ہر ہر ورق پہ کیوں کہ لکھوں داستان ہجر
ہر ہر ورق پہ کیوں کہ لکھوں داستان ہجر
آتا نہیں زبان قلم پر بیان ہجر
ظاہر اگرچہ تازہ و تر مثل لالہ ہوں
مجھ دل میں جانشین ہے داغ نہان ہجر
پژمردہ کیوں نہ ہوئے گل امید عاشقاں
بہتی ہے دل کے باغ میں باد خزان ہجر
آب حیات وصل سیں دے عمر جاوداں
ہے بے قرار غم سیں ترے نیم جان ہجر
وہ عاشقی کی مثل میں منظور ہے مدام
چلے میں غم کے بیٹھ جو کھینچا کمان ہجر
نیں سیر لالہ زار کی عاشق کوں آرزو
از بس ہے داغ سینہ گل بوستان ہجر
جاری بہ راہ چشم ستی خون دل سراجؔ
جب سیں مرے جگر میں لگی ہے سنان ہجر
|
This work was published before January 1, 1929, and is in the public domain worldwide because the author died at least 100 years ago. |