کنیزین خسته‌لییینی اؤیرن‌مک‌دن اؤترو طبیب‌ین پادیشاه‌دان بیر خلوت یئر طلب ائتمه‌سی
| کنیزین خسته‌لییینی اؤیرن‌مک‌دن اؤترو طبیب‌ین پادیشاه‌دان بیر خلوت یئر طلب ائتمه‌سی یازار: مولوی |
ائله کی حکیم گلدی، بو سؤزدن آگاه اولدو،
وضعیتی اؤیرندی، شاها قیبله‌گاه اولدو.
دئدی: ائی شاه بو دم‌ده، خلوت ائیله سن ائوی،
یاخین‌لاری کنار ائت، یادلار ترک ائتسین ائوی.
گؤزه گؤرونمه‌سین کس، بیلینمه‌سین بیر ایزده،
کی، من سوروشا بیلیم، نه واردیر بو کنیزده.
منزیلی بوشالتدی شاه، تامام اوزاق‌لاشدی شاه،
دردی بیلینسین دئیه، کنیزیندن قاچدی شاه.
منزیل بوشالدی تامام، قوهوم اقرابالاردان،
ائوده هئچ کس قالمادی، طبیب سوردو بیماردان.
یومشاق-یومشاق اؤیرندی، هاردا وطنین،یئرین؟!،
درده درمان ائیله‌مک، اصولو داها درین.
نبضی اوسته ال قویدو، یوخلادی دیققت ایله،
طبیب نه سوروشدوسا، کنیز گتیردی دیله.
دابانینا باتارسا، تیکان بیرجه آدامین،
قویار دیز اوسته اونو، آه-اوف اینجیدر هامین.
ایینه‌نین اوجویلا تئز، آختارار او تیکانی،
تاپا بیلمسه اگر، قازاجاق تئز دابانی.
تیکان تاپماق آیاق‌دان، اگر دئییلسه آسان،
هئچ اورک‌دن تیکانی، تاپا بیلرمی اینسان؟
هر کس اورک‌ده گؤرسه، اونا باتان تیکانی،
چیخاردا بیلمز اونو، تاپماسا باتیرانی.
اولاغ قویروغو آلتدا، بیر شخص قویارسا تیکان،
اولاغ گؤتوره بیلمز، اولار هئی تپیک آتان.
اولاغ دفع ائتمک اوچون، آغریدیجی تیکانی،
قوشا تپیک آتاراق، خاراب ائدر هر یانی.
تپیک‌له ائده بیلمز، اولاغ تیکانینی دفع،
مهارت‌لی اوستایلا، دوزه‌لر ائدیلمیش سحو.
سورعت‌له سیچرایارسا، آرتیق آغریدار تیکان،
بیر عاغیل‌لی شخص لازیم، تیکان وئرمه‌سین زیان.
حکیم دوا ائتمک‌ده، ماهیر بیر اوستاد ایدی،
توخوندوغو هر خسته، بلادان آزاد ایدی.
سوروشوب اؤیره‌نیردی، نه سیرر واردیر کنیزده،
طبیب تکرار سوروشور، ائدیردی تکرار قیز دا.
او اوتوروب حکیم‌له، ائدیردی سیرلرین فاش،
بؤیوک‌لردن دانیشیر، گؤزوندن آخیردی یاش.
خسته ائدیردی صؤحبت، قولاق آسیردی حکیم،
نبضی‌نین وورماسی‌یلا درد آچیردی حکیم.
توتدوغو آدلار ایله، یوخلاییردی نبضینی،
مقصدی بو ایدی کی، بیلسین دردین یئرینی.
اونون وطنینده‌کی، دوست‌لارینی ساییردی،
دوست‌لار قورتاران زامان، او، شهردن دویوردو.
حکیم سوروشدو قیزدان، چیخدینمی شهریندن؟
داها هانسی شهری، سئویرسن چوخ دریندن؟
بیر شهرین آدینی، سؤیله‌دی قیز یئنیدن،
رنگی-روحویلا نبضی، ده‌ییشمه‌دی یئریندن.
خواجه‌لردن دانیشدی، شهرلر سایدی بیر-بیر،
یئرلره تعریف دئدی، خالقی دوز چؤرک‌لی‌دیر،
شهر-شهر آختاردی، ائو-ائو سوروب قورتاردی،
نه نبضی ووردو آرتیق، نه صیفتی آغاردی.
اونون نبضی یئرینده، اورگی ساکیت ایدی،
نهایت سمرقندین، او قند آدینی دئدی.
دریندن آه چکرک، آی اوزلو گلدی دیله.
اونون شهلا گؤزوندن، یاش آخدی گیله-گیله.
بیر تاجیر همن شهره، گتیردی ساتماق اوچون،
زرگرلرین باشچی‌سی منی آلدی اؤزوی‌چون.
آلتی آی ساخلایاراق، سونرا ساتدی اؤزگه‌یه،
بونو دئینده کنیز، غم باخمادی هئچ نه‌یه.
نبضی سورعت‌له ووردو، صیفت سارالدی سولدو،
همین زرگرین آدین، ائشیتجک گؤزو دولدو.
خسته‌سی‌نین سیررینی، ائله کی، طبیب تاپدی،
سانکی دردی-بالانی بیلدی او حبیب تاپدی،
دئدی: هانسی کوچه‌ده یاشاییر، همین اوغلان،
دئدی:غاتیفر آدلی، محله‌ده‌دیر جاوان.
بو دم‌ده بئله دئدی، عملی صالح حکیم،
آزالدارام عذابین، بیلدیم سبب‌کاری کیم.
دئدی:بیلدیم آنلادیم، کیم‌دیر عذاب وئره‌نین،
گؤزله سئحریمی ائدیم، اوللام عذاب گؤره‌نین.
شاد اول، سئوین گول داها، گؤیرد‌رم من سنی،
نئجه کی ،یاغیش سویو گؤیردیر گؤی چمنی.
چکرم غمینی، من داها غم‌لر چکمه سن،
یوز آتادان بابادان، سنه چوخ موشویقم من.
دینله منی بو سیرری، سؤیله‌مه هئچ کسه سن،
شاه ائتسه مجبور سنی، اونادا دئمه‌یه‌سن.
چونکو اگر سیررینی، ساخلاماغی باجارسان،
مورادین حاصیل اولار، داها تئز قوووشارسان.
پئیغمبر سؤیله‌میش‌دیر، سیررینی ساخلایان، شخص،
مورادینا تئز چاتار، چوخ دا گؤزلمز عبث.
توخوم یئرین آلتیندا، عادتا گیزلی قالار،
سیرری بللی اولاندا، یاشیل بیر بوستان اولار.
قیزیل گوموش گیزله‌نیب، اولماسایدی یئر آلتدا،
بس نئجه تاپیلاردی، معدن‌ده درین قاتدا؟!
حکیمین وعده‌لری، اونون لوطف-و کرمی،
کنیزه اورک وئردی، یوخ ائتدی دردی - غمی.
وعده‌لر اولسا دوغرو، یاغ کیمی یاتار قلبه،
اولسا یالان وعده‌لر، سانکی بوغازدا حلقه.
کرامت‌لی آدامین، وعده‌سی خزینه‌دیر،
کرامت‌سیز وعده‌سی بیلینمز دوزو نه دیر.
وعده‌نی وئردینمی سن، وفالی اولمالیسان،
وعده وفا ائتمه‌سن، سنه دئییلمز اینسان.