ಕುಲೆತ್ತ ಅಗೆಲ್
ಕುಲೆಕ್ಕ್ ಅಗೆಲ್ ಬಳಸುನೆ ಪಂಡ
ನಮ್ಮ ಕರಿದ್ ಪೋಯಿನ ಹಿರಿಯಕ್ಲೆಗ್ ಅಗೆಲ್ ಬಳಸುನ ಕ್ರಮ
. ಅಗೆಲ್ ಬಳಸುನ ಕೋಣೆಡ್ ಒಂಜಿ ಮಣೆ ದೀದ್
ಮಣೆತ ಮಿತ್ತ್ ಒಂಜಿ ಕಾಲ್ ದೀಪೊ ಪೊತ್ತಾದ್ ದೀದ್
ಆ ಮಣೆತ ಕೈತಲ್ ಒಂಜಿ ಚೆಂಬು ನೀರ್ಲ ದೀವೊಡು
ಅವೆಡ್ಡ್ ಬೊಕ್ಕ 16 ಬಾರೆದ ಇರೆನ್ ಸಾಲಾದ್ ಪಾಡೊಡು
ಪಂಡ 8 ,8 ಇರೆ ರಡ್ಡ್ ಸಾಲ್‌ದ್ ಪಾಡೊಲಿ
ಅತ್ತ್ಂಡ್ ೧೬ ಇರೆ ಒಂಜೇ ಸಾಲ್‌ಡ್ಲ ಪಾಡೊಲಿ
ಜಾಗ ಇಪ್ಪುಲೆಕ್ಕ ತೂವೊಂದು ಇರೆ ಪಾಡೊನ ಕ್ರಮ
ಅವೆಡ್ದ್ ಬೊಕ್ಕ ಮಾತ ಇರೆಕ್ ನೀರ್ ತಲಿತ್‌ದ್ ಉಜ್ಜಿದ್
ಸುರುಕು ನಡುತ ಇರೆಕ್ಕ್ ನುಪ್ಪು ಬಳಸುನ ಕ್ರಮ
ನಡುತೆಕ್ಕ್ ಚೂರು ಜಾಸ್ತಿ ನುಪ್ಪು ಬಳಸೊಡು
ಮಾತ ಇರೆಕ್ಕ್ ನುಪ್ಪು ಬಳಸ್ಸ್‌ದ್ ಆಯಿ ಬೊಕ್ಕ
ಕೋರಿದ ಕಜಿಪು ಬಳಸೊಡು
ಕೋರಿದ ಕಜಿಪುಲಂಚನೆ ನುಪ್ಪು ಬಳಸ್ಸಿನ ಲೆಕ್ಕೊನೆ
ನಡುತ ಇರೆಕ್ಕ್ ಚೂರು ಜಾಸ್ತಿ ಬಳಸುನ ಕ್ರಮ.
ಅವೆಡ್ದ್ ಬೊಕ್ಕ ನೀರ್ ದೋಸೆ ಬಳಸುವೆರ್
ಕೆಲವು ಕಡೆಟ್ ದೋಸೆ ಬಳಸುನ ಕ್ರಮ ಇಪ್ಪುಜಿ
ಬೇತೆ ಬೇತೆ ಕಡೆಟ್ ಬೇತೆ ಬೇತೆ ಕ್ರಮ ಮಲ್ಪುವೆರ್.
ಪ್ರಾದೇಶಿಕ ವಾಯಿನ ವ್ಯತ್ಯಾಸ ಉಪ್ಪುಂಡು
೧೬ ಇರೆ ಮಾತ್ರ ಅತ್ತಂದೆ ಒಂಜಿ ಇರೆ
ಅಡ್ದ ಪಂತ್ಯೊಡು ಜೈನಗ್ ಬಳಸುನ ಕ್ರಮಲ ಉಂಡು
ಜೈನಗ್ ಕೋರಿದ ಕಜಿಪು ಬಳಸೆರೆ ಇಜ್ಜಿ
ನುರ್ಗೆದತಪ್ಪುದ ಉಪ್ಪುಕರಿ ಮಲ್ತ್‌ದ್ ಬಳಸುನ ಕ್ರಮ
ಇಂಚ ಮಾತ ಬಳಸ್ಸ್‌ದ್ ಆಯಿ ಬೊಕ್ಕ
ಮಾತ ಇರೆತ ಕೊಡಿಟ್ ಒಂಜೊಂಜಿ
ಬಚ್ಚಿರೆಲ ಬಜ್ಜೈದ ಪೂಳುಲ ದೀವೊಡು
ಉಂದು ಮಾತ ಆಯಿಬೊಕ್ಕ ಇರೆತ್ತ ಕೊಡಿಕ್ಕ್
ಒಂಜೊಂಜಿ ನಿನೆ ಪೊತ್ತಾದ್ ದೀಪುನ ಕ್ರಮಲ ಉಂಡು
ಆ ನಿನೆನ್ ಮಡ್ಯೆಲೆ ತಯಾರ್ ಮಲ್ತ್ ಕೊರೊಡು ಪನ್ಪಿನ ಪದ್ದತಿ.
ನಿನೆ ಪೊತ್ತಾದ್ ದೀಪುನೆಗ್ ದುಂಬು
ಅಲ್ಪ ಸೇರ್ನಕುಲೆನ್ ಮಾತ ಪ್ರಾರ್ಥನೆ ಮಲ್ಪೆರೆ ಬೋಡಾದ್
ಬಳಸುನ ಕೋಣೆಗ್ ಲೆಪ್ಪೊಡಾಂಪುಂಡು
ಮಾತೆರ್ಲ ಉಲಯಿ ಬತ್ತಿ ಬೊಕ್ಕ
ನಿನೆ ಪೊತ್ತಾದ್ ಇರೆತ ಕೊಡಿಕ್ ದೀಯೆರೆ ಸುರು ಮಲ್ಪೊಡು
ನಿನೆ ಪೊತ್ತಾದಾಯಿ ಬೊಕ್ಕ
ಮಾತೆರ್ಲ ಅಗೆಲ್‌ದ ಎದುರುಡು
ಕೈಟ್ ಅರಿ ಪತ್ತೊಂದು ಉಂತುದು
ಮಲ್ತಿನ ಸೇವೆದ ಈ ಅಗೆಲ್‌ನ್ ಪೊರ್ಲುಡೆ ಕೈಕೊನೊಡುಂದು
ಪ್ರಾರ್ಥನೆ ಮಲ್ತೊಂದು ಅರಿ ಪಾಡ್ದ್
ಅಡ್ದ ಬೂರುದು ಆಯಿ ಬೊಕ್ಕ ಮಾತೆರ್ಲ ಪಿದಯಿ ಬರ್ಪೆರ್
ಬನ್ನಗ ಹಿರಿಯ ಪೊಂಜೊವು ಒಂಜಿ ಚೆಂಬು ನೀರ್ ಪಿದಯಿ ಪತ್ತೊಂದು ಬರೊಡು
ಒಂಜಿ ರಡ್ದ ನಿಮಿಷ ಬಾಕಿಲ್ ಮುಚ್ಚಿದ್ ಉಪ್ಪೊಡು
ಅಪಗ ಹಿರಿಯಕ್ಲು ಬತ್ತ್‌ದ್ ಅಗೆಲ್ ಕೈಕೊನುವೆರ್ ಪನ್ಪಿ ನಂಬಿಕೆ.
.ಅಯಿಡ್ದ್ ಬೊಕ್ಕ ಚೆಂಬುದ ನೀರ್‌ನ್
ಮೂಜಿ ಸರ್ತಿ ಮಾಡ್ದ್ ಮಿತ್ತ್ ಪಾರಾದ್ ಉಲಯಿ ಬತ್ತ್‌ದ್
ಮೂಜಿ ಸರ್ತಿ ಬಾಕಿಲ್ ಬೊಟ್ಟುದು ಮುಚ್ಚಿನ ಬಾಕಿಲ್ ದೆತ್ತ್‌ದ್
ಬಳಸಿನ ಅಗೆಲ್‌ನ್ ಮಾತೆರ್ಲ ಪಟ್ಟ್‌ದ್ ತಿನೊಡು ಪನ್ಪಿನ ಕ್ರಮ