پنجاں پیراں نوں رانجھنے یاد کیتا
پنجاں پیراں نوں رانجھنے یاد کیتا
جدوں ہیر سنیہڑا گھلیا ای
ماں باپ قاضی سبھا گرد ہوئے
گلہ سبھناں دا اساں جھلیاای
آئے پیر پنجے اگے ہتھ جوڑے
نِیر روندیاں مُول نہ ٹھلیاای
بچہ کون مصیبتاں پیش آئیاں
وِچوں جیو ساڈا تھرتھلیائی
میری ہیر نوں ویر حیران کیتا
قاضی ماؤں تے باپ پتھلیا ای
مدد کرو خداء دے واسطے دی
میرا عشق خراب ہو چلیا ای
بہت پیار دلاسڑے نال پیراں
مئیں رانجھے دا جیو تسلیا ای
تیری ہیر دی مدد تے میاں رانجھا
مخدوم جہانیاں گھلیا ای
دو سد سُنا کھاں ونجھلی دے
ساڈا گاونے تے جیو چلیا ای
وارث شاہ اگے جٹ گاؤندائی
ویکھو راگ سُن کے جیو ہلیا ای
|
This work was published before January 1, 1929, and is in the public domain worldwide because the author died at least 100 years ago. |