یہ ہستئ دل اس پہ یہ طوفان تمنا
یہ ہستئ دل اس پہ یہ طوفان تمنا
اللہ رے اے جوش فراوان تمنا
دنیا میں ہوں میں سوختہ سامان تمنا
دل ہے مرا اک خانۂ ویران تمنا
برباد ہوا آج کسی کا دل وحشی
ہے خاک بسر کوچۂ ویران تمنا
جز خواب نہیں صبح امید دل مایوس
جز وہم نہیں مہر درخشان تمنا
اک حسرت محبوس ہے سرنامۂ الفت
درد دل وا رفتہ ہے عنوان تمنا
حسرت بھی ہے نومیدی بھی ہے یاس بھی غم بھی
دل دوز ہیں اجزائے پریشان تمنا
یا لاش کو لوگوں نے لپیٹا ہے کفن میں
یا خواب میں ہوں میں تہ دامان تمنا
افسرؔ مری وحشت کا تقاضا تو یہی ہے
ہوگا نہ رفو چاک گریبان تمنا
|
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author. | 
|