کوردی پەتی

←

کوردی پەتی (1950)
by پیرەمێرد

→

306065کوردی پەتی1950پیرەمێرد

ئەمساڵیش دیسان وا گەیمە بەهار	سەوزەی مێرغوزار، سۆزەی مێرغوزار
دوگمەی سەر سینەی بەیان ترازا	بەیان بە گوڵی سپی و سوور ڕازا
هەوری بەهاری کردی بە هەڵا	گولاڵە خەیمەی ئاڵی خۆی هەڵا
بەرخ و کارژۆلەی بەهار بە قەتار	هەڵپەڕکێیانە بە بەستە و قەتار
کە بای داراوس ئەشنێتەوە	پیاو خۆی تێئەگا و ئەبووژێتەوە
ئەو بایەی خاکی زیندوو کردەوە	پیریی لە بیری پیران بردەوە
بە دەماغ خۆیدا لە دەماغی من	ئاخ بێ دەماغە گوڵەباغی من
بە دەست پیریەوە کۆکەکۆکمە	خوازبێنی بەفر و هەڵەکۆکمە
سا تۆخوا کوڕگەل ئێوە و خوای خۆتان	سەیر کەن لەباتیم تا دەلوێ بۆتان
کە «ژین» و بەهار هەردوو بایەک بێ	جوانی و نەوجوانی هەردوو با یەک بێ
ژین ئەو ژینەیە بەیانی بەهار	لە گۆشەی ئاوێ و یارێکی دڵدار
دوو دڵ یەک بۆ یەک ئاواتەخواز بێ	نەک بە نەنگەویست نیاز و ناز بێ
دڵیان وەک ئاوی بەیانیان ڕوون بێ	بە نەشئەی سەودای یاری گوڵگوون بێ
تیشکی ڕۆژ بدا لەو ئاوە جوانە	شەوق بداتە سەر کوڵم و بڕوانە
بە زەردەخەنە سەر گۆنای چاڵ بێ	بە بۆی هەناسە هەڵگڕێ و ئاڵ بێ
دڵ سەراسیمەی شێوەی نازی بێ	گوێی حەڵقە لە گوێی شیرین ڕازی بێ
گیان بادەی غەمزەی چاوی بنۆشێ	دەست بێپرس سێوی سینەی بپۆشێ
ئەو سینە سافە شەوق بداتە ئاو	ئاو بێتە لەرزە شەرم هەڵسێ لە ناو
سەرمەستی سەودا و سەرلەسەر ڕان بێ	ئەگریجە لەسەر ڕوو پەریشان بێ
ئەو شلکەی ڕانە و زوڵفە سەد تەرزە	دڵ وەک بیی ناو ئاو بێنێتە لەرزە
دەم بەستەی تامی دوو لێوی ئاڵ بێ	دەماغ سەرخۆشی دوو لیمۆی کاڵ بێ
ئەنجا بە تکای نیگا و بە نیاز	ڕازی دڵ بێتە سەر گروشم و ناز
بەڵام عەشقی پاک تا سەر ئەمێنێ	وجوودیش نەبێ ڕۆحت ئەژێنێ
ئەوی ناتوانێ کە خۆی ڕاگرێ	خۆڵەمێش ئەبا لە جێی ئاگرێ

1933

This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:

It is an anonymous work or pseudonymous work and 50 years have passed since the year of its publication
It is a work where the copyright holder is a legal entity or a work of applied art and 50 years have passed since the year of its publication
It is a photographic or cinematic work that is not compositive (artistic in nature) first published before 1 January 1999
It is work published in Iraq before 1 January 1954, and the author died before 1 January 1979
It is another kind of work, and 50 years have passed since the year of death of the author (or last-surviving author)
It is one of "collections of official documents, such as texts of international laws, regulations and agreements, judicial judgements and various official documents."
It is the work of a body corporate, public or private, published by January 1st, 1980 (Article 20, 1971 law).