شعار ہے کس کا
اے اجل شام ہجر آ پہنچی
اب تجھے انتظار ہے کس کا
عشق سے میں خبر نہیں یا رب
داغ دل یادگار ہے کس کا
دل جو ظالم نہیں تری جاگیر
تو یہ اجڑا دیار ہے کس کا
محتسب پوچھ مے پرستوں سے
نام آمرزگار ہے کس کا
بزم میں وہ نہیں اٹھاتے آنکھ
دیکھنا ناگوار ہے کس کا
پہنے پھرتا ہے ماتمی پوشاک
آسماں سوگوار ہے کس کا
چین سے سو رہو گلے لگ کر
شوق بے اختیار ہے کس کا
آپ سا سب کو وہ سمجھتے ہیں
معتبر انکسار ہے کس کا
یار کے بس میں ہے امید وصال
یار پر اختیار ہے کس کا
آپ بیمارؔ ہم ہوئے رسوا
سرنگوں رازدار ہے کس کا
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse