یار جب پیش نظر ہوتا ہے
یار جب پیش نظر ہوتا ہے
دل مرا زیر و زبر ہوتا ہے
ہو خجل باغ میں گل آب ہوا
جب سیں گل رو کا گزر ہوتا ہے
داغ دل کوں مرے نہیں بہرۂ وصل
گرچہ ہر گل کوں ثمر ہوتا ہے
گرد غم دلبر خوش چشم بغیر
سرمۂ چشم جگر ہوتا ہے
دل لیا نرگس ساحر نے تری
سچ کہ جادو کوں اثر ہوتا ہے
تیغ ابرو سیں تری خوف نہیں
دل مرا جائے سپر ہوتا ہے
شمع رو کی شب ہجراں میں سراجؔ
آگ غم داغ شرر ہوتا ہے
|
This work was published before January 1, 1929, and is in the public domain worldwide because the author died at least 100 years ago. |