| چراغ جەمینت، چراغ جەمینت
|
سەوگەند بە سیمای سافی جەمینت
|
| تا بە ڕووت نەقشەن خاڵی موشکینت
|
پای دڵ ها نە دام زوڵفی چین چینت
|
| تا دیدەی مەستت، پوڕ سورمەی توورەن
|
دیدەی پوڕ ئەسرم خاو جە لاش دوورەن
|
| تا شەمعی ڕووی تۆ نوور مەوارۆ لێش
|
من کۆگای عومرم ئایر مەشۆ لێش
|
| تا موژەت شاباڵ نیم نگای نازەن
|
ڕۆحی من چوون تەیر، هەر نە پەروازەن
|
| نمەبۆ بازاڕ شەوقی تۆ، بەتاڵ
|
تا من مەیلی تۆم مەشۆ نە خەیاڵ
|
| تۆ هەرسات حوسنت بێ ئەندازەتەر
|
من هەردەم عەشقم جە نەو تازەتەر
|
| ئەر فام پێش بیا، دڵەی مەجنوون خۆ
|
بڕیاش تەمای لاڵ شیرین ڕازی تۆ
|
| بەڵام بێ سوودەن پەی دڵ ئی هەوەس
|
مەحاڵەن جە «قەند» دوور گنۆ «مەگەس»
|
| عەشقی تۆ بەی تەور، من گرتەن گەردەن
|
هەر ئینام نە دڵ، تاکە ڕۆی مەردەن
|
| سەد ساڵ دمای مەرگ، جە داخت نەوگوڵ
|
مزیۆ نە گڵکۆم، «لالە»ی داخ نە دڵ
|
| ئەر بەی بویەری تۆ نە مەزارم
|
ماچوو: ئەی یارم هێمای داغدارم
|
| هێمای جە داخت مەسۆچۆ دەروون
|
هێمای مەڕێزنۆ، دیدەم سەیلی هوون
|
| سەیدی زامی عەشق، تۆش هێمای وەسۆن
|
تاسەش بە زەروور، پەی دیداری تۆن
|
