ہرنا ! پھرنا ایں سنگ اچھالدا
ہرنا ! پھرنا ایں سنگ اچھالدا ۔
ایتھے سنگ نہیؤں تیرے نال دا ۔
جا بیبا ہرنا توں پرھے وے پریرے،
پھرنا ایں بھوندا توں ویری دے ڈیرے،
لگیاں نے پھاہیاں توں جاہ نہ اگیرے،
راکھا توں اپنے حالَ دا ۔
بھج سوہنیاں ہرنا توں اک چنگی لا کے،
ماریا بیدوشا نہ جائیں دھوکھا کھا کے،
ویری کھلے راہیں شگن منا کے،
ویکھو کی بندا ای فعال دا ۔
جیؤ وے توں ہرنا توں مان جوانی،
پھٹی ہوئی ہرنی دی سن وے کہانی،
دسدی آں گلّ جہڑی ہڈّ ورتانی،
ویری پھرے تینوں بھالدا ۔
جیؤ بیبا ہرنا میں دیاں وے اسیساں،
جیو سکھیں-لدھیا توں لکھ بریساں،
تیرے بانکے نیناں دیاں نہیوں وے ریساں،
ڈاراں دا توں انگ پالدا ۔
بھج جا وے بھج جا توں ہو جا وے راہی،
بھونکن پئے کتے توں دیویں نہ ڈاہی،
مرن شکاری تے سڑ جائے پھاہی،
لہہ جائے پالا سیال دا ۔
جا وے سمبھالیں ہرناں اپنیاں ڈاراں،
جوہاں نی کھلھیاں تے کھلیاں جواراں،
رو کے نی راہ تیرے چوراں چکاراں،
ویری پھرے اگّ بالدا ۔
پھردے شکاری نی چھریاں گھڑاندے،
سانگاں نوں مانجن، کماناں کساندے،
کھوٹیاں نیتاں معصوماں نوں پھانہدے،
دھوکھا نہ کھائیں توں جال دا ۔
وڑ کھڈیں دن نوں نویکلے گھرنے،
ہرناں نوں پیندے ترکالیں وے ٹرنے،
ہچھے ن لگدے جواناں نوں جھرنے،
بہہ جانا دارو بھچال دا ۔
ویکھ چپھیرے ربّ دتیاں نی اکھاں،
نسّ پھاہیاں چھڈّ تینوں سائیں دیاں رکھاں،
ادم نہ چھڈیں تے رستے نی لکھاں،
رنگ وکھائیں اپنی چال دا ۔
واہ ! سوہنیاں ہرنا توں چست سریروں،
سنگاں نوں اڑن دا خوف کریروں،
اڑتھاں نوں جتیئے نہ بن تدبیروں،
آسرا اوس اکال دا ۔
ہسو شکاریو، لوو وے ودھائیاں،
ہرناں نوں راہ جاندے پاوو وے پھاہیاں،
ظلماں تہاڈیاں نے اتاں وے چائیاں،
پے جاوے وے صبر کنگال دا ۔
|
This work is now in the public domain in Pakistan because it originates from Pakistan and its term of copyright has expired. According to Pakistani copyright laws, all photographs enter the public domain fifty years after they were published, and all non-photographic works enter the public domain fifty years after the death of the creator. | 
|