ژ رەنگێ دلبەرا حوری
| ژ رەنگێ دلبەرا حووری؛ گەلۆ یا رەب دبن پەیدا | زەریفا شەنگ نها بووری؛ شەفەق دابوو د ئەرزێدا |
| شەفەق دا ئەرز و ئەسمانی؛ ل من دلبەر مەها سانی | دخووم سۆندێ ب سوبحانی؛ زولەیخا بوو د مسرێدا |
| تو چێتر بووی ژ زولەیخائێ؛ دخووم سۆندێ ب تاهائێ | نەهن وەک تە د دونیائێ؛ مونەووەر بوو د نوورێدا |
| مونەووەر بوو د نێڤ نوورێ؛ کەمەر دابوو ل سەر سوورێ | ژ رەنگێ دلبەرا حوورێ؛ ل من تیرا کەڤان لێدا |
| ل من دا تیرەکێ دژوار؛ سەرێ تیرێ ددل چوو خوار | دائیمی ئەزم دکم هاوار؛ وەکی مەجنوون ب دەشتێدا |
| وەکی مەجنوون دمینم ئەز؛ شوبهی بلبل دخوینم ئەز | حەتا گەنگی بمینم ئەز؛ د زیندان و د حەبسێدا |
| ئەزێ مامە د زیندانێ؛ وەکی یووسف ل کەنعانێ | نزام دلبەر گەلۆ کانێ؛ مە چاڤ مابوو د وێ رێدا |
| مە چاڤ مابوو رییا خەیلا؛ کو جارەک بێتە دەر لەیلا | دەرینی مە ژ واوەیلا؛ ببینم وێ د خەملێدا |
| ببینم جام و دیسائێ؛ شەپالا رەنگ ژ رەعنائێ | دخووم سۆندێ ب تاهائێ؛ نینە وەک تە د بەغدائێدا |
| نینە وەک تە د نێڤ رۆمێ؛ گەلی خەلقا نەکن لۆمێ | ئەزێ سۆتم شوبهی مۆمێ؛ کرم ئێسیر د گاڤێدا |
| کرم ئێسیر ژ رەیحانا؛ ڤەبهتم شوبهێ چووگانا | کرم وەک دینێ دێرانا؛ شوبهی شەیخێ د خلوێدا |
| ئەزێ سەردارێ خلوێمە؛ دائیمی ئەز دگەل وێمە | قەوی موحتاجێ سەلوێمە؛ شوکور یا رەب تە ئەڤ چەندا |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse