རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད
༄༡
༣༡༦
བོད་སྐད་དུ
རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཅེས་བྱ་བ
བཅོམ་ལྡན་འདས་མི་ཕམ་ཁྲོ་གཉེར་ཅན་ལ་ཕྱག་འཚལ་ལོ
༣༡༧
འདི་སྐད་བདག་གིས་བསྟན་པའི་དུས་གཅིག་ན
ཉེ་བའི་འཁོར་རྣམས་ལེགས་པར་ཉོན་ཅིག
རང་བྱུང་ཐབས་ཆེན་དོན་བཤད་ཀྱིས
ང་ཡིས་བསྟན་བཤད་ཀྱིས་ཀྱིས་ང་ལ་ཉོན
ཅེས་བཀའ་བསྒོམ་མཛད་དོ
འདི་སྐད་བདག་གིས་ཐོས་པའི་དུས་གཅིག་ན
དུར་ཁྲོད་མེ་རི་འབར་བ་ཅེས་བྱ་བ
ཉིད་བཞིན་རླུང་ཚུལ་པ
མཚན་བཞིན་མེ་འབར་བ་དེ་ན
བཅོམ་ལྡན་འདས་གཞོན་ནུ་དཔའ་བོ་སྟོབས་ལྡན་ཞེས་བྱ་བར་སྐུར་སྤྲུལ་ནས
༣༡༨
གསང་བའི་བདག་པོ་ལ་སོགས་པ་ཁྲོ་བོ་ལ་རྒྱུད་ཆེན་པོ་གསང་བ་ཡང་ཁོལ་དུ་ཕྱུང་བ་འདི་བཤད་དོ
དོན་དགྲོལ་ཏོ
གསལ་བྱར་བྱེད་དོ
རྒྱས་པར་སྟོན་ནོ
ཞེས་བྱ་བའི་སྒྲ་ཉིད་ཀྱིས་ལན་གསུམ་བརྗོད་དོ
དེ་ནས་གསང་བའི་བདག་པོས་ཞུ་བ་ཞུས་པ
ཨེ་མ་བྱམས་མགོན་བཅོམ་ལྡན་ཐུགས་རྗེ་ཅན
བསྟན་པའི་སྙིང་པོ་གསུང་དུ་གསོལ
ཞེས་ཞུས་པ་དང
བཅོམ་ལྡན་འདས་ཀྱིས་ཁྲོ་བོའི་ཆ་ལུགས་སུ་མངོན་པར་སྤྲུལ་ནས
ཨ་སར་བ་དྷར་མ་ཨ་ཏི་ཞེས་བྱ་བའི་སྒྲ་བརྗོད་པས
མཁའ་འགྲོ་མ་ཐམས་ཅད་ཡིད་འཁྲུགས་པར་གྱུར་ཏོ
འཇིག་རྟེན་གྱི་ཁམས་ཐམས་ཅད་ཀྱང་འོད་ཀྱིས་ཁེངས་སོ
དེ་ནས་ཡང
སར་བ་མ་ལ་མ་ལ་ཨ་ཧུམ
ཞེས་བརྗོད་པས
སངས་རྒྱས་ཀྱི་བྱིན་གྱི་རླབས་མངོན་པར་གྱུར་ཏོ
༣༡༩
དེ་ནས་ཁྲོ་བོའི་ཚོགས་དང་མཁའ་འགྲོ་མའི་ཚོགས་རྣམས་ཀྱིས་ཐབས་ཅིག་ཏུ་འདི་སྐད་ཅེས་གསོལ་ཏོ
བཅོམ་ལྡན་འདས་རང་བྱུང་དབྱིངས་ནས་འོད་གསལ་བར་གསུང་དུ་གསོལ
ཨ་ཏི་ཐེག་པའི་དོན་དུ་གསུང་དུ་གསོལ
རང་རིག་བསྟན་པའི་སྒྲོན་མ་གསུང་དུ་གསོལ
ཞེས་དྲི་བ་གསུམ་དྲིས་སོ
དེ་ནས་སྟོབས་ཀྱི་བདག་པོས་བཀའ་སྩལ་པ
ཀྱེ་ཀྱེ་ཁྲོ་བདག་ཆེན་པོ་ཉོན
ང་ཡི་བསྟན་པ་བསམ་མི་ཁྱབ
དེ་རྣམས་དོན་ཆེན་འདིར
བཤད་ལེགས་པར་ཉོན
རང་བྱུང་དབྱིངས་ནས་འོད་གསལ་རིག་པའི་ཀློང
མ་སྐྱེས་གདོད་ནས་དག་པའི་མ་རིག་པ་མེད་པའི་རིག་པ་ཟག་པ་མེད་པ་རིག་པ་བྱང་ཆུབ་སེམས
སྐྱེ་མེད་དོན་ལྡན་རིག་པའི་ཡེ་ཤེས་སྐུ
རིག་པའི་ངོ་སྐུ་དང་ཡེ་ཤེས་སོ
འཇའ་ཚོན་ལྟ་བུར་མ་འདྲེས་ཡོངས་སུ་རྫོགས
ཅིཏ་ཏའི་དཀྱིལ་འཁོར་ཡེ་ཤེས་འོད་དུ་གསལ
ཡེ་ཤེས་འོད་འཕྲོས་མི་གནས་ལམ་བྱུང་ཞིང
རྣམ་དག་སྟོད་པའི་མཁའ་ལ་ཡེ་ཤེས་འོད་དུ་བརྡལ
༣༢༠
སྟོང་གསལ་འབྱེད་མེད་ངང་དུ་གཉིས་མེད་ཐིམ
ཨ་ཏི་འགྱུར་མེད་རིག་པའི་ལྟ་བ་ནི
གཅིག་ལ་ཀུན་རྫོགས་ཐ་སྙད་ཀུན་དང་བྲལ
ཐ་སྙད་སྤངས་ན་རང་བྱུང་བདེ་བའི་ཀློང
གཉིས་མེད་རྟོགས་ན་བདེ་ཆེན་ཨ་ཏིའི་ངང
ཐེག་ཆེན་དོན་རྟོགས་རིག་པ་ཨ་ཏིའི་ངང
གསང་སྔགས་དོན་རྟོགས་རིག་པ་ཨ་ཏིའི་ངང
ཡེ་ཤེས་དོན་རྟོགས་རིག་པ་ཨ་ཏིའི་ངང
རང་སྣང་དོན་རྟོགས་རིག་པ་ཨ་ཏིའི་ངང
རང་རིག་བསྟན་པའི་སྒྲོན་མ་འདི
བཟུང་བས་མི་ཟིན་ཆུ་ཟླ་འདྲ
བྱང་ཆུབ་ལམ་གྱི་སྒྲོན་མ་རང་བྱུང་རང་ལ་ཐིམ
དཔེར་ན་ཉི་བཞིན་འགྲོ་བ་ཡོངས་ལ་ཁྱབ
ཅིཏ་ཏའི་དཀྱིལ་དུ་གནས་བཅས་མི་གནས་ལམ་ཕྱུང་ཞིང
ཡེ་ཤེས་སྒྲོན་མ་སྟོང་ཉིད་ནམ་མཁའ་ལ
ཡེ་ཤེས་འོད་ཕུང་ནམ་མཁའི་མཐའ་དང་མཉམ
བག་ཆགས་སྦུབས་ལ་བརྟེན་ནས་ཡེ་ཤེས་དབྱིངས་ལ་སྤྱོད
ཡེ་ཤེས་སྒྲོན་མ་རང་སྣང་འོད་པོ་ཆེ
༣༢༡
ཡེ་ཤེས་སྒྲོན་མ་བསྟན་པ་ཀུན་གྱི་རྩེ
ཞེས་བཀའ་སྩལ་ཏོ
ཡང་ཞུས་པ
ཨེ་མ་ཧོ
བཅོམ་ལྡན་ཐུགས་རྗེ་ཅན
རྣམ་གསུམ་དྲིས་ལན་དེ་ལྟར་ན
དོན་གྱི་སྙིང་པོ་གསུང་དུ་གསོལ
བརྗོད་མེད་རྣམ་དག་གསུང་དུ་གསོལ
ཞེས་གསོལ་པས
ཁྲོ་བདག་ཆེན་པོས་བཀའ་སྩལ་པ
ཀྱེ་ཀྱེ་རྡོ་རྗེ་འཛིན་པ་ཉོན
ང་ཡིས་ང་ལ་སྟོན་པ་ཡིན
ལེགས་པར་ཡིད་ལ་གཟུང་བར་བྱོས
སྙིང་པོ་འགྱུར་མེད་ཀློང་ན་རིག་པ་རང་བྱུང་གསལ
སྙིང་པོ་ཡེ་ཤེས་སྐུ་ལ་གསལ་འགྲིབ་ཡོངས་ཀྱིས་མེད
དོན་གྱི་སྙིང་པོ་རང་གསལ་བདེ་བའི་སྐུ
ཀུན་ལ་ཁྱབ་པའི་སྙིང་པོ་ཉག་གཅིག་པོ
བརྗོད་པས་ཐོག་ཏུ་མི་ཕེབས་ཚིག་གིས་མཚོན་དུ་མེད
རིག་པའི་ཡེ་ཤེས་བརྗོད་པའི་མཐའ་དང་བྲལ
རྣམ་དག་འོད་གསལ་བརྗོད་མེད་དང་དུ་ཐིམ
དབྱེར་མེད་ཚུལ་གྱིས་སེམས་ཅན་ཡོངས་ལ་གནས
ཨེ་མ་ཧོ
རང་བྱུང་བདེ་བའི་སྐུ
ཚིག་གཅིག་བསྟན་པས་དོན་ཆེན་གོ
ཁ་དོག་དཀར་དམར་མ་འདྲེས་ཡོངས་སུ་གསལ
སྐུ་གཅིག་ཀུན་ལ་ཁྱབ་པས་བདེར་གཤེགས་སྙིང་པོའི་སྐུ
༣༢༢
འགག་མེད་ཀློང་ནས་ཤེས་རབ་འོད་གསལ་བ
རྟག་པར་གཏེར་འཆང་རང་གི་ཐུགས་ལ་གནས
རྒྱུད་ཆེན་དོན་འགྲོལ་གསང་སྔགས་ཨ་ལི་ཀ
ཡེ་ཤེས་དོན་སྟོན་གསང་སྔགས་རྒྱལ་པོ་འདི
ཀུན་ལ་དཀོན་པའི་རིན་ཆེན་གཏེར་ཡིན་པས
མ་ཡེངས་དམ་ཚིག་ལྡན་པས་སྤྱད་པར་བྱ
ཞེས་ཁྲོ་བོའི་རྒྱལ་པོས་བཀའ་བསྒོ་བའི་དོན་རྒྱས་པར་བཤད་དོ
ཅེས་རྒྱུད་ཐམས་ཅད་ཀྱི་རྒྱལ་པོ་གསང་བ་ཡང་ཁོལ་དུ་ཕྱུང་བ
རྡོ་རྗེ་སེམས་དཔའ་སྙིང་ཏི་མེ་ལོང་གི་རྒྱུད་ཆེན་པོ་ལས་གླེང་གཞིའི་ལེའུ་སྟེ་དང་པོའོ
༄༢
དེ་ནས་ཡང་བཅོམ་ལྡན་འདས་སྐུ་ཞི་བའི་ཆ་ལུགས་དྲུག་པ་རྡོ་རྗེ་འཆང་ཞེས་བྱ་བར་སྤྲུལ་ནང
མཁའ་འགྲོ་མ་ཆེན་མོ་ལྔ་ལ་སོགས་པ་སྟེ་མཁའ་འགྲོ་མ་བྱེ་བ་དང་ཐུབ་པ་དྲུག་དང་བྱང་ཆུབ་སེམས་དཔའ་རོ་ལངས་བདེ་བ་ལ་སོགས་པ་དང་ཐབས་ཅིག་ཏུ་བཞུགས་སོ
དེ་ནས་བཅོམ་ལྡན་འདས་ཀྱི་ཐུགས་རྗེའི་བྱིན་རླབས་ལས
གསང་བའི་བདག་པོ་ལག་ན་རྡོ་རྗེ་ཞེས་བྱ་བ་མདུན་དུ་བབས་ནས
༣༢༣
ཐལ་མོ་སྦྱར་ནས་ཞུ་བ་ཞུས་སོ
ཀྱེ་ཀྱེ་བཅོམ་ལྡན་རྡོ་རྗེ་འཆང
ཐེག་པའི་སྒོ་རྣམས་གསུང་དུ་གསོལ
ཞེས་ཞུས་སོ
རྡོ་རྗེ་འཆང་གིས་བཀའ་སྩལ་པ
ཐེག་པའི་སྒོ་ནི་བསམ་ཡས་ཀྱང
ཡི་གེ་རྣམ་པ་གཉིས་སུ་གསུངས
ཡི་གེ་རྣམ་གཉིས་གང་ཞེ་ན
ཡི་གེ་ཧ་ལ་འདུས
དེ་ཡང་བཤད་ལུགས་གང་ཞེ་ན
འཇིག་རྟེན་པའི་ཐེག་པ་དང
འཇིག་རྟེན་ལས་འདད་པའི་ཐེག་པའོ
འཇིག་རྟེན་པ་ནི་གང་ཞེ་ན
ཡི་གེ་ས་ལ་འདུས་པའོ
འཇིག་རྟེན་ལས་འདས་པའི་ཡི་གེ་ཧ་ཞེས་ཀུན་ཏུ་གྲགས
༣༢༤
ལྷ་དང་མི་ཡི་ཐེག་པ་བཤད
དེ་ལ་ཡང་ནི་རྣམ་གཉིས་སོ
ལོག་ལྟ་དང་ནི་ཡང་དག་ལྟ
ལོག་ལྟའི་ཐེག་པ་བསམ་ཡས་ཀྱང
བསྡུས་ན་རྣམ་པ་གཉིས་སུ་འདུས
རྟག་ལྟ་དང་ནི་ཆད་ལྟའོ
རྟག་པར་ལྟ་བའི་གྲུབ་མཐའ་ནི
རྒྱུ་རྟག་འབྲས་བུ་འགྱུར་བར་ལྟ
རྒྱུ་ནི་རྟག་པ་ཐེར་ཟུག་ལ
འབྲས་བུ་གནས་སྐབས་འགྱུར་བའོ
དེ་ཡང་ཡི་གེ་ས་ལ་རྫོགས
ཆད་པར་ལྟ་བའི་གྲུབ་མཐའ་ནི
རྒྱུ་ནི་ཆུ་ཡི་ལྦུ་བ་བཞིན
གློ་བུར་དག་ཏུ་འདོད་པ་ལ
འབྲས་བུ་སྟོང་པ་ཕྱལ་ཆད་དོ
འཇིག་རྟེན་རྐྱད་པར་ལྟ་བ་སྟེ
ད་ལྟའི་ལུས་འདི་བོར་ནས་ནི
ལུས་ནི་འབྱུང་བའི་བག་ལ་ཞ
སེམས་ནི་ནམ་མཁའི་བག་ལ་ཞ
ཅང་མེད་སྟོང་པ་ཕྱལ་ཆད་དོ
དེ་ཡང་ཡི་གེ་ད་ལ་རྫོགས
ལྷ་མིའི་ཐེག་པ་ཕྱེད་ལྟའོ
ཡང་དག་ལྟ་བ་ལ་ཡང་རྣམ་གཉིས་སོ
དེ་ཡང་ཡི་གེ་གཉིས་ལ་འདུས
ཡི་གེ་གཉིས་པོ་གང་ཞེ་ན
ཡི་གེ་མ་དང་ཨོམ་ལ་འདུས
རྒྱུ་ཡི་ཐེག་པ་དག་དང་ནི
གསང་སྔགས་རྡོ་རྗེའི་ཐེག་པའོ
མཚན་ཉིད་ལ་ཡང་རྣམ་གསུམ་སྟེ
དེ་ཡང་ཡི་གེ་རྣམ་པ་གསུམ
ཡི་གེ་བ་དང་རྩ་དང་ནི
ཡི་གེ་ཝ་ལ་རྫོགས་པའོ
ཉན་ཐོས་པའི་ཡི་གྲུབ་མཐའ་ནི
༣༢༥
འཇུག་པའི་སྒོ་ནི་བདེན་བཞིའོ
བསྲུང་བའི་ཚུལ་ཁྲིམས་ཉིས་བརྒྱ་ལྔ་བཅུ་ཡིས
ལོག་པའི་ལྟ་བ་དག་ལས་ཡང་དག་འཕགས
རྟོགས་པའི་ལྟ་བ་གང་ཟག་བདག་མེད་ཆོས་ལ་བདག་ནི་ཡོང་པར་འདོད
བདེན་བཞི་བསྒོམས་པས་འབྲས་བུ་རྣམ་བཞི་ཐོབ
སྡུག་བསྔལ་སྤང་བར་འདོད་ཅིང་འགོག་པ་བསྒྲུབ་པར་འདོད
ཀུན་འབྱུང་སྤང་བར་འདོད་ཅིང་ལམ་ལ་མངོན་པར་གནས
ཉོན་མོངས་སྤངས་ཤིང་ས་ལམ་བསྒྲུབ་པར་འདོད
དེ་ལ་རྣམ་པ་གཉིས་སུ་སྟེ
བྱེ་བྲག་པ་དང་མདོ་སྡེ་པ
བྱེ་བྲག་པ་ཡི་ལྟ་བ་ནི
ཕུང་པོ་ཁམས་དང་སྐྱེ་མཆེད་ལ
གཡག་རྡ་ནེའུ་གསེང་ཚུལ་དུ་འདོད
མདོ་སྡེ་པ་ཡི་ལྟ་བ་ནི
ཁ་ཏོན་བྱས་པའི་རང་བཞིན་དང
ཐོས་བསམ་བྱས་པའི་རང་བཞིན་གྱིས
ས་བརྒྱད་འབྲས་བུ་ཐོབ་པར་འདོད
རང་རྒྱལ་མདོ་སྡེའི་ཐེག་པ་ནི
འཇུག་པའི་སྒོ་ནི་རྟེན་འབྲེལ་བཅུ་གཉིས་ལ
རྟོགས་པའི་ལྟ་བ་ཆོས་ཀྱི་ཁམས
གཅིག་གི་ཕྱོགས་ལ་བདག་མེད་བལྟ་བས་འཕགས
༣༢༦
འདོད་ཆགས་གཉེན་པོར་མི་སྡུག་རྣམ་བརྒྱད་བསྒོམ
དཔེར་ན་དུར་ཁྲོད་རོ་བཞིན་ནོ
བྱང་ཆུབ་སེམས་དཔའི་ཐེག་པ་ནི
འཁྲུལ་གཞི་རྣམ་པར་བརྩི་བ་ནི
རང་རིག་རང་གསལ་རྣམ་པའོ
སྟོང་ཉིད་རང་བཞིན་མེད་པར་བལྟ
སྟོང་ཉིད་མ་འགགས་སོ་སོར་གསལ་བས་འཕགས
བདེན་གཉིས་ཚུལ་གྱི་རྣམ་པ་ཅན
དོན་དམ་དང་ནི་ཀུན་རྫོབ་བོ
སྟོང་པ་ཕྱལ་ཆད་མ་ཡིན་ཏེ
སྟོང་པ་ཁད་ཀྱིས་གསལ་བར་བསྒོམ
སྟོང་པའི་མུ་ལ་མི་གནས་ཚིག་གིས་མཚོན་དུ་མེད
རྡོ་རྗེ་ཐེག་པ་རྣམ་གཉིས་པོ
ཕྱི་བ་ཐུབ་པ་རྒྱུད་ཀྱི་ཐེག་པ་དང
ནང་བ་ཐབས་ཀྱི་རྒྱུད་དུ་གསུངས
དེ་ཡང་ཡི་གེ་རྣམ་པ་གཉིས
ཤ་དང་འལ་འདུས་པའོ
ཕྱི་པ་ལ་ཡང་རྣམ་གསུམ་མོ
ཀྲི་ཡ་ཨུ་པ་ཡོ་ག་གསུམ
དེ་ཡང་ཡི་གེ་གསུམ་དུ་འདུས
ཡི་གེ་གསུམ་པོ་གང་ཞེ་ན
ཡི་གེ་ཧ་དང་ཧེ་དང་ནི
ཀ་ལ་ཡང་དག་རྫོགས་པའོ
ཀྲི་ཡའི་ཐེག་པའི་གྲུབ་མཐའ་ནི
འཇུག་པའི་སྒོ་ནི་དག་པ་གསུམ
ཁྲུས་དང་གཙང་སྦྲས་འཇུག་པ་ལ
ལྷ་ཡི་དཀྱིལ་འཁོར་གསལ་བས་འཕགས
ལྟ་སྤྱོད་གཉིས་མེད་ལྷ་དང་རྗེ་ཁོལ་བལྟ
༣༢༧
བསྲུང་བའི་དམ་ཚིག་གང་ཞེ་ན
ལུང་གཅིག་ཆུ་ལ་མི་འཐུང་བ་སྲུང
རྟོགས་པའི་ལྟ་བ་གང་ཞེ་ན
ལྷ་དང་བརྗོད་མེད་ཐིམ་པར་རྟོགས
འབྲས་བུ་བཅུ་གཅིག་ཀུན་ཏུ་འོད་ཀྱིས་ལ་འགྱུར་མེད་གནས་པར་རྟོགས
ཨུ་པ་ཡ་ནི་གང་ཞེ་ན
སྤྱོད་པ་ཀྲི་ཡ་ལྟ་བུར་སྤྱོད
ལྟ་བ་ཡོ་གར་བལྟ་བས་འཕགས
དེ་ཕྱིར་གཉིས་མེད་རྒྱུད་ཀྱིས་ཐེག་པ་ཞེས་ཀྱང་གྲགས
ཡོ་གའི་གྲུབ་མཐའ་གང་ཞེ་ན
འཇུག་པའི་སྒོ་ནི་མངོན་པར་བྱང་ཆུབ་ལྔ
རྟོགས་པའི་ལྟ་བ་ལྷ་དང་གཉིས་མེད་རྟོགས
བསྲུང་བའི་དམ་ཚིག་གང་ཞེ་ན
མ་ཁྲེལ་རྣམ་པ་གསུམ་པོ་བསྲུང
མ་ཁྲེལ་རྣམ་གསུམ་གང་ཞེ་ན
སློབ་དཔོན་མཆེད་ཀྱིས་མ་ཁྲེལ་དང
ཡི་དམ་ལྷ་ཡིས་མ་ཁྲེལ་དང
རང་གི་སེམས་ཀྱིས་མ་ཁྲེལ་བའོ
བྱང་ཆུབ་ལྔ་པོ་གང་ཞེ་ན
གདན་གྱི་སྒོ་ནས་བྱང་ཆུབ་དགང
སྐུ་ཡི་སྒོ་ནས་བྱང་ཆུབ་དང
གསུང་གི་སྒོ་ནས་བྱང་ཆུབ་དང
ཐུགས་ཀྱི་སྒོ་ནས་བྱང་ཆུབ་དང
བསྐྱེད་པའི་སྒོ་ནས་མངོན་པར་བྱང་ཆུབ་པའོ
དེ་དང་འདུ་འབྲལ་མེད་པ་རྟོགས་པའི་དོན་གྱིས་འཕགས
གཉིས་མེད་ངང་ལས་ལྷ་ཡི་ཆོ་འཕྲུལ་བྱུང
༣༢༨
ནང་པའི་རྒྱུད་ལ་རྣམ་གསུམ་སྟེ
དེ་ཡང་ཡི་གེ་རྣམ་གསུམ་མོ
ཨོམ་དང་ཨ་ཧུམ་ལ་རྫོགས
མ་ཧ་ཡོ་གའི་ཐེག་པ་ནི
འཇུག་པའི་སྒོ་ནི་ཏིང་འཛིན་རྣམ་གསུམ་སྟེ
ཆོས་ཅན་ལྷ་ཡི་དཀྱིལ་འཁོར་དག་ཏུ་རྟོགས་པས་འཕགས
བསྲུང་བའི་དམ་ཚིག་རྩ་བ་སྐུ་གསུང་ཐུགས
ཏིང་ངེ་འཛིན་ནི་རྣམ་གསུམ་གང་ཞེ་ན
དེ་བཞིན་ཉིད་ཀྱི་ཏིང་འཛིན་ནི
ཡེ་ཤེས་སྟོང་ཉིད་བརྡལ་བར་བསྒོམ
ཀུན་ཏུ་སྣང་བའི་ཏིང་འཛིན་ནི
སྙིང་རྗེ་གསལ་ལམ་ལངས་བསྒོམ
རྒྱུ་ཡི་ཏིང་འཛིན་ཧུམ་གིས་བསྒོམ
དེ་ཡང་སེམས་དཔའ་སུམ་བརྩེགས་བསྒོམ
སྐུ་གསུང་ཐུགས་ཀྱི་དམ་ཚིག་ནི
སྐུ་ཡི་སྒོ་ནས་མ་བྱིན་ལེན་དང་སྲོག་གཅོད་སྤང་བར་བྱ
གསུང་གི་སྒོ་ནས་རྫུན་དང་ཕྲ་མ་ཞེ་གཅོད་ཚིག་མི་སྨྲ
གསང་སྒོ་འཆོལ་བར་མི་སྦྱང་གསང་སྔགས་ཐབས་ཀྱིས་བཅའ
ཐུགས་ཀྱི་སྒོ་ནས་བརྣབ་སེམས་གནོད་སེམས་ལོག་ལྟ་སྤང་བར་བྱ
རྡོ་རྗེ་སློབ་དཔོན་ཐུགས་ཀྱང་དཀྲུག་མི་བྱ
མཆེད་དང་ལྕམ་བྲལ་སུན་མི་ཕྱུང
ཐབས་དང་ཤེས་རབ་འདུ་འབྲལ་མེད་པར་འཁྱེར
བཅོ་ལྔ་རྡོ་རྗེ་འཛིན་པའི་ས་ལ་འབྲས་བུ་ཐོབ
དཔེར་ན་ས་གཞི་ལྟ་བུའོ
༣༢༩
ལུང་ཆེན་ཨ་ནུ་ཡོ་གའི་གྲུབ་མཐའ་ནི
འཇུག་པའི་སྒོ་ནི་ཅིག་ཆར་རིམ་གྱིས་སོ
རྟོགས་པའི་ལྟ་བ་འདུ་འབྲལ་མེད་པས་འཕགས
བསྲུང་པའི་དམ་ཚིག་རྣམ་གཉིས་རིམ་གྱིས་བསྲུང
ཅིག་ཆར་འཇུག་པ་གང་ཞེ་ན
སྙིང་པོ་དྲན་པས་ལྷ་རྣམས་མ་བསྐྱེད་རྫོགས
དཔེར་ན་ཆུ་ལ་ཆུ་བུར་རྡོལ་བའི་ཚུལ་དུའོ
རིམ་གྱིས་འཇུག་པ་གང་ཞེ་ན
དབྱིངས་དང་ཡེ་ཤེས་རིམ་གྱིས་ཞུགས་ནས་ནི
འབྲས་བུ་བཅུ་དྲུག་ས་ལ་གནས
དམ་ཚིག་རྣམ་གཉིས་གང་ཞེ་ན
གསང་སྔགས་དོན་རྟོགས་རྟག་ཏུ་བཀུར་བར་བྱ
ཁམས་གསུམ་སེམས་ཅན་སྙིང་རྗེའི་རྒྱུན་ཐག་གཅད་མི་བྱ
འཁོར་བའི་རྒྱ་མཚོ་དཔག་ཏུ་མེད་པ་ནས
མ་རྙེད་ནོར་བུ་རིན་ཆེན་སྟེར་མཛད་པ
རྡོ་རྗེ་སློབ་དཔོན་རྟག་ཏུ་བཀུར་བར་བྱ
དཔེར་ན་ཡིད་བཞིན་ནམ་མཁའ་ལྟ་བུའོ
ཞེས་རྡོ་རྗེ་འཆང་ཉིད་ཀྱིས་བཀའ་སྩལ་ཏོ
ཡང་གསང་བའི་བདག་པོས་ཞུས་པ
ཀྱེ་ཀྱེ་བཅོམ་ལྡན་ཐེག་ཆེན་བདག
ཐེག་པ་བརྒྱད་ཀྱི་གྲུབ་མཐའ་དེ་ལྟར་ན
ཨ་ཏིའི་ཐེག་པ་གསུང་དུ་གསོལ
ཞེས་ཞུས་པས
རྡོ་རྗེ་འཛིན་གྱིས་བཀའ་སྩལ་པ
དྲི་བ་དྲིས་པ་དེ་ལེགས་སོ
༣༣༠
ང་ཡིས་ཁྱོད་ལ་བསྟན་པར་བྱ
མ་ཡེངས་གུས་པའི་སེམས་ཀྱིས་ཉོན
རྫོགས་ཆེན་ཨ་ཏིའི་གྲུབ་མཐའ་ནི
གཅིག་རྫོགས་ཀུན་རྫོགས་ཐ་སྙད་ཀུན་དང་བྲལ
དམ་ཚིག་བསྲུང་དུ་མེད་པའི་ཕྱལ་པ་ལྷུན་གྲུབ་གཅིག་པུ་ཉིད
གཏིང་དཔག་དཀའ་ལ་བརྗོད་པའི་ཐ་སྙད་ཀུན་དང་བྲལ
འགྱུར་བ་མེད་པས་དྲན་པར་ཀུན་ལ་ཁྱབ
དུ་མར་རེད་ལ་ཉག་གཅིག་དགོངས་པའི་མཆོག
ཀུན་བྲལ་ཉག་གཅིག་ཅིར་ཡང་མེད་པའི་འོད་གསལ་བདེ་བའི་སྐུ
ཞེས་གསུངས་སོ
ཡང་ཞུས་པ
ཀྱེ་མ་ཐུགས་རྗེའི་བདག་པོ
བསྐྱེད་རྫོགས་རྣམ་པ་གསུམ་གྱི་དོན་གསུང་དུ་གསོལ
ཞེས་ཞུས་སོ
ཡང་བཀའ་སྩལ་པ
ཀྱེ་རྡོ་རྗེ་འཛིན་པ་ཉོན་ཅིག
ང་འདས་པའི་འོག་ཏུ་མ་འོངས་པའི་སེམས་ཅན་རྣམས་ལ་འདི་སྐད་སྟོན་ཅིག
བསྐྱེད་པ་མ་ཧ་ཡོ་ག་ནི
ཆོས་ཐམས་ཅད་ཀྱི་གཞི་ལྟ་བུའོ
རྫོགས་པ་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ
རྫོགས་པ་ཆེན་པོ་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ
དེའི་ཕྱིར་ན་བསྐྱེད་རྫོགས་རྣམ་གསུམ་འདུ་འབྲལ་མེད་པའི་དོན་ཡི་གེ་གསུམ་གྱིས་ཤེས་པར་བྱ་སྟེ
༣༣༡
དེ་ཡང་གང་ཞེ་ན
ཨོམ་ཨ་ཧུམ་གསུམ་གྱིས་ཤེས་པར་བྱའོ
དེའི་ཕྱིར་ན་ངས་གསལ་བར་བསྟན་གྱིས་ཡིད་ལ་ཟུང་ཞིག
སྐྱེ་འགག་མེད་པའི་ཨོམ་ནི་རང་ལ་ཡོད
སྐྱེ་ཤི་མེད་པའི་ཨ་ནི་བདག་ལ་མཆིས
འདུ་བྲལ་མེད་པའི་ཧུམ་གཅིག་བདག་ལ་མཆིས
ཡི་གེ་མེད་པའི་རྒྱུད་གཅིག་བདག་ལ་མཆིས
བསྟན་དུ་མེད་པའི་ལུང་གཅིག་བདག་ལ་མཆིས
རང་རིག་ཁ་འབྱེད་མན་ངང་བདག་ལ་མཆིས
ཡེ་ཤེས་སྙིང་པོ་སྒྲོན་མ་འོད་པོ་ཆེ
ཞེས་ཐེག་པ་དྲུག་གི་དོན་ཐེག་པ་གསུམ་དུ་ཤེས་པར་བྱའོ
ཡི་གེ་དྲུག་གི་དོན་ཡི་གེ་གསུམ་དུ་ཤེས་པར་བྱའོ
མ་འོངས་པའི་སེམས་ཅན་རྣམས་ལ་བསྐྱེད་རྫོགས་རྣམ་གསུམ་གྱི་དོན་གྱིས་རྒྱུད་གྲོལ་བར་གྱིས་ཤིག
སེམས་ཅན་ཐམས་ཅད་རང་ལ་ཡི་གེ་འབྲུ་གསུམ་དུ་གནས་པར་གྱིས་ཤིག
དེ་ཡི་ཕྱིར་ན་བསྒྲུབ་པ་མ་ཧ་ཡོ་གས་གཞི་དང་སྦྱར་ཏེ་བཤད
ལུང་ཨ་ནུ་ཡོ་ག་ནམ་མཁའ་དང་སྦྱར་ཏེ་བཤད
མན་ངག་རྫོགས་པ་ཆེན་པོ་ཉི་ཟླ་དང་སྦྱར་ཏེ་བཤད་དོ
དོན་གྱི་སྙིང་པོ་གཏན་ལ་འབེབས་པ་རྒྱུད་འདིས་ཤེས་བར་བྱའོ
ཞེས་དྲུག་པ་རྡོ་རྗེ་འཆང་ཆེན་པོས་གསང་བའི་བདག་པོ་ལ་ཐེག་པའི་དོན་བཀྲོལ་ཏེ་བསྟན་པའོ
༣༣༢
ཞེས་རྒྱུད་ཐམས་ཅད་ཀྱི་རྒྱལ་པོ་གསང་བ་ཞལ་ཐོན་ཏུ་བསྟན་པའི་རྒྱུད་རྡོ་རྗེ་སེམས་དཔའ་སྙིང་ཏེ་མེ་ལོང་གི་རྒྱུད་ཆེན་པོ་ལས
ཐེག་པའི་རིམ་པ་ལྟ་བ་བསྡུས་ཏེ་བསྟན་པའི་ལེའུ་སྟེ་གཉིས་པའོ
༄༣
དེ་ནས་ཡང་གསང་བའི་བདག་པོས་ཞུ་བ་ཞུས་པ
བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ
བཅོམ་ལྡན་འདས་མྱ་ངག་ལས་འདས་པའི་འོག་ཏུ
སེམས་ཅན་ཐམས་ཅད་ལ་ཇི་སྐད་བསྟན་པར་བགྱི
ཞེས་ཞུས་སོ
ཁྲོ་བོའི་རྒྱལ་པོ་འཇིགས་པའི་གཟུགས་ཅན་གྱིས་བཀའ་སྩལ་པ
ཨེ་མ་ཧོ
དོན་ཆེན་པོ་ངས་བཤད་ཀྱིས
རྡོ་རྗེ་འཛིན་པ་ལེགས་པར་ཉོན
ཁམས་གསུམ་གྱི་སེམས་ཅན་འདི་དག་ཐམས་ཅད་ནི
དང་པོ་གཞི་ཅི་ཡང་མ་ཡིན་པ་ལས་ཅིར་ཡང་འཁྲུལ་ལོ
གཞི་དེ་ངོ་བོ་སྟོང་པ
རང་བཞིན་གྱིས་གསལ་བ
ཐུགས་རྗེ་སེམས་ཅན་ལ་སྣང་ནུས་པའོ
དེ་ནས་ནང་འཛིན་བྱེད་ཀྱི་ཤེས་པ་མ་རིག་པའི་ཆ་ལས་བྱུང་བ་བྲེང་ཙམ་འགྱུས་པ་ལས
ཤེས་པ་སྤུན་པོས་ཕ་གི་ལས་ང་བྱུང་ངམ
ང་ལས་ཕ་གི་བྱུང་སྙམ་པའི་ཤེས་པ་བྱུང་བ་ཙམ་གྱིས་འཁྲུལ་ལོ
༣༣༣
མ་རིག་པ་དེ་གཞི་ལ་མེད་དེ
ཉམས་སམ་རྨི་ལམ་རྣམ་པ་ལ་ཡོད་དོ
སྣང་བ་ལས་རྐྱེན་རྣམས་བྱུང་ངོ
གཞི་དེ་འོད་ཁྱིམ་གྱིས་ཚུལ་དུ་གནས་པ་ལས
རྒྱུའི་རྐྱེན་ཞེས་བྱ་སྟེ་མ་རིག་པ་དངོས་སོ
དེ་ལ་རྟོག་དཔྱོད་དུ་སོང་བས་བདག་པོའི་རྐྱེན་ཞེས་བྱའོ
དེ་ལ་ལུལ་ཡུལ་ཅན་དུ་བཟུང་བས
དམིགས་པའི་རྐྱེན་ཞེས་བྱ་སྟེ
དཔེར་ན་མེ་ལོང་ལ་སྐྱེས་བུའི་བྱད་བསྟན་པ་ལྟ་བུའོ
དེ་གསུམ་དུས་མཚུངས་པས་མཚུངས་པ་དེ་མ་ཐག་པའི་རྐྱེན་ཞེས་བྱའོ
དེ་རང་གི་གཞི་ཡིན་པ་ལ་རང་གིས་ངོ་མ་ཤེས་ཏེ
འཁྲུལ་ནས་ཁམས་གསུམ་འཁོར་བ་གྲུབ་པོ
དེ་ནས་ཉོན་མོངས་པ་རགས་སུ་སོང་ནས
སེམས་ཅན་གྱི་གཟུགས་ཐ་དད་དུ་བྱུང་ངོ
གཞི་དེ་ལྟ་བུ་ལས་འཁྲུལ་ལོ
ཞེས་གསུངས་སོ
དེ་ནས་མཁའ་འགྲོ་མའི་ཚོགས་ནག་མོ་སྙིང་ཟན་མ་དང
རོ་ཟ་ཙན་དི་དང
ཐོད་པའི་ཕྲེང་བཅན་དང
རྨ་བྱའི་མགྲིན་པ་ཅན
སྙིང་ཁྲག་འཇི་བ་མ་ལ་སོགས་ཏེ་ནམ་མཁའ་གང་བའི་མ་མོའི་ཚོགས་རྣམས་ཀྱིས་ཐབས་ཅིག་ཏུ་འདི་སྐད་ཅེས་གསོལ་ཏོ
གཞིའི་རྣམ་པ་དེ་ལྟར་ལགས་ན
སེམས་ཅན་རྣམས་ལ་གཞི་བདེ་བར་གཤེགས་པའི་སྙིང་པོའི་དོན་ཅི་ལྟར་གནས་ཞེས་ཞུས་སོ
༣༣༤
ཡང་བཀའ་སྩལ་པ
ཨེ་མ་ཧོ
ཀློང་བདག་ཆེན་མོ་རྣམས་ཉོན་ཅིག
འཇིག་རྟེན་ཁམས་ཀྱི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་རང་ཆས་སུ་ཡོད་དོ
དེ་ཡང་ཏིལ་འབྲུ་ལ་མར་གྱིས་ཁྱབ་པ་བཞིན་དུ་གནས་སོ
དེ་ཡང་རྟེན་ནི་གཟུགས་ཀྱི་ཕུང་པོ་ལ་བརྟེན་ནོ
གནས་ནི་སྙིང་གི་དཀྱིལ་ན་གནས་ཏེ
དེ་ཡང་ཀུན་ཏུ་བཟང་པོ་གའུ་ཁ་སྦྱོར་གྱི་དགོངས་པ་ཞེས་བྱ་སྟེ
དཔེར་ན་བསེའི་གའུ་ཁ་སྦྱར་བ་བཞིན་དུ་གནས་པའི་ནང་ན་འོད་ཁ་དོག་ལྔའི་དཀྱིལ་ནས
ཞི་བའི་སྐུ་ཡུངས་འབྲུ་ཙམ་ལ་འོད་ཁྱིམ་གྱིས་ཚུལ་དུ་གནས་སོ
དེ་ནི་རིག་པའི་གནས་ས
དཔེར་ན་བུམ་པའི་སྐུ་ལྟ་བུའོ
དེ་ལས་བྱུང་བའི་ཡེ་ཤེས་ནི
གནས་པ་ཀླད་པའི་དུང་ཁང་གི་ནང་ན་གནས་སོ
དེ་ཡང་ཁྲོ་བོའི་སྐུ་ཡུངས་འབྲུ་ཙམ་ལ་སྤྱན་ཕུལ་ཐག་ཙམ་དུ་གནས་སོ
དེ་ཡང་འོད་ཟེར་གྱི་ཚུལ་དུ་གནས་སོ
དེ་ལས་བྱུང་བའི་འོད་ནི་མེ་ལོང་གི་དཀྱིལ་འཁོར་ལྟར་གསལ་ལ་དངས་པའམ
དཔེར་ན་ཉའི་མིག་ལྟར་འོད་ཟེར་དུ་གནས་སོ
དེ་དང་རིག་པའི་འབྲལ་པ་ན་སྙིང་གི་རྩེ་ནས་ཡར་ལ་རྩ་དར་དཀར་གྱི་སྣལ་མ་ཙམ་སྒལ་ཚིགས་ཀྱི་འདབ་ནས་ལང་ཡོད་དེ
༣༣༥
དེ་ནས་ལམ་དུ་བྱུང་ནས་མགོའི་ནང་དུ་འཇུག་གོ
རྩ་དེ་ཡང་རྩེའུ་ཆུང་གིས་གཡས་ནས་ཐོན་ནས་ཀླད་པ་དང་འབྲེལ་ལོ
དེ་ཡང་རྣ་བའི་འདབ་གཡས་གཡོན་ནས་མིག་དང་འབྲེལ་ལོ
དེ་ཡང་ནམ་མཁའ་ལ་མིག་བཟློག་སྟེ་རྩ་གཅུན་ན
ཡེ་ཤེས་ཀྱི་སྣང་བ་ཤར་ནས་ནམ་མཁའ་གང་བར་འགྱུར་རོ
དེ་ནས་ཡང་མཁའ་འགྲོ་མ་རྣམས་གྱིས་འདི་སྐད་ཅེས་གསོལ་ཏོ
ཨེ་མ་ཧོ
སེམས་ཅན་རྣམས་ལ་དོན་དེ་ལྟར་གནས་པ་ངོ་མཚར་ཆེའོ
བདེ་བར་གཤེགས་པའི་གནས་ལུགས་དེ་ལྟར་ལགས་ན
སེམས་ཅན་རྣམས་ལ་མ་རིག་པའི་གནས་ལུགས་ཅི་ལྟར་ལགས
ཞེས་ཞུས་སོ
ཡང་ཁྲོ་བོའི་རྒྱལ་པོས་བཀའ་སྩལ་པ་ཀྱེ་འབྱུང་བའི་བདག་མོ་རྣམས་ཉོན་ཅིག
ལེགས་པར་ཡིད་ལ་ཟུང་ཞིག
དོན་ཐུགས་སུ་ཆུད་པར་གྱིས་ཤིག
ཀྱེ་འགྲོ་བ་སྲོག་གིས་བསྡུས་པའི་སེམས་ཅན་རྣམས་ལ
ཉོན་མོངས་པ་མ་རིག་པ་ཞེས་བྱ་བ་ཤེས་ཆེ་བར་གནས་སོ
དེ་ཡང་རྟེན་གཟུགས་ཀྱི་ཕུང་པ་ལ་བརྟེན་ནས་གནས་སྙིང་དང་གློ་བའི་བར་ན་གནས་སོ
༣༣༦
དེ་ཡང་མ་རིག་པ་རྐྱང་པར་མེད་དེ་སེམས་ཞེས་བྱ་བ་བག་ཆགས་ཐམས་ཅད་སྡུད་པའི་གཞིར་གནས་སོ
དེ་ལ་ཡིད་ཅེས་བྱ་བ་ཡུལ་རྟོག་པ་དང་ལྷན་ཅིག་ཏུ་གནས་སོ
དེ་གསུམ་གཅིག་ཏུ་འདུས་པ་ལས་མ་རིག་པ་ཞེས་བྱ་སྟེ
འཁོར་བར་འཁོར་རོ
དེ་ལ་དུག་ལྔ་ཁོང་ཁྲོ་དང་དྲུག་བྱུང་ངོ
དེ་ནས་ཉོན་མོངས་པ་སྟོང་ཕྲག་བརྒྱད་ཅུ་བྱུང་ངོ
དེ་རྣམས་ལམ་གང་ནས་བྱུང་ཞེ་ན
གློ་བ་དང་སྙིང་དུ་འབྲེལ་པའི་བར་ན
སྲོག་རྩ་དམར་པོ་ཞེས་བྱ་བ་སོག་མའི་སྦུ་གུ་ཙམ་གྱིས་ནང་ནས་ཡར་རྒྱུ་སྟེ
དེ་སྒལ་ཚིགས་ཀྱི་འདབ་ནས་ཡར་རྒྱུའོ
དེ་ཡང་རྩེའུ་ཆུང་གཡོན་པ་དང་འབྲེལ་ལོ
དེ་རྣམས་དབུགས་ཀྱི་རྟ་ལ་ཞོན་ནས་རྒྱུའོ
དེ་ཁ་དང་སྣ་ནས་རྒྱུ་སྟེ
དེ་ལས་ཉོན་མོངས་པ་སྣ་ཚོགས་འབྱུང་ངོ
དེ་རྣམས་ཀྱི་དབང་དུ་མ་གྱུར་པའི་རིག་པ་ནི
རིག་པ་ནམ་མཁའ་བརྡལ་བར་བྱའོ
བར་སྣང་གི་ཁམས་ལ་ཡེ་ཤེས་ངོས་བཟུང་ངོ
དེ་བཞིན་དུ་མ་འོངས་པའི་སེམས་ཅན་ལ་བྱོས་ཤིག
ཅེས་བཀའ་སྩལ་ཏོ
དེ་ནས་མཁའ་འགྲོ་མ་རྣམས་ངོ་མཚར་མཆོག་ཏུ་གྱུར་ནས
ཨེ་མ་ཧོ
ཀློང་ཡངས་སོ
༣༣༧
སངས་རྒྱས་ཀྱི་སྐུ་སེམས་ཅན་ལ་བྱུང་བ་ངོ་མཚར་ཆེའོ
ཨེ་མ་ཧོ
ཀློང་གཅིག་ཏུ་འདུས་སོ
ཨ་ལ་ལ་ཧོ
དོན་སྲིད་ཆེན་པོ་རྙེད་དོ
ཞེས་བརྗོད་ནས་མི་སྣང་བའི་ངང་དུ་གཤེགས་སོ
དེ་ནས་ཡང་གསང་བའི་བདག་པོ་བ་ཛྲ་པ་ནི་དང
གནོད་སྦྱིན་གྱི་ཚོགས་བསམ་གྱིས་མི་ཁྱབ་པ་དང
ཀླུའི་རིགས་བསམ་གྱིས་མི་ཁྱབ་པའི་འཁོར་དང་བཅས་ཏེ
ཁྲོ་བོའི་རྒྱལ་པོ་ལ་ལན་གསུམ་བསྐོར་བ་བྱས་ཏེ
འདི་སྐད་ཅེས་གསོལ་ཏོ
བ་ཛྲ་པ་ནི་དྷ་ས་རྟ་ནི་གྷ་མ་གྷ་བ་ཁ་ཚ་བྷ་ཨོམ་ཨོམ
ཞེས་བརྗོད་ནས་ཡང་ཞུས་པ
ཨེ་མ་ཧོ
ཀྱེ་ཐུགས་རྗེ་ཆེན་པོ་དོན་གྱི་སྙིང་པོ་དེ་ལྟར་ལགས་ན
སེམས་ཅན་དབང་པོ་འགགས་པ་ལ
ཇི་ལྟར་འཆར་ལུགས་བསྟན་དུ་གསོལ
ཞེས་ཞུས་པས
སྟོབས་ཀྱི་རྒྱལ་པོས་བཀའ་སྩལ་པ
ཨེ་མ་ཧོ
གནོད་སྦྱིན་གྱི་འཁོར་རྣམས་ཉོན་ཅིག
ང་མྱ་ངན་ལས་འདས་པའི་འོག་རོལ་ནས
སེམས་ཅན་བག་ཆགས་སད་པ་རྣམས་ལ་འདི་སྐད་སྟོན་ཅིག
རིགས་ཀྱི་བུ་ཁྱོད་ཡོངས་སུ་མྱ་ངན་ལས་འདས་པའི་ཚེ
རིག་པ་གཞི་ནས་འཕགས་ཏེ་ལམ་གུ་འཇུག་པ་ངོ་ཤེས་པར་བྱ་བའི་ཆེད་དུ་དཔེ་དོན་རྟགས་གསུམ་གྱིས་ངོ་སྤྲད་ལ་སོགས་ཏེ
༣༣༨
ངོ་སྤྲོད་ཉི་ཤུ་རྩ་གཅིག་ཤེས་པར་བྱའོ
གངས་སམ་གཡའ་འམ་རྒྱ་མཚོ་ལས་བྱུང་བའི་མན་ཤེལ་དྲི་མ་མེད་པ་ཞིག་སྐར་ཁུང་གི་སྣང་བ་ལ་ཕྱར་ནས་བལྟས་ན་འོད་ཁ་དོག་ལྔ་ལྷུག་པར་འཆར་ཏེ
དེ་ཡང་གང་ཞེ་ན
བ་དོག་མཐིང་ག་དང་དཀར་པོ་དང
སེར་པོ་དང
དམར་པོ་དང
ལྗང་གུའོ
མན་ཤེལ་གཅིག་རྗེས་སུ་འཇུག་པའི་གང་ཟག་དེའི་མིག་གཡས་པར་ལག་པ་གཡས་པས་བཟུང་སྟེ
མིག་གི་སྟེང་དུ་བཞག་ན་སྣང་བ་མཐོང་བར་འགྱུར་རོ
ལག་པ་གཡོན་པས་མིག་གཡོན་པ་དགབ་པར་བྱའོ
དེ་ནི་དཔེའི་ངོ་སྤྲོད་དོ
དོན་དེ་བཞིན་དུ་རང་གི་སྙིང་གི་དཀྱིལ་ན་གནས་སོ
དེ་ནི་དོན་གྱི་ངོ་སྤྲོད་དོ
རྟགས་ཀྱི་ངོ་སྤྲོད་ནི་དང་གི་མཛུབ་མོས་མིག་མནན་ན
བོད་ཀྱི་ཐིག་ལེ་ཉའི་མིག་ལྟ་བུར་འཆར་རོ
དེ་ནི་རྟགས་ཀྱི་ངོ་སྤྲོད་དོ
ཆོས་ཀྱི་སྐུའི་ངོ་སྤྲོད་ནི་ཉི་མའི་དཀྱིལ་འཁོར་ལ་སྤྲད་དོ
༣༣༩
ལོངས་སྤྱོད་རྫོགས་པའི་སྐུའི་ངོ་སྤྲོད་ནི
དེ་བཞིན་གཤེགས་པའི་སྐུ་རས་ལ་བྲིས་པ་རང་གི་མདུན་དུ་བཞག་སྟེ
ཤིལ་མིག་གི་སྟེང་དུ་བཞག་ནས་མིག་ནམ་མཁའ་ལ་བལྟས་ན
ལོངས་སྤྱོད་རྫོགས་པའི་སྐུ་ཁ་མིག་རྣ་བ་ཅན་མཐོང་བར་འགྱུར་རོ
དེ་བཞིན་དུ་ལོངས་སྤྱོད་རྫོགས་པའི་སྐུའི་ཞིང་ཁམས་པར་མདོ་ལ་འཆར་བ་ངོ་ཤེས་པར་གྱིས་ཤིག
སྤྲུལ་པ་སྐུའི་ངོ་སྤྲོད་ནི
ཆོས་ཅན་མཚན་མར་སྣང་བ་རང་གི་རིག་པའི་ཆོ་འཕྲུལ་དུ་ཤེས་པར་གྱིས་ཤིག
ཆོས་ཉིད་རང་གི་རིག་པ་འོད་ཟེར་གྱི་ཕུང་པོར་ངོ་ཤེས་པར་གྱིས་ཤིག
དེ་ནི་རྣམ་རྟོག་བག་ཆགས་ཀྱི་སྦུབས་འདི་ཉིད་མ་བོར་བ་ལ་ངོ་ཤེས་པར་གྱིས་ཤིག
དེ་ནི་སྤྲུལ་པ་སྐུའི་ངོ་སྤྲོད་དོ
རྩའི་གཅུན་ཐབས་ཀྱི་ས་སྣང་བ་རང་ལུགས་སུ་འཆར་བའི་ངོ་སྤྲོད་ནི
འཆི་བདུད་ཀྱི་སྒོ་ནས་ཡེ་ཤེས་ཀྱི་རླུང་འགྱུ་བའི་ལམ་གཉིས་གནས་པས
ལམ་དེ་གཉིས་རྩ་རྒྱུ་བའི་གྲོང་ཁྱེར་ན་ཡོད་པའི་བདུད་ཀྱི་སོ་བ་མིག་གཉིས་འགེག་ཏུ་གཞུག་གོ
ལམ་དེ་གཉིས་བཀགས་ས་མ་དག་འཁྲུལ་པའི་སྣང་བ་འདི་འགགས་སོ
དེའི་ཚེ་དུས་མ་འགྱུར་བར་སྣང་བ་འགྱུར་རོ
བློན་པོ་བཙོན་དུ་ཟིན་ནོ
༣༤༠
བློན་པོ་བཅོན་དུ་ཟིན་ནས
ཁྱི་རྐུན་སྒོར་ཕྱུང་ངོ
ཁྱི་རྐུན་སྒོར་ཕྱུང་བས་རྒྱལ་པོ་གདན་ལ་བཞུགས་སོ
རྒྱལ་པོ་གདན་ལ་བཞུགས་པས
ཡེ་ཤེས་རྟོག་མེད་དུ་གསལ་ལོ
རྟོག་མེད་དུ་ངོས་ཟིན་པས་ཆོས་སྐུ་རང་ལུགས་སུ་གནས་སོ
ཆོས་སྐུ་རི་ངང་ལ་བཞག་པས་འཁྲུལ་སྣང་དག་སྣང་དུ་འཆར་རོ
འཆར་སྒོ་གང་ནས་འཆར་ན
ནམ་མཁའི་མཐོངས་ཁུང་གི་སྒོ་ནས་འཆར་རོ
དེ་ཡང་འཆར་ལུགས་གསུམ་དུ་འཆར་རོ
སངས་རྒྱས་ཀྱི་ཞིང་ཁམས་རྣམ་པར་དག་པ་འཆར་བ་དང
ཞིང་ཁམས་དེའི་ཐིག་ལེ་དང་ཐིག་ཕྲན་དུ་འཆར་བ་དང
ཚོམ་བུ་ལྟར་འཆར་བའོ
ཚོམ་བུ་ལ་གཉིས་ཏེ
ཞིང་ཁམས་ཀྱི་ཚོམ་བུར་འཆར་བ་དང
སྐུའི་ཚོམ་བུར་འཆར་བའོ
སྐུའི་ཚོམ་བུ་འཆར་བ་ལ་གསུམ་སྟེ
སྐུ་མང་ཉུང་ངུ་འཆར་བ་དང
བཞུགས་ཚུལ་ཅི་ལྟར་བཞུགས་ནས་འཆར་བ་དང
སྐུ་མདོག་ཅི་ལྟར་འཆར་བའོ
ཞིང་ཁམས་ཚོམ་བུ་ནི་ལྔ་ལྡན་དུ་འཆར་རོ
སྐུ་ཉུང་བར་འཆར་བ་ནི་རྣམ་སྣང་གཅིག་བུར་ཡང་འཆར་རོ
འོད་དཔག་མེད་གཅིག་པུར་ཡང་འཆར་རོ
རིགས་ལྔ་འགྲེའོ
མང་བར་འཆར་བ་ནི
༣༤༡
རིགས་ལྔ་དུས་གཅིག་ལ་ཡང་འཆར་རོ
ཡུམ་ལྔ་སྟེ་བཅུ་རུ་ཡང་འཆར་རོ
བཅུ་གཅིག་བཅོ་ལྔ་ལ་སོགས་པར་ཡང་འཆར་རོ
བཞུགས་ཚུལ་ནི
ལོངས་སྐུ་ཁ་མིག་རྣ་བ་ཅན་མེ་ལོང་གི་གཟུགས་བརྙན་ལྟར་སྣང་ལ་རང་བཞིན་མེད་པ་ལ
ནམ་མཁའ་འཇའ་ཚོན་ལྟར་མ་འདྲེས་ཡོངས་སུ་རྫོགས་པས
མེ་ལོང་ལ་ཉི་མ་ཤར་བ་ལྟར་གསལ་ལ་རྟོས་མེད་པ
གདན་ཁྲི་དང
དབུ་རྒྱན་དང
ཕྱག་མཚན་དོ་ཤལ་ཐམས་ཅད་དང་ལྡན་པའི་སྐུ་མཉམ་པ་སྐྱིལ་ཀྲུང་དུ་བཞུགས་ནས་འཆར་རོ
སྐུ་མདོག་ཏུ་འཆར་བ་ནི
རྣམ་སྣང་ཡང་མཐིང་ག་ཁོ་ནའི་བདག་ཉིད་དུ་མི་བཞུགས
རྡོ་རྗེ་སེམས་དཔའ་ཡང་སྐུ་མདོག་དཀར་པོའི་རང་བཞིན་དུ་མི་བཞུགས་པ་དེས་འགྲེ་བའི
རྣམ་སྣང་ཡང
མཐིང་ག་དང
དཀར་པོ་དང
དམར་པོ་དང
སེར་པོ་དང
ལྗང་ཇུ་སྟེ
ཁ་དོག་ལྔ་ལྡན་དུ་འཆར་རོ
སེམས་ཅན་རང་རྒྱུད་པ་རྣམས་ལ་ངོ་སྤྲོད་གསུམ་བྱས་ན་དེ་བཞིན་དུ་འཆར་རོ
ངོ་སྤྲོད་བྱས་ནས་དེའི་དོན་ཉམས་སུ་བླངས་པས་རྟོགས་པའི་དོན་ཡང་འཁྲུལ་སྣང་ཐམས་ཅད་དག་སྣང་དུ་འཆར
དག་སྣང་ཐམས་ཅད་ལོངས་སྤྱོད་རྫོགས་པའི་སྐུ་ཁ་མིག་རྣ་བ་ཅན་གྱིས་གང་ནས་ངང་ལ་འཆར་རོ
༣༤༢
དེ་རྣམས་བདུན་པོ་ནི་འོད་ཀྱི་ངོ་སྤྲོད་ཅེས་བྱའོ
ཡེས་ཤེས་ཀྱི་ངོ་སྤྲོད་གང་ཞེ་ན
ཆོས་དབྱིངས་ཀྱི་ཡེ་ཤེས་ཀྱི་ངོ་སྤྲད་ནི་མཁར་གཞོང་གི་བཅུད་ལ་བརྟགས་པ་སྟེ་མཁར་གཞོང་ལེགས་པའི་ནང་དུ་ཆུ་དངས་མས་བཀང་སྟེ
མིག་གི་ཐོག་ཏུ་གསལ་བྱེད་ཀྱི་མེ་ལོང་བཞག་ན
ཐིག་ལེ་དང་ཐིག་ཕྲན་གྱི་ཚུལ་དུ་འཆར་ཏེ
དེ་ལས་ཀྱང་འོད་ཟེར་མཚོན་ཆའི་རྩེ་མོ་བཞིན་དུ་འཕྲོའོ
དེ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་སྤྲོད་དོ
མེ་ལོང་ལྟ་བུའི་ཡེ་ཤེས་ཀྱི་ངོ་སྤྲོད་གང་ཞེ་ན
མེ་ལོང་གཉིས་ཀྱི་བར་དུ་རྡུལ་ཚོན་གྱིས་དཀྱིལ་འཁོར་བྲི་སྟེ
ཕར་འགྲམ་ཚུར་འགྲམ་གཉིས་སུ་མེ་ལོང་རེ་གཟུག་སྟེ
དེ་ལ་བལྟས་ན་སྣང་བ་གཉིས་འཆར་རོ
དེ་ནི་མེ་ལོང་ལྟ་བུའི་ཡེ་ཤེས་ཀྱི་ངོ་སྤྲོད་དོ
མཉམ་པ་ཉིད་ཀྱི་ཡེ་ཤེས་ཀྱི་ངོ་སྤྲོད་གང་ཞེ་ན
ཆུའི་ཟླ་བ་ལ་ངོས་བཟུང་ངོ
དེ་ནི་མཉམ་པ་ཉིད་ཀྱི་ཡེ་ཤེས་ཀྱི་ངོ་སྤྲོད་དོ
སོ་སོར་རྟོག་པའི་ཡེ་ཤེས་ཀྱི་ངོ་སྤྲོད་ནི
མར་མེ་ལ་ངོས་བཟུང་ངོ
དེ་ནི་སོ་སོར་རྟོགས་པའི་ཡེ་ཤེས་ཀྱི་ངོ་སྤྲོད་དོ
བྱ་བ་གྲུབ་པའི་ཡེ་ཤེས་ཀྱི་ངོ་སྤྲོད་ནི
མན་ཤེལ་དྲི་མ་མེད་པ་ལ་ངོས་བཟུང་ངོ
དེ་ནི་བྱ་བ་གྲུབ་པའི་ཡེ་ཤེས་ཀྱི་ངོ་སྤྲོད་དོ
༣༤༣
མི་གནས་པའི་ཡེ་ཤེས་ཀྱི་ངོ་སྤྲོད་ནི
ནམ་མཁའི་ཁམས་ཀྱི་འཇའ་ཚོན་ལ་ངོས་བཟུང་ངོ
དེ་ནི་མི་གནས་པའི་ཡེ་ཤེས་ཀྱི་ངོ་སྤྲོད་དོ
ཡོངས་སུ་རྫོགས་པའི་ཡེ་ཤེས་ཀྱི་ངོ་སྤྲོད་ནི
ནམ་མཁའ་སྤྲིན་མེད་ལ་ངོས་བཟུང་ངོ
བདུན་པོ་དེ་ཡེ་ཤེས་ཀྱི་ངོ་སྤྲོད་དོ
ད་ནི་རིག་པའི་ངོ་སྤྲོད་བསྟན་པ་ནི
རིག་པ་གཞོན་ནུ་བུམ་པ་སྐུའི་ངོ་སྤྲོད་ནི
མི་གོས་དཀར་དམར་ཁ་དོག་སྣ་ཚོགས་གྱོན་པ་གཅིག་བདག་གི་མདུན་དུ་བཞག་ནས
མིག་གི་སྟེང་དུ་རིན་པོ་ཆེ་བཞག་སྟེ
མིག་ནམ་མཁའ་ལ་བཏེགས་ན
དེ་བཞིན་གཤེགས་པ་ཞི་བའི་སྐུ་མཐོང་བར་འགྱུར་རོ
དེ་ནི་རིག་པ་གཞོན་ནུ་བུམ་སྐུའི་ངོ་སྤྲོད་དོ
རིག་པ་གཞོན་ནུ་དཔའ་བོ་སྟོབས་ལྡན་གྱི་ངོ་སྤྲོད་ནི
ཁྱིམ་མུན་པ་ནག་པོར་མི་གོས་ནག་པོ་གོན་པ་རང་གི་མདུན་དུ་བཞག་ནས
གོང་གི་ལྟར་བལྟས་ན་དེ་བཞིན་གཤེགས་པ་ཁྲོ་བོའི་སྐུ་མཐོང་བར་འགྱུར་རོ
དེ་ནི་རིག་པ་དཔའ་བོ་སྟོབས་ལྡན་གྱི་ངོ་སྤྲོད་དོ
རིག་པ་གཞི་གནས་ཀྱི་ངོ་སྤྲོད་ནི
རྒྱ་མཚོ་དངས་པ་ལ་ངོས་བཟུང་ངོ
དེ་ནི་གཞི་གནས་ཀྱི་ངོ་སྤྲོད་དོ
རིག་པ་ཀུན་ཏུ་གསལ་བའི་ངོ་སྤྲོད་ནི
༣༤༤
ཉི་མ་དང་ཟླ་བ་ལ་ངོས་བཟུང་ངོ
དེ་ནི་རིག་པ་ཀུན་ཏུ་གསལ་བའི་ངོ་སྤྲོད་དོ
རིག་པ་གཉིས་མེད་ཀྱི་ངོ་སྤྲོད་ནི
བུམ་པའི་སྐུ་ལ་ངོས་བཟུང་ངོ
དེ་ནི་རིག་པ་གཉིས་མེད་ཀྱི་ངོ་སྤྲོད་དོ
རིག་པ་དྲི་མ་དང་བཅས་པའི་ངོ་སྤྲོད་ནི
ཉི་ཟླ་སྤྲིན་གྱིས་བསྒྲིབས་པ་ལྟ་བུ་ལ་ངོས་བཟུང་ངོ
དེ་ནི་རིག་པ་དྲི་མ་དང་བཅས་པའི་ངོ་སྤྲོད་དོ
རིག་པ་ཅི་ཡང་མི་གནས་པའི་ངོ་སྤྲོད་ནི
མིག་བར་སྣང་ལ་བལྟས་པས་ཤེས་པར་བྱའོ
དེ་ནི་རིག་པ་ཅི་ཡར་མི་གནས་པའི་ངོ་སྤྲོད་དོ
དེ་ལྟར་བདུན་ནི་རིག་པའི་ངོ་སྤྲོད་དོ
དེ་ལྟར་ཉི་ཤུ་རྩ་གཅིག་རྫོགས་ནས་རིགས་ཀྱི་བུ་དེ་མྱ་ངན་ལས་འདའ་བའི་ཚེ
རིག་པ་མིག་ནས་ལམ་བྱུང་ནས་བར་དོའི་སྣང་བ་ལ་འཇུག་གོ
དེ་ཡང་གང་ཞེ་ན
ཞག་ལྔ་འདས་པའི་འོག་ཏུ་རང་གི་ཐུགས་ཀ་ནས་ཐུགས་རྗེའི་ཐག་པ་ཞེས་ཀྱང་བྱ
ཡེ་ཤེས་མཐོང་བ་ཞེས་ཀྱང་བྱ
རིག་པའི་རྟོད་ཕུར་ཞེས་ཀྱང་བྱ་བ་འོད་ཟེར་ཕྲ་བ་རྟ་རྔའི་ཆ་ཙམ་ཞིག་བྲེང་གིས་འོད་སྟེ
དེའི་དུས་སུ་བག་ཆགས་ཀྱི་སྦུབས་མེད་ཀྱང་ཡོད་པ་སྙམ་འོང་བས
མིག་ནམ་མཁའ་ལ་བཏེགས་ཏེ་བལྟས་པས
ནམ་མཁའི་དཀྱིལ་ན་འོད་ཀྱི་ཚོམ་བུ་ལྔ་བཀྲ་ས་ལེ་མཐོང་སྟེ
དེའི་དུས་སུ་ཡིད་ཆེས་པ་མའི་པང་དུ་པུ་འཇུག་པ་ལྟ་བུའི་གདམས་ངག་དྲན་པར་གྱིས་ཤིག
༣༤༥
མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་དྲན་པར་གྱིས་ཤིག
དེ་ནས་རིག་པ་འོད་ཀྱི་ཚོམ་བུ་ལ་ཐིམ་ནས་འགྲོ་སྟེ
དེའི་དུས་སུ་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་གདམས་ངག་དྲན་པར་གྱིས་ཤིག
དེ་ནས་བརྟན་པ་ཐོབ་སྟེ
ཞག་ཉི་ཤུ་རྩ་གཅིག་ནས་སྤྲུལ་པའི་སྐུ་འབྱིན་ནུས་པའོ
ཕྱི་ནང་གསང་གསུམ་གྱི་དབང་རྫོགས་པ་རྣམས་ལ་དེ་བཞིན་དུ་བྱོས་ཤིག
སར་བ་དྷར་མ
ཧ་ཐ་ཡ
ཞེས་བརྗོད་ནས
སྤྱན་ལྡོག་པས་ཐུགས་ན་འོད་ཟེར་གྱི་ཕུང་པོ་ལྔ་འཕྲོས་ཏེ
འཇིག་རྟེན་གྱི་ཁམས་ཐམས་ཅད་གང་བར་མཛད་དེ་ཡང་འདི་སྐད་ཅེས་བསྒྲགས་སོ
སར་བ་དྷར་མ་ཨ་པ་མ་ཀ་མ་དེ་ནི་ཞུ་པ་ཡ་འདི་མ་ཡ
ཨོམ་ཨོམ
ཨོམ་མ་ཨོམ་པྱ་ཀེ་ཏ་ནི་ཞུ་པ་ཡ་ས་འདི་དྷར་མ་ཡ
ཨོམ་ན་ཨོམ་ན་མ་མེའུ་འུའི
༣༤༦
ཆི་ཏུ་ཏིའུ་ཨ་ཨ་མ་མཀ་ཤུ་ཨཀ་ཤུ་ཨ་ཨ་ཧུམ་ཧ་ཨ་ཨ་ཨ་མ
དེ་སྐད་ཅེས་ཆོ་འཕྲུལ་གྱི་སྒྲ་ཡི་གེ་ཞེས་བྱ་བ
སྒྲ་ཐམས་ཅད་གཏན་ལ་འབེབས་པ
རྫོགས་པ་ཆེན་པོའི་དོན་ཕྱིན་ཅི་མ་ལོག་པར་སྟོན་པའི་དོན་སྒྲ་ལ་བསྡུས་ཏེ་བཤད་པའོ
ཞེས་བཀའ་སྩལ་ཏོ
དེ་ནས་ཡང་གསང་བའི་བདག་པོ་ལ་སོགས་ཏེ་གནོད་སྦྱིན་གྱི་འཁོར་དང་བཅས་པ་རྣམས་ངོ་མཚང་མཆོག་ཏུ་སྐྱེས་ཏེ
ཐབས་ཅིག་ཏུ་ཐལ་མོ་སྦྱར་ཏེ་བསྟོད་པ
ཨ་ཧམ་ཨེ་མ་ཧོ
བཅོམ་ལྡན་མགོན་པོ་རྡོ་རྗེ་འོད་དཔག་མེད
འགྲོ་བ་ཕ་རོལ་སྒྲོལ་མཛད་སྟོབས་ཀྱི་བདག
འགྲོ་བའི་གཉེན་བཤེས་གཙུག་གི་ནོར་བུ་ཅན
མ་རིག་མུན་ཁམས་འཇོམས་ལ་ཕྱག་འཚལ་བསྟོད
ཅེས་པ་སྟོད་ནས་རང་རང་གི་སྟན་ལ་མངོན་པར་འདུག་པོ
༣༤༧
དེ་ནས་ཡང་བཀའ་སྩལ་པ
ཀྱེ་མ་འདུས་པའི་འཁོར་རྣམས་ཉོན་ཅིག
ང་ཡོངས་སུ་མྱ་ངན་ལས་འདས་པའི་འོག་ཏུ་མ་འོངས་པའི་སེམས་ཅན་རྣམས་ལ་ཕྱི་ནང་གསང་བ་གསུམ་གྱི་དབང་རྫོགས་པར་གྱིས
དོན་དེ་ལྟ་བུ་མ་ནོར་བར་སྟོན་ཅིག
དེ་ནི་དེ་ལྟར་བསྒོམ་དུ་མེད་དོ
སྒོམ་བྱེད་མ་འགགས་པའོ
བསྒོམ་རྒྱུ་ནི་མི་དམིགས་པའོ
དོན་དེ་ལྟ་བུ་འདས་པ་དང་མ་འོངས་པ་རྣམས་ཀྱིས་ཀྱང་སྟོན་ནུས་རེ་ཀན
ཞེས་བརྗོད་ནས་མི་སྣང་བའི་ངང་དུ་གཤེགས་སོ
ཞེས་རྒྱུད་ཆེན་པོ་རྡོ་རྗེ་སེམས་དཔའ་སྙིང་གི་མེ་ལོང་གསང་བའི་རྒྱུད་ཅེས་བྱ་བ
གབ་པ་མངོན་དུ་ཕྱུང་བ་ལ་སྟན་པ་ལས
གནས་ལུགས་དང་རྟོགས་ལུགས་བསྟན་པའི་ལེའུ་སྟེ་གསུམ་པའོ
དེ་ནས་འཁོར་རྣམས་སྡུག་བསྔལ་གྱིས་གཟིང་བའི་ཡིད་མི་བདེ་བར་གནས་པ་ལས
དེ་རྣམས་ཀྱི་ནང་ནས་གསང་བའི་བདག་པོ་ལག་ན་རྡོ་རྗེ་འཛིན་པ་ཆེན་པོས་འདི་སྐད་ཅེས་གསོལ་ཏོ
ཀྱེ་ཧུད་སྡུག་བསྔལ་གྱིས་ཟིན་པའི་འཁོར་རྣམས་ལ
བསྟན་པའི་སྒྲོན་མེ་བྱ་ཕྱིར་རྒྱུད་ཆེན་པོ་བསྟན་དུ་གསོལ
རྒྱལ་བའི་སྐུ་མཆོག་འཁོར་རྣམས་ལ་བསྟན་དུ་གསོལ
༣༤༨
བ་ཛྲ་མ་ཡ་ཨ་ཧམ་ཨ་ཧམ
ཞེས་གསོལ་པས
བཅོམ་ལྡན་འདས་ཀྱི་སྐུ་བར་སྣང་ལ་མངོན་པར་གྱུར་ནས
སེང་གེའི་ཁྲིའི་སྟེང་ན་གདན་དང་བཅས་པ་བཞུགས་ཚུལ་ནི་སྐུ་ཞི་བའི་ཆ་ལུགས་སུ་བཞུགས་སོ
རྡོ་རྗེའི་རིགས་ཀྱི་འཁོར་སེམས་དཔའ་དང
སེམས་མ་དང
བྱང་ཆུབ་སེམས་དཔའ་དཔག་ཏུ་མེད་པ་རྣམས་ཀྱང་འོད་ལ་སྤྲུལ་ནས་བཞུགས་སོ
མ་མོ་དང་གནོད་སྦྱིན་གྱི་འཁོར་རྣམས་ཀྱང་སྡུག་བསྔལ་ཆེན་པོ་ལས་གྲོལ་བར་གྱུར་ཏོ
དེ་ནས་འཁོར་རྣམས་ཀྱིས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
རྒྱུད་ཆེན་ངེས་ཚིག་གསུང་དུ་གསོལ
ཞེས་ཞུས་སོ
རྡོ་རྗེ་འཆང་གིས་བཀའ་སྩལ་པ
ཀྱེ་ཀྱེ་འདུས་པའི་འཁོར་རྣམས་ཉོན
ཐམས་ཅད་འབྱུང་བའི་བྱང་ཆུབ་ཡིད་བཞིན་གཏེར
མ་གྲོལ་གྲོལ་བར་བྱེད་པའི་རྒྱུད་ཆེན་འདི
རྡོ་རྗེ་དམ་ཚིག་གསེར་གྱི་ལུ་གུ་རྒྱུད
སྙིང་པོའི་དོན་འགྲོལ་སྙིང་གི་རྒྱུད་ཆེན་འདི
དུ་མ་གཅིག་ཏུ་བསྡུས་པའི་དོན་གྱི་མཆོག
དོན་གྱི་འབྲེལ་པ་གསང་སྔགས་བདག་པོས་འཆང
སྙིང་གི་དཀྱིལ་ན་རིག་པ་བྱང་ཆུབ་སེམས
དེ་ཡོད་ཕྱིར་ན་སྙིང་གི་རྒྱུད་ཅེས་གྲགས
༣༤༩
མི་འགྱུར་རྡོ་རྗེའི་དོན་ཉིད་རྟག་པར་གཏེར་འཆང་བས
རྡོ་རྗེའི་རྒྱུད་དུ་འགྲོ་བ་ཡོངས་ལ་ཁྱབ་པར་གྲགས
གཞན་གྱི་རྣམ་རྟོག་བསལ་པ་སེམས་དཔའི་རྒྱུད་ཅེས་གྲགས
རྒྱུད་གཞན་རྣམས་ཀྱི་དོན་ཆེན་པོ
འདི་ནས་འབྱུང་བས་མེ་ལོང་རྒྱུད་ཅེས་གྲགས
རྒྱུད་ཆེན་པོ་ཡི་གཏན་ཚིགས་ཡང་དག་བཀྲོལ་ནས་བཤད་པ་བློའི་གཏིང་དུ་གོ
དོན་ཆེན་མཚོན་པར་འགྱུར་བའི་ཡི་གེ་དྲུག་བཤད་ལེགས་པར་ཡིད་ལ་ཟུང
ཆོས་ཉིད་སྐྱེ་བ་མེད་པ་མཚོན་པའི་ཡི་གེ་ཨ
ཨ་ཏི་སྐྱེ་མེད་སྤྲོས་པ་མི་དམིགས་ཤིང
མ་སྐྱེས་པས་ན་ཡི་གེ་ཨ་ལ་རྫོགས
སྐྱེ་བྲལ་དངོས་པོར་མ་གྲུབ་ཡི་གེ་ཨ་འདི་གསང
འགག་མེད་དོན་ལ་མི་གནས་ཡི་གེ་ལ
འགྱུར་མེད་སྟོང་པའི་ངང་ལས་ཡི་གེ་འབྱུང་ཞིང
འགག་མེད་རྟོག་བྲལ་ཡི་གེ་འ་ལ་རྫོགས
སྐྱེ་མེད་ངང་ནས་འགག་མེད་ཡི་གེ་འ་ནི་འདི་གསང
སྐྱེ་བ་མེད་པར་སྣང་ཚུལ་ཡི་གེ་ཧ་ནི་འགྱུར་མེད་ངང་ལས་སྐྱེ་སྣང་མ་འདྲེས་རྫོགས
རིག་པའི་ཀློང་ནས་ཧོ་འཕྲུལ་སྟོན་པའི་ཡི་གེ་ཧ
༣༥༠
རང་ལ་གནས་པའི་ཡེ་ཤེས་དབྱིངས་སུ་བཟློག་མཛད་ཡི་གེ་ཧ་འདི་གསང
དག་པའི་ཞིང་དུ་སྒྲོལ་མཛད་ཡི་གེ་ཤ
འཁྲུལ་པའི་སྣང་བ་བཟློག་མཛད་ཡི་གེ་ཤ
སྒྲ་དང་ཐ་སྙད་ཐམས་ཅད་ཡི་གེ་ཤ་ལ་རྫོགས
སྐྱེ་མེད་དབྱིངས་ནས་སྒྲོལ་མཛད་ཡི་གེ་ཤ་འདི་གསང
འགྱུར་མེད་ས་ལ་གནས་པར་བྱེད་པའི་ཡི་གེ་ས
ཡེ་ཤེས་བླ་མའི་ས་ཆེན་བགྲོད་པར་བྱེད་པའི་ཡི་གེ་ས
ས་རྣམས་བགྲོད་མེད་ཡི་གེ་ས་ལ་རྫོགས
ལྷུན་གྲུབ་འགྱུར་མེད་ངང་ལ་གནས་བྱེད་ས་འདི་གསང
ཡི་གེ་མ་ནི་ཆོས་ཉིད་འབྱུང་བའི་གཏེར
རིག་པ་མ་བཅོས་ཡི་གེ་མ་ཡི་དང
ཀུན་གཞི་མ་བཅོས་ཡི་གེ་མ་ཡི་ངང་ལ་རྫོགས
༣༥༡
གསང་སྔགས་དོན་རྟོགས་ཡི་གེ་མ་འདི་གསང
ཡི་གེ་དྲུག་གི་དོན་རྟོགས་གསང་སྔགས་རྒྱུད་ཆེན་འགྲོལ
ཡི་གེ་དྲུག་གི་དོན་ལ་གནས་པའི་སྐྱེས་བུ་མྱ་ངན་འདས
རྟོགས་བྱེད་རྒྱལ་པོ་ཡི་གེ་སྒྲ་འགྱུར་དྲུག
གསང་སྔགས་ཐམས་ཅད་ཡི་གེ་དྲུག་ལ་རྫོགས
ཞེས་ཡི་གེ་དྲུག་གི་དོན་བཀའ་སྩལ་ཏོ
དེ་ནས་ཡང་གསང་བའི་བདག་པོས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
ཡི་གེའི་དོན་སྦྱོར་དེ་ལྟར་ན
དབང་གི་བྱེ་བྲག་གསུང་དུ་གསོལ
ཞེས་ཞུས་སོ
རྡོ་རྗེ་འཆང་གིས་བཀའ་སྩལ་པ
ཨེ་མ་ཧོ་རྡོ་རྗེ་འཛིན་པ་ཉོན
དབང་ལ་རྣམ་པ་གསུམ་ཡོད་དོ
ཕྱི་དང་ནང་དང་གསང་བའོ
ཕྱི་ནི་རྡུལ་ཚོན་དཀྱིལ་འཁོར་ཏེ
ཤ་ཁྲག་སྣ་ཚོགས་གཏོར་མ་དང
༣༥༢
རིན་ཆེན་རྫེས་དང་མན་ཤེལ་དང
སྣ་ཚོགས་མཆོད་པས་མཛེས་པའོ
དཀྱིལ་འཁོར་འདོམ་གད་གྲུ་བཞི་ཡི
ཐིག་ནི་གཞུང་དང་མཐུན་པར་གདབ
ས་ཚོན་ལྔ་ལ་འབྲུ་ལྔ་བསྐྱེད
དབུས་སུ་མཐིང་ནག་གྲུ་གསུམ་བྲི
ཐ་མ་ཕོ་བྲང་ཟླུམ་པོ་བྲི
དེ་ཡི་ཕྱིར་རིམ་འཁོར་ལོ་རྩིབས་བརྒྱད་ལྡན
པ་ཉ་ཙ་རེ་ཁ་རྩིགས་པ་ལྔ
མུན་པའི་བ་དན་དག་དང་ལྡན
གྲུ་ཆད་ལྗང་གུ་སྒོ་བཞི་དག་དང་ལྡན
ཕྱི་རིམ་ཟླུམ་པོ་རྡོ་རྗེའི་ར་པར་བཅས
གྲུ་གསུམ་སྟེང་དུ་ཐོད་པ་གསུམ་བཞག་སྟེ
ཐོད་པའི་ནང་དུ་ཤ་ཁྲག་སྣ་ཚོགས་ཟླུགས་ཡ་བཞག
ཟླ་གམ་གསུམ་གྱི་སྟེང་དུ་བཀྲ་ཤིས་བུམ་པ་གསུམ
དེའི་ནང་དུ་སྨན་སྣ་ཚོགས་བླུ་གསལ
དར་དམར་པོས་མགུལ་ཆིངས་བྱའོ
རྩིབས་བརྒྱད་སྟེང་དུ་ཁྲོ་མཆོག་བརྒྱད་བཞག
༣༥༣
གྲུ་ཆད་སྟེང་དུ་རིན་ཆེན་རྫས་བརྒྱད་བཞག
མེ་ལོང་ལྔ་དང་རྨ་བྱ་ལྔ་གཞག་པར་བྱ
དེ་ཡི་སྒྲུབ་ཐབས་བཞིན་དུ་ཤེས་པར་བྱ
རྫས་ཀྱི་དབང་རྣམས་རིམ་བཞིན་བསྐུར
བསྐུར་བའི་གནས་ནི་ཚངས་པའི་བུ་གའོ
དེ་ལྟར་ཕྱི་ནང་གི་དབང་རྫོགས་ནས
གསང་བའི་དབང་ལ་འཇུག་པར་བྱའོ
གཟུངས་མ་མཚན་དང་ལྡན་པ་ལ
ཡི་གེ་གསུམ་དང་གཏོར་མ་ནི
གསང་བ་དཀར་དམར་འདྲེས་པ་དེ
མེ་ལོང་མ་ཆགས་མ་གས་པས
བླངས་ཏེ
སློབ་མ་ལ་ལ་དབང་བསྐུར
༣༥༤
དེ་ལྟར་དབང་གསུམ་རྫོགས་ནས་ནི
གང་དུ་བསྟན་པའི་གདམས་ངག་གདབ་པར་བྱ
དབང་རྫོགས་རྣལ་འབྱོར་སྐུ་གསུམ་ངེས་པར་འགྲུབ
གསང་སྔགས་དོན་མཚོན་དབང་གིས་སྩལ་བར་བྱ
དབང་མཆོག་ཐོབ་པའི་སྐྱོན་བསྟན་པའི་རྣལ་འབྱོར་ནི
དཔེར་ན་མཉན་པོ་ལག་སྐྱ་མེད་པ་བཞིན
ཕ་རོལ་སྒྲོལ་བར་ག་ལ་ནུས
དབང་མཆོག་ཐོབ་ན་གསང་སྔགས་མ་བསྒྲུབས་འགྲུབ
གསང་སྔགས་དབང་ལ་མ་བརྟེན་འགྲུབ་པར་ག་ལ་འགྱུར
དཔེར་ན་ཕ་རོལ་སྒྲོལ་བའི་གྲུ་བཞིན་ནོ
དབང་མཆོག་སྟོན་པའི་རྡོ་རྗེ་སློབ་དཔོན་ལ
ནོར་བུ་རིན་ཆེན་གསེར་དངུལ་དབྱིག་གིས་མཆོད
༣༥༥
རྟ་དང་གླང་པོ་ལ་སོགས་དབུལ་བར་བྱའོ
ཕ་མ་བུ་སྨད་བཅས་པ་དབུལ་བར་བྱ
གསང་བའི་བདག་པོས་ཡང་ཞུས་པ
ཀྱེ་ཀྱེ་བཅོམ་ལྡན་སྟོབས་ཀྱི་བདག
དབང་གི་བྱེ་བྲག་དེ་ལྟར་ན
དམ་ཚིག་བྱེ་བྲག་གསུང་དུ་གསོལ
རྡོ་རྗེ་འཆང་གིས་བཀའ་སྩལ་པ
ཀྱེ་མ་གསང་བདག་ངེས་པར་ཡིད་ལ་ཟུང
དམ་ཚིག་བྱེ་བྲག་བསམ་མི་ཁྱབ
མདོར་བསྡུས་བཤད་ཀྱིས་ལེགས་པར་ཡིད་ལ་ཟུང
རྡོ་རྗེ་ཐིག་པའི་དམ་ཚིག་ནི
དཔེར་ན་ས་གཞི་ལྟ་བུའོ
ཐམས་ཅད་འབྱུང་བར་བྱེད་ཅིང་གཞི་མའི་མཆོག་ཏུ་འགྱུར
དེ་ཡང་བསྲུང་ཐབས་བསམ་གྱིས་མི་ཁྱབ་དམ་ཚིག་རྣམས
བསྲུང་རྒྱུ་མི་དམིགས་སྲུང་བྱེད་ཐབས་མཁས་སྤྱོད
ཉམས་ན་མི་བཞིན་ཐམས་ཅད་སྲེག་པར་བྱེད
གསང་སྔགས་དོན་སྟོང་རྡོ་རྗེ་སློབ་དཔོན་ལ
རིན་ཆེན་གསེར་ནི་རང་ལུས་ཙམ་ཞིག་ཕུ་ལ་གྱུར་ཀྱང
༣༥༦
དམ་ཚིག་འཆལ་བར་གྱུར་ན་སྲེག་པར་བྱེད
དཔེར་ན་མེ་བཞིན་དྲོ་བར་གྱུར་བ་ལ
དེ་བཞིན་ཆུ་ཡིས་མེ་བསང་དྲོ་བ་མེད་པ་བཞིན
དམ་ཚིག་མེ་ཡི་ཕུང་པོ་ལྟ་བུ་ལ
བསྲུངས་ན་བར་ཆད་སེལ་ཞིང་ཡེ་ཤེས་གྲོགས་སུ་འགྱུར
མ་བསྲུངས་ཉམས་ན་རྡོ་རྗེ་དམྱལ་བར་ལྟུང
དེ་བས་སྲོག་གི་ཕྱིར་ཡང་དམ་ཚིག་མི་བཏང་ངོ
སློབ་དཔོན་ཚད་མར་མ་གྱུར་སྤྲེལ་འདྲའི་ལུང
ལོག་པའི་ལམ་དུ་ཞུགས་ཤིང་གསང་སྔགས་འཆོལ་བར་སྦྱོང
དེ་ནི་ལོག་འདྲེན་ཡིན་པས་སྤང་པར་བྱ
མི་ཤེས་ང་རྒྱལ་ཆེ་ཞིང་བླུན་རྨོངས་བཅོམ་བུ་མཁན
ང་རྒྱལ་དྲེགས་པས་སྨྲ་ཞིང་མཆེད་ལ་རས་གཅོད་བྱེད
ངོ་ཚ་མེད་ཅིང་ཁྲེལ་མེད་བག་འཛེམ་མེད
གསང་སྔགས་སྣོད་དང་མི་ལྡན་གང་ཟག་སྤང་བར་བྱ
༣༥༧
ཡངས་ཤིང་རྒྱུད་ལ་མཁས་ཤིང་སྒྲུབ་ཐབས་དག་ལ་མཁས་གྱུར་པ
རྒྱུད་བཟང་ཞིང་རྟོགས་ཤིང་ལྟ་བ་དག་ལ་མཁས
གསང་སྔགས་རྒྱལ་པོ་རྡོ་རྗེ་ཨ་ལི་ཀ
ལུས་ཡོན་ཕུལ་ལ་རྟག་ཏུ་བསྟན་པར་བྱ
ང་རྒྱལ་དྲེགས་པ་མེད་ཅིང་ངང་གིས་ཤེས་པ་དལ
བཀའ་དྲིན་ཁྱད་དུ་མི་གསོང་གསང་སྔགས་དོན་ལ་སྦྱོར
ངེས་པར་དང་དང་ལྡན་ཞིང་གཏོང་ཕོད་དག་དང་ལྡན
རྡོ་རྗེའི་དོན་ལྡན་གསང་སྔགས་སྣོད་དུ་གསུངས
ཞེས་བཀའ་སྩལ་ཏོ
རྒྱུད་ཆེན་པོ་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས
གསང་བ་ཡང་ཁོལ་དུ་ཕྱུང་པ་དབང་དང་དམ་ཚིག་གེ་ལེའུ་སྟེ་བཞི་པའོ
༄༥
དེ་ནས་ཡང་བཅོམ་ལྡན་རྡོ་རྗེ་སེམས་དཔའ་ཉིད་ཀྱིས་སྙིང་གི་དཀྱིལ་འཁོར་གྱི་སྒོ་ཕྱི་ནས་འཁོར་རྣམས་ལ་ཡེ་ཤེས་ཀྱི་དཀྱིལ་འཁོར་འོད་གསལ་བའི་དོན་བསྟན་པའོ
༣༥༨
ཀྱེ་གྲོགས་པོ་དག་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ
རང་གི་རིག་པ་འོད་ལྔའི་རང་བཞིན་དུ་གནས་སོ
དེ་རྣམས་དོན་བཀྲོལ་བ་འདི་ལྟ་སྟེ
ཁྱབ་གདལ་འུབ་ཆུབ་རིག་པ་འོད་གསལ་སྐུ
འགྱུར་མེད་ཀློང་ཡངས་རིག་པ་འོད་གསལ་སྐུ
རྣམ་དག་དོན་སྤྱོད་ཀློང་ཡངས་རིག་པ་འོད་གསལ་སྐུ
ཁྱབ་གདལ་ཆེན་པོ་མི་འགྱུར་རིག་པ་འོད་གསལ་སྐུ
བརྗོད་མེད་བསམ་བྲལ་རིག་པ་ཆོས་ཀྱི་སྐུ
དཔག་ཏུ་མེད་པའི་ཡུལ་ལས་འདས་པ་རིག་པ་ཆོས་ཀྱི་སྐུ
འཛིན་པའི་སྤྱོད་ཡུལ་མ་ཡིན་རིག་པ་ཆོས་ཀྱི་སྐུ
ངོ་བོ་རང་བཞིན་ཐུགས་རྗེ་ལྡན་པས་རིག་པ་ཆོས་ཀྱི་སྐུ
བདེ་ཆེན་མ་འདྲེས་ཡོངས་སུ་རྫོགས་ལས་རིག་པ་ལོངས་སྤྱོད་སྐུ
གསལ་ལ་མ་འདྲེས་སོ་སོའི་མཚན་ཉིད་ལྡན་པས་རིག་པ་ལོངས་སྤྱོད་སྐུ
མཚན་དང་དཔེ་བྱད་ལྡན་པས་རིག་པ་ལོངས་སྤྱོད་སྐུ
རང་བཞིན་གཅིག་ལ་ཐ་དད་སྣང་བའི་རིག་པ་ལོངས་སྤྱོད་སྐུ
འགག་མེད་ཀློང་ནས་ཐུགས་རྗེ་འབྱིན་པའི་རིག་པ་སྤྲུལ་པའི་སྐུ
ཅིར་ཡང་གསལ་ཞིང་ཅིར་ཡང་རྟོགས་པས་རིག་པ་སྤྲུལ་པའི་སྐུ
མ་འགགས་ཡོངས་ལ་ཁྱབ་པས་རིག་པ་སྤྲུལ་པའི་སྐུ
༣༥༩
གསལ་འགྲིབ་མེད་ཅིང་འཛིན་རྟོག་མེད་པས་རིག་པ་སྤྲུལ་པའི་སྐུ
གཉིས་འཛིན་མཐའ་དང་བྲལ་བས་རིག་པ་ངོ་བོ་ཉིད་ཀྱི་སྐུ
འཛིན་པའི་ཡུལ་མེད་རིག་པ་ངོ་བོ་ཉིད་ཀྱི་སྐུ
ས་དང་ལམ་ལ་མི་གནས་རིག་པ་ངོ་བོ་ཉིད་ཀྱི་སྐུ
དངོས་པོ་གཟུང་དུ་མེད་པས་རིག་པ་ངོ་བོ་ཉིད་ཀྱི་སྐུ
བདེ་ཆེན་ཀློང་དུ་འགྱུར་མེད་གནས་པས་རིག་པ་ངོ་བོ་ཉིད་ཀྱི་སྐུ
དོན་དང་ལྡན་པས་རིག་པ་རྡོ་རྗེ་འཛིན་པའི་སྐུ
གསལ་ལ་མི་འགྱུར་ངང་ལ་གནས་པས་རིག་པ་རྡོ་རྗེ་འཛིན་པའི་སྐུ
འགྲོ་བ་ཀུན་ལ་གནས་པའི་རིག་པ་རྡོ་རྗེ་འཛིན་པའི་སྐུ
སྲ་ཞིང་བརྟན་པས་རིག་པ་རྡོ་རྗེ་འཛིན་པའི་སྐུའོ
དེ་ལྟར་སེམས་ཅན་ཐམས་ཅད་ཀྱི་རང་རྒྱུད་ལ་གནས་སོ
དེ་བཞིན་དུ་སྐུ་རྣམ་པ་ལྔ་པོ་དེའི་དོན་ཐུགས་སུ་ཆུ་གཅིག
སྐུ་ལས་ཡེ་ཤེས་འབྱུང་སྟེ
དེ་ཡང་གང་ཞེ་ན
རིག་པ་འགྱུར་མེད་ཆོས་དབྱིངས་ཡེ་ཤེས་དང
རིག་པ་རྒྱ་ཆད་ཕྱོགས་ལྷུང་མེད་པ་ཆོས་དབྱིངས་ཡེ་ཤེས་དང
རིག་པ་གཟུང་འཛིན་ཡུལ་ལས་འདས་པས་ཆོས་དབྱིངས་ཡེ་ཤེས་དང
རིག་པ་མུ་མཐའ་མེད་པས་ཆོས་དབྱིངས་ཡེ་ཤེས་དང
རིག་པ་གསལ་ལ་དངས་བས་མེ་ལོང་ཡེ་ཤེས་དང
༣༦༠
རིག་པ་མུ་ཁྱུད་ཟླུམ་པོར་གནས་པས་མེ་ལོང་ཡེ་ཤེས་དང
རིག་པ་གསལ་ལ་ཕྱོགས་ལྷུང་མེད་པས་མེ་ལོང་ཡེ་ཤེས་དང
རིག་པ་གསལ་ལ་མ་འབྲེས་རྫོགས་པས་མེ་ལོང་ཡེ་ཤེས་དང
རིག་པ་མི་གཡོ་མཉམ་པར་གནས་པས་མཉམ་ཉིད་ཡེ་ཤེས་དང
རིག་པ་བཟང་ངན་ཡུལ་ལས་འདས་པས་མཉམ་ཉིད་ཡེ་ཤེས་དང
རིག་པ་རྣམ་རྟོག་ཀུན་དང་བྲལ་བས་མཉམ་ཉིད་ཡེ་ཤེས་དང
རིག་པ་སྒྲ་དང་ཚིག་ལས་འདས་པས་མཉམ་ཉིད་ཡེ་ཤེས་དང
རིག་པ་བློ་ཡི་བྱེ་བྲག་རྟོགས་པས་སོ་སོར་རྟོག་པའི་ཡེ་ཤེས་དང
རིག་པ་དུ་མར་རྟོགས་པས་སོ་སོར་རྟོག་པའི་ཡེ་ཤེས་དང
རིག་པ་ཅིར་ཡང་འཆར་བས་སོ་སོར་རྟོག་པའི་ཡེ་ཤེས་དང
རིག་པ་རྣམ་པ་ཅིར་ཡང་སྣང་བས་སོ་སོར་རྟོགས་པའི་ཡེ་ཤེས་དང
རིག་པ་བྱ་བཙལ་མེད་པས་བྱ་བ་གྲུབ་པའི་ཡེ་ཤེས་དང
རིག་པ་འཛིན་རྟོག་དབྱིངས་སུ་རྫོགས་པས་བྱ་བ་གྲུབ་པའི་ཡེ་ཤེས་དང
རིག་པ་སྐྱེ་མེད་ངང་དུ་རྫོགས་པས་བྱ་བ་གྲུབ་པའི་ཡེ་ཤེས་དང
རིག་པ་འགག་མེད་ངང་དུ་རྫོགས་པས་བྱ་བ་གྲུབ་པའི་ཡེ་ཤེས་དང
ཞེས་འགྲོ་བ་ཡོངས་ལ་དེ་བཞིན་དུ་ཤེས་པར་བྱའོ
༣༦༡
ཡེ་ཤེས་ལས་བྱུང་བའི་འོད་ལྔ་གང་ཞེ་ན
དེ་ཡང་ཁ་དོག་རྣམ་པ་ལྔ་སྟེ
རིག་པ་ཆོས་ཀྱི་སྐུ་ལ་འགྱུར་བ་མེད་པས་ཁ་དོག་མཐིང་གར་གསལ
རིག་པ་བསམ་པ་ཀུན་དང་བྲལ་བས་ཁ་དོག་མཐིང་གར་གསལ
རིག་པ་གདངས་དང་ལྡན་པས་འོད་ཆེན་མཐིང་གར་གསལ
རིག་པའི་འབྲས་བུ་ཟང་མཐལ་བྱུང་ཡིད་པས་འོད་ཆེན་མཐིང་གར་གསལ
རིག་པ་ཉིད་ལ་ཉོན་མོངས་གོས་པ་མེད་པས་ཁ་དོག་དཀར་པོར་གསལ
རིག་པ་ཤེལ་སྒོད་ལྟ་བུར་དག་པས་ཁ་དོག་དཀར་པོར་གསལ
རིག་པ་བྱང་སེམས་དྲི་མ་མེད་པས་ཁ་དོག་དཀར་པོར་གསལ
རིག་པའི་འོད་ཟེར་གཏིང་མཐའ་ཡས་པས་ཁ་དོག་དཀར་པོར་གསལ
རིག་པའི་ཡེ་ཤེས་ཐ་སྙད་བྲལ་བས་འོད་ཆེན་སེར་པོར་གསལ
རིག་པའི་ཡེ་ཤེས་འཛིན་པ་མེད་པས་འོད་ཆེན་སེར་པོར་གསལ
རིག་པའི་ཡེ་ཤེས་ངང་གིས་གསལ་བས་འོད་ཆེན་སེར་པོར་གསལ
རིག་པ་འགྱུར་མེད་ངང་ལ་རྫོགས་པས་འོད་ཆེན་སེར་པོར་གསལ
རིག་པའི་ཀློང་ན་དབང་རྣམས་ཐམས་ཅད་རྫོགས་པས་ཁ་དོག་དམར་པོར་གསལ
༣༦༢
རིག་པའི་ཀློང་ནས་སྐྱེ་མེད་དུས་གཅིག་རྫོགས་པས་ཁ་དོག་དམར་པོར་གསལ
རིག་པ་འགྱུར་མེད་ངང་ལ་དེ་བཞིན་གཤེགས་པས་འོད་ཆེན་དམར་པོར་གསལ
རིག་པ་འགག་མེད་ཀུན་ལ་ཁྱབ་པས་འོད་ཆེན་དམར་པོར་གསལ
རིག་པའི་ས་ལ་འགྱུར་བ་མེད་པས
འོད་ཆེན་ལྗང་གུར་གསལ
རིག་པ་དངོས་པོས་སྟོང་པར་ཁྱབ་པས་ཁ་དོག་ལྗང་གུར་གསལ
རིག་པ་ཤེས་རབ་འགག་པ་མེད་པས་ཁ་དོག་ལྗང་གུར་གསལ
འཛིན་པའི་སྤྱོད་ཡུལ་མེད་པས་ཁ་དོག་ལྗང་གུར་གསལ
དེ་ལས་འོད་འཕྲོས་འཇིག་རྟེན་གང་བར་འགྱུར
ཀུན་ལ་དཀོན་པའི་ཡེ་ཤེས་འོད་མཆོག་འདི
ཡེ་ཤེས་འོད་ཀྱིས་ནམ་མཁའ་ཁེངས་པར་མཐོང
དེ་ཡིས་སེམས་ཅན་རྣམས་ཀྱང་གྲོལ་བར་བྱེད
ཅེས་རྒྱུད་ཆེན་པོ་གསང་བ་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས
སྐུ་དང་ཡེ་ཤེས་ཀྱི་ལེའུ་སྟེ་ལྔ་པའོ
༄༦
དེ་ནས་ལང་གསུང་བའི་བདག་པོ་ཕྱག་ན་རྡོ་རྗེ་དེ་ཉིད་དུ་མངོན་པར་སྣང་བར་གྱུར་ནས
ཐུགས་རྗེ་ཆེན་པོ་དང་ལྡན་པ་དེ་ལ་འདི་སྐད་ཅེས་གསོལ་ཏོ
ཀྱེ་མ་ཀློང་ཡོངས་བཅོམ་ལྡན་ཐུགས་རྗེ་ཅན
༣༦༣
བྱང་ཆུབ་འབྱུང་བའི་གཏེར་ཆེན་གསུང་དུ་གསོལ
ཞེས་ཞུ་བ་ཞུས་སོ
སྟོབས་ཀྱི་བདག་པོས་བཀའ་སྩལ་པ
ཀྱེ་མ་རྡོ་རྗེ་འཛིན་པ་ཉོན
ངས་བསྟན་ལེགས་པར་ཡིད་ལ་ཟུང
རང་རིག་བྱང་ཆུབ་སེམས་ཀྱི་བདུད་རྩི་འདི
དཔེར་ན་ལྷ་རྫས་ནོར་བུ་རིན་ཆེན་འདི
གྲང་བའི་ཕྱོགས་སུ་བཞག་ན་དྲོ་བར་འགྱུར
དྲོ་བའི་ཕྱོགས་སུ་བཞག་ན་བསིལ་བར་འགྱུར
མུན་པའི་ཕྱོགས་སུ་བཞག་ན་སྣང་བར་འགྱུར
དེ་བཞིན་རང་བྱུང་རིག་པ་འདི
རྟོགས་པའི་དོན་དང་ལྡན་གྱུར་ན
ཉོན་མོངས་ཡེ་ཤེས་གྲོགས་སུ་འགྱུར
ཉོན་མོངས་སྐྱེས་ཀྱང་ཡེ་ཤེས་སྟོབས་སུ་གྱུར་ན་བསྒྲིབ་པ་མེད
ཀྱེ་ཧོ་གསང་བའི་བདག་པོ་ངེས་པར་ཟུང
རང་ལས་བྱུང་བའི་བདུད་རྩིའི་ཐེགས་པ་འདི
དཔེར་ན་ནོར་བུ་ཆུ་འདོངས་བཞིན
རྙོག་མ་ཅན་དུ་སྩལ་ན་རྙོག་མ་དངས་པར་འགྱུར
དེ་བཞིན་སྙིང་པོ་དོན་གྱི་གདམས་པ་འདི
བཏབ་ན་ཉོན་མོངས་གོས་མི་འགྱུར
བག་ཆགས་འདམས་ལས་ཡེ་ཤེས་པད་མ་སྐྱེ་པར་འགྱུར
ཡེ་ཤེས་ཆུ་ཡིས་ཉོན་མོངས་ཐམས་ཅད་འཁྲུད
ཡེ་ཤེས་མེ་ཡིས་བག་ཆགས་བསྲེག་པར་བྱེད
༣༦༤
ཡེ་ཤེས་བདེ་བའི་སྐུ་ལ་སྣག་སྲིད་གསལ
གཅིག་པུ་དལ་བར་འདུག་ན་སྣང་འགྲོགས་སུ་འཆར
མ་སྐྱེས་སྦྱིངས་ནས་ཡེ་ཤེས་འོད་གསལ་བ
ཀུན་ལ་ཡོད་དེ་ཀུན་གྱིས་མཐོང་བ་མེད
དཔག་པས་མི་དབོག་ནམ་མཁའི་དབྱིངས་དང་འདྲ
གསལ་ལ་འཆོར་བ་ཉི་མའི་འོད་དང་འདྲ
འགྱུར་བ་མེད་པས་རི་རྒྱལ་ལྷུན་པོ་འདྲ
བྲབ་ལ་གཏིང་དཔག་མེད་པ་རྒྱ་མཚོའི་གཏིང་དང་འདྲ
གོས་པ་མེད་པས་འདམ་གྱི་པད་མ་འདྲ
ངོས་བཟུང་མེད་པས་ཆུ་ཡི་ཟླ་བ་འདྲ
ཅིར་ཡང་སྣང་བས་ནམ་མཁའི་ཆོ་འཕྲུལ་འདྲ
གསལ་ལ་ཁ་དོག་རྫོགས་པས་བར་སྣང་འཇའ་ཚོན་འདྲ
གང་ལ་ཐོགས་པ་མེད་པས་རླུང་གི་དཀྱིལ་འཁོར་འདྲ
རྒྱུན་ཆད་སྐྱེ་འབྲི་མེད་པས་ཆུ་བོའི་རྒྱུན་དང་འདྲ
ཀུན་ལ་ཁྱབ་པས་དུས་ཀྱི་ལྟོ་བ་འདྲ
རྟོག་པ་སྣ་ཚོགས་འཆར་བས་འཁྲུལ་པའི་སྣང་བ་འདྲ
སྟོང་གསལ་དབྱེར་མེད་སྣང་བས་དག་པའི་ཞིང་ཁམས་འདྲ
སྲ་ཞིང་བརྟན་པས་རྡོ་རྗེ་ཕ་ལམ་འདྲ
ཀུན་གྱི་གཞི་མར་གྱུར་པས་ས་གཞི་མཉམ་པ་འདྲ
དགོས་འདོད་ཡོངས་སུ་རྫོགས་པ་དཔག་བསམ་ལྗོན་ཤིང་འདྲ
གསལ་ལ་དངས་པས་བཙུན་མོའི་མེ་ལོང་འདྲ
༣༦༥
རྐང་མེད་མཁའ་ལ་འགྲོ་བས་འདབ་ཆགས་རྒྱལ་པོ་འདྲ
རྒྱན་དང་ཆ་ལུགས་བཅས་པས་སྒེག་མོ་ཕྲེང་ཐོགས་འདྲ
ཀུན་ལ་ཐལ་གྱིས་ཕུག་པས་དཔག་ཆེན་མདའ་དང་འདྲ
ཡེ་ཤེས་དབྱིངས་སུ་སྡུད་པས་འབྱུང་བ་ཆུ་དང་འདྲ
ཉོན་མོངས་བག་ཆགས་བསྲེག་བས་འབྱུང་བ་མེ་དང་འདྲ
དཔེ་རྣམས་དེ་བཞིན་མཚོན་པས་ཡེ་ཤེས་དོན་ལ་སྦྱོར
རྟག་པ་མི་འགྱུར་ཡེ་ཤེས་བརྡལ་པའི་སྐུ
ཀུན་ལ་ཡོད་དེ་རང་གསང་ཐབས་ཀྱིས་ཆོད
མི་འགྱུར་ཀུན་ལ་གནས་པའི་རིག་པ་བྱང་ཆུབ་སེམས
ངོ་བོ་མི་འགྱུར་ཀུན་ལ་དེ་བཞིན་གནས
རང་བཞིན་གསལ་བས་འགྲོ་ཀུན་ཡོངས་ལ་ཁྱབ
ངང་གིས་མི་གཡོ་ཁྱབ་གདལ་བདེ་བའི་ཀློང
རྡོ་རྗེའི་དམ་ཚིག་ལྡན་པས་བླང་བར་བྱ
ཞེས་བཀའ་སྩལ་ཏོ
དེ་ནས་ཡང་གསང་བའི་བདག་པོ་ཕྱག་ན་རྡོ་རྗེས་རྡོ་རྗེ་གསོར་ཏེ་འདི་སྐད་ཅེས་གསོལ་ཏོ
ཨ་ལ་ལ་ཧོ
དེ་བཞིན་གཤེགས་པ་ཐམས་ཅད་ཀྱི་དགོངས་པ་ཐུགས་སུ་ཆུད་དོ
རང་གི་དོན་ཆེན་རྙེད་དོ
ཞེས་བརྗོད་ནས་རྡོ་རྗེ་གསོར་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་པའི་སྐུས་གང་བར་གྱུར་ཏོ
༣༦༦
དེ་བཞིན་གཤེགས་པའི་སྐུ་མཐོང་བའི་སེམས་ཅན་དེ་དག་ཀྱང་མངོན་པར་རྫོགས་པར་སངས་རྒྱས་སོ
ངན་སོང་གི་སྐྱེ་གནས་ཐམས་ཅད་རྒྱུན་བཅད་དོ
དེ་ནས་ཡང་གསང་བའི་བདག་པོར་ང་ལ་རང་ངོ་མཚར་སྐྱེས་ནས་འདི་སྐད་ཅེས་རྡོ་རྗེ་འཆང་ཆེན་པོ་ལ་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
རིག་པའི་དཔེ་དོན་དེ་ལྟར་ན
མ་རིག་དཔེ་དོན་གསུང་དུ་གསོལ
ཞེས་ཞུ་བ་ཞུས་སོ
རྡོ་རྗེ་འཆང་གིས་བཀའ་སྩལ་པ
ཨེ་མ་ཧོ
རྡོ་རྗེ་འཛིན་པ་ཉོན
མ་སྨིན་མ་རྟོགས་འཁོར་བ་ནི
དཔེར་ན་གྱི་ལིང་ལྕགས་བཅུག་འདྲ
བཀྲོལ་བར་མ་གྱུར་ཐར་པའི་དུས་མི་འབྱུང
དེ་བཞིན་མ་རིག་ལྕགས་བཅུག་ཐར་བར་ག་ལ་འགྱུར
མ་རིག་ཆུ་དང་འདྲ་སྟེ་ཐམས་ཅད་སྡུད
ཞེ་སྡང་མེ་ནི་བསྐལ་པའི་མེ་དཔུང་འདྲ
འདོད་ཆགས་ཚ་ཆུ་དག་ནི་འཐུང་བ་འདྲ
གཏི་མུག་འཐིབས་པ་ཁང་སྟོང་མུན་པ་འདྲ
ང་རྒྱལ་དྲེགས་པ་རི་བོ་བསྙིལ་བ་འདྲ
ཕྲག་དོག་གནོད་སེམས་གཅོད་རོང་དོག་མོ་འདྲ
ཉོན་མོངས་རྣམས་ལྔས་ཡེ་ཤེས་བསྒྲིབ་པར་བྱེད
ཡིད་ནི་དཔེར་ན་ཁང་སྟོང་རྐུན་མ་འདྲ
༣༦༧
དབུགས་ནི་དཔེར་ན་ནགས་ཀྱི་སྤྲེའུ་འདྲ
སེམས་ནི་དཔེར་ན་མི་གཙང་འདམ་རྫབ་འདྲ
ཀུན་གཞི་དཔེར་ན་སེམས་ཅན་ཕག་པ་འདྲ
ཤེས་པ་དཔེར་ན་བྱ་སྒྲོ་རླུང་ཁྱེར་འདྲ
གཟུང་འཛིན་དཔེར་ན་སྐྱེས་པ་བུད་མེད་དབང་གིས་བསྐོར་བ་འདྲ
ལས་ཀྱི་བྱེ་བྲག་བྱ་རྙི་འཛིངས་པ་འདྲ
སྡུག་བསྔལ་བྱེ་བྲག་ཆུ་བོའི་གཉེར་མ་འདྲ
ཉོན་མོངས་འབྲས་བུ་འདི་ལ་བཟོད་པའི་ཐབས་མེད་དོ
འཁོར་བའི་སྡུག་བསྔལ་འཛིན་པའི་རྟོད་ཕུར་འདི
བྱས་པས་མི་ཐོན་བཞག་ན་ཐོན་པར་འགྱུར
བྱས་པའི་ཆོས་རྣམས་སྤངས་ན་དལ་བ་འགྲུབ་པར་འགྱུར
བསམ་པ་ཀུན་སྤངས་ཡེ་ཤེས་མཚོ་མི་གཡོ
གསང་སྔགས་རྒྱལ་པོ་སྤྱོད་ན་ཉོན་མོངས་ཡེ་ཤེས་འགྱུར
དཔེར་ན་ཁྱིམ་སྟོང་སྒྲོན་མེ་བཏེགས་ན་མུན་པ་གསལ་བར་འགྱུར
དེ་བཞིན་ཡེ་ཤེས་སྒྲོན་མེ་བཏེགས་ན་མ་རིག་རིག་པར་འགྱུར
དེ་ཁོ་ན་ཉིད་ཀྱི་རྟོགས་པ་རྒྱུད་ལ་སྐྱེས་ན་ཉོན་མོངས་ཐམས་ཅད་ཡེ་ཤེས་གྲོགས་སུ་འཆར
དེ་ཕྱིར་རིགས་ཀྱི་བུ་ཉོན་མོངས་པ་ལྔ་ཡེ་ཤེས་ལྔ་དང་སྦྱོར་ཅིག
མ་དག་པ་སུམ་བརྩེགས་དང་ཡེ་ཤེས་སུམ་བརྩེགས་སྦྱོར་ཅིག
ཉོན་མོངས་པ་སྣ་ཚོགས་སུ་སྣང་བ་དང་ཡེ་ཤེས་ཀྱི་འོད་ཁ་དོག་སྣ་ཚོགས་སུ་སྣང་བ་སྦྱོར་ཅིག
༣༦༨
ཨེ་མ་ཧོ
རིགས་ཀྱི་བུ་དེ་བཞིན་དུ་ཤེས་ན་མ་དག་པའི་སྣང་བ་འདིས་བསྒྲིབ་པ་མེད་དོ
རིགས་ཀྱི་བུ་རང་དལ་བར་འདུག་ན
ཡེ་ཤེས་ཀྱི་སྣང་བ་ལྷུག་པར་འཆར་རོ
དེའི་ཕྱིར་ན་རོགས་མེད་གཅིག་པུར་གནས་པར་བྱ་ཞེས་འབྱུང་ངོ
ཀྱེ་གྲོགས་པོ་དག་ཡང་དག་པར་རྫོགས་པའི་སངས་རྒྱས་ཀྱི་འབྲས་བུ་ནི་སྨིན་པ་དང་མ་སྨིན་པ་མི་མངའོ
དེའི་ཕྱིར་ན་བསྒོམས་པས་འབྲས་བུ་མི་རྙེད་པའི་མན་ངག་གོ
ཀྱེ་གྲོགས་པོ་དག་ཡང་དག་པར་རྫོགས་པའི་སངས་རྒྱས་ཀྱི་ལྟ་བ་ནི་བརྗོད་པ་ཐམས་ཅད་དང་བྲལ་བའོ
དེའི་ཕྱིར་ན་བྱང་ཆུབ་སེམས་དཔའ་ཆོས་ལ་གནས་པར་མི་བྱའོ
ཀྱེ་གྲོགས་པོ་དག་ཡང་དག་པར་རྫོགས་པའི་སངས་རྒྱས་ཀྱི་དགོངས་པ་རང་ལས་བཙལ་བར་བྱའོ
དེ་བས་ན་རྒྱུད་འདི་ཡང་སངས་རྒྱས་ཀྱི་བཀའི་དམ་པར་ཟུང་ཞིག
རིག་པ་གཉིས་མེད་ཀྱི་ཡེ་ཤེས་ངོས་ཟུང་ཞིག
རིག་པ་གཟུང་འཛིན་དང་བྲལ་བར་མཁས་པར་གྱིས་ཤིག
རིག་པ་ཅིར་སྣང་བ་ཐམས་ཅད་ཀློང་གཅིག་ཏུ་དྲིལ་ཅིག
ཅེས་བཀའ་སྩལ་ནས
འོད་ཕུང་རབ་ཏུ་འབྱེད་བཞེས་བྱ་བའི་ས་མ་ཏི་ལ་སྙོམས་པར་ཞུགས་སོ
༣༦༩
དེ་ནས་མཁའ་འགྲོ་མ་རྣམས་ཀྱིས་སྒྲ་སྙན་པ་སྣ་ཚོགས་དང
རོལ་མོ་དང་གླུ་སྣ་ཚོགས་ཀྱིས་བསྐུལ་བར་མཛད་དོ
དེ་ནས་དེ་རྣམས་ཀྱི་ནང་ནས་ནག་མོ་འབྲུག་གི་སྒྲ་ཅན་མ་ཞེས་བྱ་བས་འདི་སྐད་ཅེས་གསོལ་ཏོ
ཀྱེ་ཧོ་ཐུགས་རྗེ་ཆེན་པོ་དང་ལྡན་པ་ཏིང་ངེ་འཛིན་ལས་བཞེངས་ཤིག
ཁམས་གསུམ་སེམས་ཅན་ཐམས་ཅད་ཉོན་མོངས་པ་མ་རིག་པའི་རྒྱས་འཐུམས་པ་འདི་རྣམས་ལ
ཐབས་དམ་པ་བསྟན་དུ་གསོལ
བསྟན་པའི་སྒྲོན་མ་འཇིག་རྟེན་གྱི་ཁམས་སུ་ཡུན་རིང་པར་གནས་པར་མཛད་དུ་གསོལ
ཞེས་གསོལ་པ་དང
བཅོམ་ལྡན་འདས་ཏིང་ངེ་འཛིན་ལས་བཞེངས་ནས་དེ་བཞིན་གཤེགས་པའི་སྐུ་མང་པོ་མངོན་པར་སྤྲུལ་ནས
ལ་ལ་ནི་ཕྱག་ན་རྡོ་རྗེའི་སྐུ་ཤ་སྟག་ཏུ་གྱུར
ལ་ལ་ནི་ཞི་བའི་སྐུ་ཤ་སྟག་ཏུ་གྱུར
ལ་ལ་ནི་རང་རང་གི་དཀྱིལ་འཁོར་དང་བཅས་པའི་སྐུ་ཤ་སྟག་ཏུ་གྱུར
ལ་ལ་ནི་ཡབ་ཡུམ་སྣང་བ་ཤ་སྟག་ཏུ་གྱུར་ཏེ
དེ་ནས་མཁའ་འགྲོ་མ་རྣམས་ངོ་མཚར་སྐྱེས་ནས
ཐབས་ཅིག་ཏུ་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
༣༧༠
སྐུ་ཡི་ངེས་ཚིག་གསུང་དུ་གསོལ
ཞེས་ཞུས་སོ
གསང་སྔགས་རྒྱལ་པོས་བཀའ་སྩལ་པ
ཀྱེ་ཀྱེ་འབྱུང་བའི་བདག་མོ་ཉོན
ཡེ་ཤེས་རྒྱལ་པོ་ཚིག་གིས་མཚོན་དུ་མེད
རིག་པའི་རྒྱལ་པོ་ཚིག་ལས་འདས་པ་ཡིན
འོན་ཀྱང་ཚིག་གིས་དོན་རྣམས་མཚོན་པར་བྱེད
ཚིག་དོ་གཉིས་མེད་འབྲེལ་བའི་གཏན་ཚིགས་བཤད
སྐུ་ཡི་དེ་ཚིག་གང་ཞེ་ན
མི་འགྱུར་དོན་དང་ལྡན་པས་རྡོ་རྗེ་སྙིང་པོའི་སྐུ
སྐྱེ་མེད་ངང་ལ་རྫོགས་པས་བྱ་རྩོལ་བྲལ་བའི་སྐུ
འགག་མེད་ངང་ལ་གནས་པས་བྱ་བཙལ་མེད་པའི་སྐུ
མཚོན་པའི་ཚིག་དང་བྲལ་བས་ཐིག་ལེ་སྟོང་པའི་སྐུ
རང་གསལ་བྱས་པ་མེད་པས་འོད་གསལ་བདེ་བའི་སྐུ
དངོས་པོ་རྫས་སུ་མེད་པས་སྟོང་པ་འཛིན་མེད་སྐུ
རྒྱ་ཆད་ཕྱོགས་ལྷུང་མེད་པས་ཡེ་ཤེས་བརྟན་པའི་སྐུ
དེ་ལྟར་རྟོགས་ན་བདེ་ཆེན་ངང་ལ་གནས
དེ་ལྟར་སྐུ་བདུན་དོན་ལ་མ་ཡེངས་སྤྱད་པར་བྱ
དོན་གྱི་རིག་པ་མི་ཟད་བདེ་བའི་གཏེར
ཟག་མེད་བྱང་ཆུབ་ཆེན་པོ་བདག་གིས་བླངས
ང་མེད་པ་ཡི་སྔོན་རོལ་དུ
རིག་པ་དབྱེར་མེད་ངང་ལ་ཤེས་བྱ་བདེ་བྱེད་གསལ
ང་ནི་རང་བྱུང་བདེ་ཆེན་ཟག་པ་མེད་པའི་སྐུ
༣༧༡
ང་ནི་སྐུ་ཡི་འོད་ལ་ཞུགས་ཤིང་གསུང་གི་ཟེར་ལ་རོལ
དེ་ཕྱིར་འོད་ཟེར་ཞེས་ཀྱང་དེ་ལ་བྱ
ང་ནི་མི་གནས་ཡེ་ཤེས་ཕྱོགས་ལ་གནས་པ་མེད
ང་ཡི་སྐུ་ལ་སྣང་སྲིད་གསལ་ཞིང་བདེ་ཆེན་འབར་བར་སྣང
དེས་ནང་ནི་ཐབས་ཀྱི་ཕ་རོལ་ཕྱིན་ལ་གནས
ཐོགས་མེད་གསལ་བའི་མར་མེ་བསམ་པ་ཀུན་དང་བྲལ
བསམ་བྲལ་བདེ་བའི་སྐུ་ལ་སྣང་སྲིད་གསལ
བསམ་བྲལ་སྣ་ཚོགས་འབྱུང་བའི་རིག་པ་འགག་མེད་ཀློང
ཀུན་གསལ་ཆོས་ཉིད་མེ་ལོང་འོད་པོ་ཆེ
གཉིས་མེད་ངང་དུ་བདེ་ཆེན་འོད་གསལ་མཉམ
ཞེས་གསང་བ་ཡང་ཁོལ་དུ་ཕྱུང་བའི་རྒྱུད
རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཆེན་པོ་ལས
མ་རིག་པ་དང་ཡེ་ཤེས་ཀྱི་མཐུན་དཔེ་བསྟན་པའི་ལེའུ་སྟེ་དྲུག་པའོ
༄༧
དེ་ནས་ཡང་གསང་བའི་བདག་པོས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
རྫོགས་ཆེན་ངེས་ཚིག་གསུང་དུ་གསོལ
ཞེས་ཞུ་བཞུས་སོ
སྟོབས་ཀྱི་རྒྱལ་པོས་བཀའ་སྩལ་པ
ཀྱེ་ཀྱེ་རྡོ་རྗེ་འཛིན་པ་ཉོན་ཅིག
རྫོགས་ཆེན་ཐེག་པའི་ངེས་ཚིག་ནི
༣༧༢
རིག་པ་བྱ་བྲལ་ངང་ལ་ཡེ་ཤེས་རྫོགས་པས་རྫོགས
བསྒོམ་པ་རྟོག་མེད་ངང་ལ་ཡེ་ཤེས་དྲི་མེད་རྫོགས་པས་རྫོགས
སྤྱོད་པ་བཅོས་མེད་ངང་ལ་ཡེ་ཤེས་བརྡལ་བ་རྫོགས་པས་རྫོགས
ལྟ་བ་དགག་བསྒྲུབ་མེད་མེད་པའི་ངང་ལ་ཡེ་ཤེས་རྟོགས་མེད་རྫོགས་པས་རྫོགས
འབྲས་བུ་དམིགས་མེད་ངང་ལ་ཡེ་ཤེས་ཉི་ཤུ་རྩ་ལྔ་རྫོགས་པས་རྫོགས
སྐུ་དང་ཡེ་ཤེས་རང་གི་སྙིང་གི་དཀྱིལ་ན་རྫོགས་པས་རྫོགས
སྟོང་པའི་ངང་ལས་རིག་པ་དངོས་མེད་གསལ་བའི་ཡེ་ཤེས་རྫོགས་པས་རྫོགས
སྐྱེ་མེད་ངང་ལས་འོད་ལྔ་མ་འདྲེས་གསལ་བར་རྫོགས་པས་རྫོགས
སྟོང་ཉིད་གསལ་ལ་མ་ཡེངས་པས་ན་པ
བྱ་བ་མེད་པར་སྣང་བས་པ
གསལ་ལ་འཛིན་པ་མེད་པས་པ
འབྲས་བུ་ཚད་དང་ལྡན་པས་པ
ཐེག་པ་ཀུན་གྱི་གོང་དུ་གྱུར་པས་ཆེ
གནས་ལུགས་དོན་ལ་གཡེངས་མེད་པས་ཆེ
ཡེ་ཤེས་སྒྲོན་མ་ལྟ་བ་ཀུན་གྱི་རྩེ་མོར་གྱུར་པས་ཆེ
གསལ་ལ་མ་ཡེངས་སྒོམ་པ་ཀུན་གྱི་རྩེ་མོར་གྱུར་པས་ཆེ
རང་བྱུང་མ་བཅོས་སྤྱོད་པ་ཀུན་གྱི་རྩེ་མོར་གྱུར་པས་ཆེ
འཛིན་མེད་རང་གསལ་འབྲས་བུ་ཀུན་གྱི་རྩེ་མོར་གྱུར་པས་ཆེ
༣༧༣
འགྱུར་མེད་ངང་ལ་འགག་མེད་རྩོལ་བས་ཆེ
འཛིན་མེད་ངང་ལ་འགག་མེད་རྩོལ་བས་ཆེ
འཛིན་མེད་ངང་ལ་རྟོག་མེད་གསལ་བས་ཆེ
ཞེན་མེད་ངང་ལ་ཆགས་མེད་གསལ་བས་ཆེ
བརྗོད་མེད་ངང་ལ་བདེ་ཆེན་གསལ་བས་ཆེ
རྣམ་དག་བྱང་ཆུབ་བརྡལ་བའི་སྙིང་པོ་ཡིན་པས་ཆེ
བྱ་བཙལ་བྲལ་བའི་རིག་པ་དངོས་མེད་ཡིན་པས་ཆེ
བདེ་ཆེན་ངང་ལས་མི་གཡོ་མཉམ་པར་གནས་པས་ཆེ
སྙིང་པོའི་དོན་ལ་མི་གཡོ་མཉམ་པར་གནས་པས་ཆེ
འཛིན་པའི་སྤྱོད་ཡུལ་མ་ཡིན་ཀུན་ལ་ཡོད་པས་ཆེ
ཚིག་དང་ཡི་གེས་གཏན་ལ་མི་ཕེབ་ཀུན་གྱི་སྙིང་པོ་ཡིན་པས་ཆེ
རིག་པ་ཡེ་ཤེས་ཉི་ཤུ་རྩ་ལྷས་བརྒྱན་པས་པོ
ཡེ་ཤེས་འོད་ལྔ་དག་པས་བརྒྱན་པས་པོ
འོད་ལ་ཟེར་རྣམས་སོ་སོར་བརྒྱན་པས་པོ
གསུམ་བརྩེགས་དབྱེར་མེད་མཉམ་པས་གནས་པས་པོ
སྐུ་གསུམ་ཕྱིར་མི་ལྡོག་པས་འབྲས་བུ་ཚད་དང་ལྡན
རྒྱ་ཆད་ཕྱོགས་ལྷུང་མེད་པས་ལྟ་བའི་ཚད་དང་ལྡན
གསལ་ལ་རྟོག་པ་མེད་པས་སྒོམ་པའི་ཚད་དང་ལྡན
རང་བྱུང་བཅོས་པ་མེད་པས་སྤྱོད་པའི་ཚད་དང་ལྡན
བདེ་ཆེན་ཟག་པ་མེད་པའི་བྱང་ཆུབ་དངོས་མེད་འདི
༣༧༤
བཟུང་བས་མི་ཟིན་ཆུ་ཡི་ཟླ་བ་འདྲ
དགོས་དགུ་རང་ལ་ཚང་བས་ཕྱུག་པོའི་བང་མཛོད་འདྲ
རིག་པ་བྱང་ཆུབ་སེམས་ནི་གདོད་ནས་སྐྱེ་དང་བྲལ
མ་སྐྱེས་པས་ན་འཆི་མེད་རིག་པའི་ཀློང
ཐིག་ལེ་རྣམ་ལྔ་འདུ་འབྲལ་མེད་པའི་ཀློང
མ་རིག་འཁྲུལ་པ་མེད་པས་གཞི་ཡི་ཐིག་ལེ་བཟང་པོ་ཡིན
འགྱུར་མེད་རྣམ་པར་དག་པས་ལམ་གྱི་ཐིག་ལེ་བཟང་པོ་ཡིན
རིག་པ་རྟོག་པ་མེད་པར་བར་ཆད་སེལ་བས་རྒྱན་དང་ལྡན་པའི་ཐིག་ལེ་བཟང་པོ་ཡིན
འགྲོ་དང་འོང་བ་མེད་པས་བཟང་པོའི་རྩེ་མོ་ཐིག་ལེ་བཟང་པོ་ཡིན
སྐྱེ་དང་འཆི་བ་མེད་པས་ཆོས་དབྱིངས་ཐིག་ལེ་བཟང་པོ་ཡིན
དེ་ལྟར་ཐིག་ལེ་རྣམ་ལྔ་ཡང
དབྱེ་ན་ཐིག་ལེ་རྣམ་པ་བཅུ་ཡོད་དེ
དེ་ཡང་བསྟན་པ་འདི་ལྟར་ཡིན
བཟང་པོའི་འཁྲུལ་མེད་ཐིག་ལེ་དང
བཟང་པོ་ཟག་མེད་ཐིག་ལེའོ
དེ་ནི་གཞི་ཡི་ཉེར་གཞག་གོ
ལམ་གྱི་ཉེར་གཞག་གང་ཞེ་ན
འཛིན་མེད་རྣམ་དག་ཐིག་ལེ་དང
ས་དང་ལམ་གྱི་ཐིག་ལེའོ
དེ་ནི་ལམ་གྱི་ཉེར་གཞག་གོ
འབྲས་བུའི་ཐིག་ལེ་གང་ཞེ་ན
རྣམ་སྨིན་བར་ཆད་སེལ་བའི་ཐིག་ལེ་དང
༣༧༥
མུན་པ་སེལ་བའི་ཐིག་ལེ་དང
སྣང་བ་བཟློག་པའི་ཐིག་ལེ་དང
རབ་བ་མ་རྩེ་མོར་གྱུར་པའི་ཐིག་ལེ་དང
འོད་ལྔ་མ་འདྲེས་གསལ་བའི་ཐིག་ལེ་དང
སྐུ་བདུན་ལྷུན་གྱིས་གྲུབ་པའི་ཐིག་ལེའོ
དེ་ལྟར་ཐིག་ལེ་ལྔ་དང་སྐུ་ལྔ་དག་ཏུ་སྦྱོར
དེ་ལྟར་བཅུ་ཕྱེ་ཡབ་ཡུམ་བཅུ་དང་སྦྱར
དེ་ལས་ཡེ་ཤེས་འབྱུང་བ་གང་ཞེ་ན
དེ་ཡང་ལྔ་ལྔར་ཤེས་པར་བྱ
ཞེས་བཀའ་སྩལ་ཏོ
དེ་ནས་ཡང་གསང་བའི་བདག་པོས་ཞུ་བ་ཞུས་པ
ཨེ་མ་ཧོ
ཐུགས་རྗེ་ཆེན་པོ་དང་ལྡན་པ
དེའི་དབྱེ་བ་རྣམ་གསུམ་གསུང་དུ་གསོལ
ཞེས་ཞུ་བ་ཞུས་སོ
དེ་ནས་ཡང་བཀའ་སྩལ་པ
ཨེ་མ་ཧོ
གསང་བའི་བདག་པོ་ཉོན
ཡེ་ཤེས་རྣམ་པ་ལྔ་ཡང་ལྔ་ལྔ་སྟེ
ཡེ་ཤེས་ཉི་ཤུ་རྩ་ལྔར་ཤེས་པར་གྱིས་ཤིག
དེ་ཡང་གང་ཞེ་ན
འདི་ལྟ་སྟེ
དབྱིངས་ཀྱི་ཡེ་ཤེས་དང
ཆོས་ཀྱི་དབྱིངས་ཀྱི་ཡེ་ཤེས་གཉིས
དབྱིངས་རྣམ་པར་དག་པའི་ཡེ་ཤེས་དང
དབྱིངས་ཆེན་པོའི་ཡེ་ཤེས་དང་གཉིས
དབྱིངས་ཐམས་ཅད་གཉིས་སུ་མེད་པའི་ཡེ་ཤེས་དང་ལྔའོ
མེ་ལོང་ལྟ་བུའི་ཡེ་ཤེས་དང
༣༧༦
མེ་ལོང་ཆེན་པོའི་ཡེ་ཤེས་གཉིས
རྟོག་མེད་གསལ་བའི་ཡེ་ཤེས་དང
རྟོག་མེད་དངས་པའི་ཡེ་ཤེས་གཉིས
གསལ་བ་འཛིན་མེད་ཆེན་པོའི་ཡེ་ཤེས་དང་ལྔའོ
མཉམ་པ་ཉིད་ཀྱི་ཡེ་ཤེས་དང
མཉམ་པ་ཉིད་མ་འགགས་པའི་ཡེ་ཤེས་གཉིས
མི་གཡོ་བ་མཉམ་པ་ཉིད་ཀྱི་ཡེ་ཤེས་དང
མི་འགག་པ་མཉམ་པ་ཉིད་ཀྱི་ཡེ་ཤེས་གཉིས
ཅི་ལ་ཡང་མི་གནས་པ་མཉམ་པ་ཉིད་ཀྱི་ཡེ་ཤེས་དང་ལྔའོ
སོ་སོར་རྟོགས་པའི་ཡེ་ཤེས་དང
དོན་ཐམས་ཅད་རབ་ཏུ་འབྱེད་པའི་ཡེ་ཤེས་གཉིས
རྟོགས་པ་སྐད་ཅིག་མར་སྐྱེ་བའི་ཡེ་ཤེས་དང
སྒྲ་ཐམས་ཅད་རྣམ་པར་གསལ་བའི་ཡེ་ཤེས་དང་གཉིས
སྒྲ་དང་ཚིག་ལ་མི་གནས་པར་གོ་བའི་ཡེ་ཤེས་དང་ལྔའོ
བྱ་བ་གྲུབ་པའི་ཡེ་ཤེས་དང
བྱ་བ་ཐམས་ཅད་བྱེད་པའི་ཡེ་ཤེས་དང་གཉིས
བྱ་བ་ལ་མི་གནས་པའི་ཡེ་ཤེས་དང
བྱ་བ་བཏང་བའི་ཡེ་ཤེས་གཉིས
སྒྲོ་འདོགས་ཐམས་ཅད་གཅོད་པའི་ཡེ་ཤེས་དང་ལྔའོ
དྷི་མུ་ཨ
རིགས་ཀྱི་བུ་དེ་ལྟར་གོང་བཞིན་རྟོགས་ནས་ཤེས་པའི་དུས་ན
༣༧༧
དེ་ལས་ཟེར་འབྱུང་སྟེ
ཉི་ཟླ་ལྟ་བུའི་ཟེར་དང
སྲིན་བུ་མེ་ཁྱེར་ལྟ་བུའི་ཟེར་དང
མེ་མར་ལྟ་བུའི་ཟེར་དང
སྣང་བ་ཟེར་དང་བཅས་པར་སྣང་ངོ
རིགས་ཀྱི་བུ་དེ་ལྟར་གོ་ཞིང་རྟོགས་ནས་ཤེས་པའི་དུས་གཅིག་ན
འདི་སྐད་བདག་གིས་ཐོས་པའི་དུས་གཅིག་ན
ཞེས་བྱའོ
དེའི་དོན་ལ་མ་ཡེངས་མི་གནས་པའི་རིག་པ་ཤར་ནས་རང་ལ་རང་གིས་རྟོགས་པ་ནི
འདི་སྐད་བསྟན་པའི་དུས་གཅིག་ན་ཞེས་བྱའོ
དེ་ལྟར་ཤེས་ནས་མོས་པའི་འཁོར་རྣམས་ལ་བསྟན་པའི་ཕྱིར་ན
འདི་སྐད་བདག་གིས་བསྟན་པའི་དུས་གཅིག་ན
ཞེས་འབྱུང་ངོ
ཀྱེ་གྲོགས་པོ་དག་བསྟན་པ་འདི་ལ་གནས་པའི་གང་ཟག་རྣམས་ལ་དེ་བཞིན་དུ་བྱོས་ཤིག
དེ་ལྟར་ཤས་པའི་རིགས་ཀྱི་བུ་དེ་ནི་མྱ་ངན་ལས་འདའ་ཕར་འགྱུར་རོ
ཀྱེ་རིགས་ཀྱི་བུ་སྐྱེས་བུ་དེ་ལ་སྔ་རྟགས་འདི་དག་འབྱུང་སྟེ
དེ་ཡང་གང་ཞེ་ན
འདི་ལྟ་སྟེ
གཅིག་པུར་བསྡད་ན་ཉམས་དགའ་བ་དང
ལུས་ཤིང་བལ་གྱི་འདབ་མ་ལྟར་ཡང་པ་དང
མི་དང་འགྲོགས་སྙིང་མི་འདོད་པ་དང
༣༧༨
ནམ་མཁའ་ལ་འཕུར་སྙམ་བྱེད་པ་དང
སྣང་བ་འདི་འགགས་ནས་དག་པའི་འདུ་ཤེས་དང
ལུས་དང་སྲོག་ལ་ཡང་མི་ཆགས་པ་དང
སྣང་བ་གང་ལ་ཡང་ཡིད་མི་འཇུག་པ་དང
ཤེས་པ་མི་བྱིང་བར་གསལ་བ་དང
ཤེས་པ་ངང་གིས་དལ་བ་དང
འགྲོགས་ན་བདེ་བ་དང
ཉོན་མོངས་ཐམས་ཅད་གང་ཡང་ལྡང་མི་ནུས་པ་དང
ཉོན་མོངས་ལངས་ཀྱང་རྟོག་པར་མི་འཛིན་པ་དང
གཟུགས་སྡུག་པ་ལ་ཆགས་པ་མི་སྐྱེ་བ་དང
གཟུགས་མི་སྡུག་པ་ལ་ཞེ་མི་སྡང་བ་དང
ཏིང་ངེ་འཛིན་གྱིས་ནུས་པས་ཟས་སྐོམ་གྱི་འདུ་ཤེས་མི་སྐྱེ་བ་དང
མི་དང་འགྲོགས་ནས་ཀྱང་ཕ་རོལ་གྱི་སེམས་དང་ཅི་མཐུན་བྱེད་པ་དེ་ནི
སྣང་སྲིད་སྒྱུ་མར་ཤེས་པའི་ཆོས་ཉིད་རྟོགས་པའི་ཕྱིར་ན
༣༧༩
ཡོངས་སུམ་ངན་ལས་འདའ་བའི་སྔ་རྟགས་སོ
མྱ་ངན་ལས་འདའ་བ་དེ་ལ་ཡང་གཉིས་ཏེ
ཡང་དག་པར་རྫོགས་པའི་སངས་རྒྱས་དང
མངོན་པར་རྫོགས་པར་སངས་རྒྱས་པའོ
དེ་ཡང་ཡང་དག་པར་རྫོགས་པའི་སངས་རྒྱས་ནི
ཕུང་པོ་ལྷག་མ་མེད་པར་སངས་རྒྱས་པའོ
མངོན་པར་རྫོགས་པར་སངས་རྒྱས་པའི་སྐྱེས་བུ་དེ་ལ
འོད་དང
སྒྲ་དང
སྐུ་དང
གདུང་དང
ས་གཡོ་བ་ལ་སོགས་པ་འབྱུང་ངོ
འོད་ལ་ཡང་རྣམ་པ་གཉིས་ཏེ
འོད་ཁྱིམ་གྱི་ཚུལ་དུ་འབྱུང་བ་དང
འོད་གྱེན་དུ་འགྲེངས་ཏེ
སྐས་ཀའི་ཚུལ་དུ་འབྱུང་བ་དང
འོད་ཁྱིམ་གྱི་ཚུལ་དུ་བྱུང་ན
ཞག་ལྔ་ནས་བརྟན་པ་ཐོབ་སྟེ
མངོན་པར་རྫོགས་པར་འཚང་རྒྱའོ
འོད་སྐས་ཀྱི་ཚུལ་དུ་འབྱུང་བ་ནི
ཞག་བདུན་ནས་བརྟན་པ་ཐོང་སྟེ
མངོན་པར་རྫོགས་པར་འཚང་རྒྱའོ
སྒྲ་ལ་ཡང་གཉིས་ཏེ
འུར་གྱིས་བྱུང་ན་ཞག་བདུན་ནས་བརྟན་པ་ཐོབ་སྟེ
མངོན་པར་རྫོགས་པར་འཚང་རྒྱའོ
ཐུག་གིས་བྱུང་ན་ཞག་བཅུ་བཞི་ནས་མངོན་པར་རྫོགས་པར་འཚང་རྒྱའོ
གདུང་ལ་ལྔ་སྟེ
ཁ་དོག་མཐིང་ག་ནི་རྣམ་པར་སྣང་མཛད་ཀྱི་ཞིང་ཁམས་སུ་སྐྱེ་སྟེ་མངོན་པར་རྫོགས་པར་སངས་རྒྱས་པའོ
ཁ་དོག་དཀར་པོ་ནི་རྡོ་རྗེ་སེམས་དཔའི་ཞིང་ཁམས་སུ་མངོན་པར་རྫོགས་པར་སངས་རྒྱས་པའོ
༣༨༠
སེར་པོ་ནི་རིན་ཆེན་འབྱུང་ལྡན་གྱིའོ
དམར་པོ་སྣང་བ་མཐའ་ཡས་གྱིའོ
ལྗང་གུ་དོན་ཡོད་གྲུབ་པའོ
བདོག་སྣ་ཚོགས་སུ་བྱུང་ན
སྐུ་ལྔའི་ས་ལ་ལྷུན་གྱིས་གྲུབ་པའོ
སྐུ་ལ་ཡ་ང་གཉིས་ཏེ
ཞི་བའི་སྐུ་དང
ཁྲོ་བོའི་སྐུའོ
ཞི་བའི་སྐུ་བྱུང་ན་སྣང་བ་འདི་འགགས་མ་ཐག་ཏུ་བརྟན་པ་ཐོབ་སྟེ
སྤྲུལ་པའི་སྐུ་འབྱིན་མི་ནུས་སོ
ཁྲོ་བོའི་སྐུ་བྱུང་ན་དེ་ཉིད་ལ་བརྟན་པ་ཐོབ་སྟེ
ཞག་ཉི་ཤུ་རྩ་གཅིག་ནས་སྤྲུལ་པའི་སྐུ་འབྱིན་པར་ནུས་སོ
རྟགས་དེ་རྣམས་མ་བྱུང་ན་སྐྱེ་བ་གཅིག་གིས་ཐོགས་ཏེ
ཡང་དེ་བཞིན་མི་འབྱུང་མི་སྲིད་དོ
དེ་བཞིན་དུ་སྒྲ་དང
འོད་དང
གདུང་དང
སྐུ་དང
ཐ་ན་རིང་བསྲེལ་ཡན་ཆད་འབྱུང་ངོ
ཞེས་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཆེན་པོ
གསང་བ་ཡང་ཁོལ་དུ་ཕྱུང་བའི་རྒྱུད་ཆེན་པོ་ལས
རྟགས་དང་མཚན་མ་བསྟན་པའི་ལེའུ་སྟེར་བདུན་པའོ
༄༨
དེ་ནས་བཅོམ་ལྡན་འདས་ཀྱིས་འཁོར་རྣམས་ལ་འདི་སྐད་ཅེས་སྒྲ་བསྒྲགས་སོ
བ་ཛྲ་རྡོ་རྗེ་སེམས་དཔའ
མུན་ཤ་ས་རི
༣༨༡
ས་ན་དྷི་དར་པ་ཨ་ཨ
ཞེས་བརྗོད་པས་འཁོར་རྣམས་ཀྱིས་ཡང་དག་པའི་དོན་ཐུགས་སུ་ཆུད་དོ
དེ་ནས་ཡང་འདི་སྐད་ཅེས་བསྒྲགས་སོ
བུད་དྷ་སར་བ་དྷ་ཐིམ་དྷ་ཐིམ་ཨ་ལམ་ཀམ་བྷ་ཨི་ཧ་ཨི་ཧ་ཨོམ་ཨ་ཧུམ་ཨ་ན
ཞེས་བརྗོད་ནས་མི་སྣང་བའི་ངང་དུ་གཤེགས་སོ
དེ་ནས་ཡང་གསང་བའི་བདག་པོས་འདི་སྐད་ཅེས་གསོལ་ཏོ
ཀྱེ་མ་ཀྱི་ཧུད་ཐུགས་རྗེས་ཟུང
ཞེས་གསོལ་པ་དང
ནམ་མཁའ་ནས་སྒྲ་འདི་བསྒྲགས་སོ
༣༨༢
ཤ་ས་མ་འ
ཨོམ་ཨ་ཧུམ
བ་ཛྲ་པ་ནི་སར་བ་དྷ་ཧ་ནི་ཨེ་བྷ་ས་པ་དྷ་དྷ་ཧུམ་ཧུམ་ཨ་ཨ
ཞེས་སྒྲ་བསྒྲགས་ནས་ཅང་མེད་དོ
དེ་ནས་གསང་བའི་བདག་པོ་ལ་བྱང་ཆུབ་སེམས་དཔའ་རོ་ལངས་བདེ་བ་ལ་སོགས་དང
ཐུབ་པ་དྲུག་གིས་འདི་སྐད་ཅེས་གསོལ་ཏོ
སྟོན་པ་མི་སྣང་བའི་ངང་དུ་གཤེགས་ན་རྒྱུད་འདི་ཅི་ལྟར་གཟུང་བར་བགྱི
ཞེས་གསོལ་ཏོ
གསང་བའི་བདག་པོས་བཀའ་སྩལ་པ
རྒྱུད་འདིའི་མཚན་ནི
རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཅེས་བྱ་བར་མིང་ཐོགས་ཤིག
༣༨༣
ཟུང་ཞིག
ཡང་རྒྱུད་ཆེན་པོ་འདི་སྣང་བ་སྟོན་པ་ཞེས་བྱ་བའི་ཡང་ཟུང་ཞིག
ཡང་ཐམས་ཅད་ཀྱི་དོན་འགྲོལ་བ་ཆེན་པོ་ཞེས་བྱ་བར་ཟུང་ཞིག
དགོངས་པ་ཁ་སྐོང་གི་རྒྱུད་ཆེན་པོ་ཞེས་བྱ་བར་ཡང་ཟུང་ཞིག
ཀྱེ་ཐུབ་པ་ཆེན་པོའི་འཁོར་རྒྱུད་ཆེན་པོ་གསང་བ་རྨད་དུ་བྱུང་བ་འདི་ནི་འཇིག་རྟེན་དུ་འབྱུང་བར་དཀའོ
དེའི་ཕྱིར་ན་བསྟན་པའི་སྙིང་པོ་འདི་རབ་ཏུ་ཆོངས་ཤིག
དོན་ཐམས་ཅད་སྐྱེ་བ་མེད་པའི་དབྱིངས་སུ་སྐྱོལ་ཅིག
མ་འོངས་པའི་སེམས་ཅན་རྣམས་ལ་དེ་བཞིན་དུ་སྟོན་ཅིག
བྱང་ཆུབ་ལམ་གྱི་སྒྲོན་མ་ངོ་ཤེས་པར་གྱིས་ཤིག
ཆོས་ཐམས་ཅད་བརྗོད་པ་དང་བྲལ་བའི་ངང་རུ་བསྡུས་ཤིག
རྒྱུད་ཐམས་ཅད་ཡི་གེ་མེད་པ་ཆེན་པོའི་རང་གི་རིག་པའི་རྒྱུད་ཆེན་པོར་སྐྱོལ་ཅིག
ལུང་ཐམས་ཅད་བསྟན་དུ་མེད་པའི་རྩ་བའི་ལུང་ཆེན་པོར་སྐྱིལ་ཅིག
༣༨༤
མན་ངང་ཐམས་ཅད་བརྗོད་གཞི་དང་བྲལ་བར་སྐྱོལ་ཅིག
བསྒྲུབ་པ་ཐམས་ཅད་བྱ་བྱེད་དང་བྲལ་བར་སྐྱོལ་ཅིག
སྤྱོད་པ་ཐམས་ཅད་མ་བཅོས་པའི་མཆོག་ཆེན་པོ་དང་ལྡན་པར་སྐྱིལ་ཅིག
བསྒོམ་པ་ཐམས་ཅད་གསལ་འགྲི་པ་འཛིན་པ་མེད་པར་སྐྱོལ་ཅིག
ལྟ་བ་ཐམས་ཅད་ཟང་ཐལ་ཅིར་ཡང་མ་ཆགས་པར་སྐྱོལ་ཅིག
འབྲས་བུ་ཐམས་ཅད་ཡེ་ཤེས་ཆིག་ཆོད་ཆེན་པོར་སྐྱོལ་ཅིག
དེ་རྣམས་ཐམས་ཅད་མི་གནས་པའི་ཀློང་དུ་དྲིལ་ཅིག
འཁོར་བའི་བྱ་བ་ཐམས་ཅད་ཐོང་ཞིག
ཡེ་ཤེས་ཀྱི་སྣང་བ་ལ་རྟག་ཏུ་འདྲིས་པར་གྱིས་ཤིག
ཡེ་ཤེས་འཆང་བའི་དུས་ཤེས་པར་གྱིས་ཤིག
བསྟན་པ་ཐམས་ཅད་ཀྱི་སྙིང་པོ་འདི་ཡིན་པར་ཤེས་པར་གྱིས་ཤིག
བར་མ་དོ་ལ་རང་གི་སྣང་བ་ངོ་ཤེས་པར་གྱིས་ཤིག
༣༨༥
གཞིའི་ཆོས་ཐམས་ཅད་ངོ་བོ་རང་བཞིན་ཐུགས་རྗེ་གསུམ་དུ་ཤེས་པར་གྱིས་ཤིག
ལམ་གྱི་ཆོས་ཐམས་ཅད་སྐུ་ལྔ་ཡེ་ཤེས་ལྔ་རུ་ཤེས་པར་གྱིས་ཤིག
འབྲས་བུའི་ཆོས་ཐམས་ཅད་སྐུ་གསུམ་ཕྱིར་མི་ལྡོག་པའི་འབྲས་བུར་ཤེས་པར་གྱིས་ཤིག
ངོ་བོའི་ཆོས་ཐམས་ཅད་གཞི་སྟོང་པར་ངོ་ཤེས་པར་གྱིས་ཤིག
རང་བཞིན་གྱི་ཆོས་ཐམས་ཅད་གསལ་བར་ཤེས་པར་གྱིས་ཤིག
ཐུགས་རྗེའི་ཆོས་ཐམས་ཅད་ཀུན་ལ་ཁྱབ་པར་ཤེས་པར་གྱིས་ཤིག
ཡེ་ཤེས་ཀྱི་ཆོས་ཐམས་ཅད་མ་འདྲེས་པར་ཤེས་པར་གྱིས་ཤིག
འོད་ཀྱི་ཆོས་ཐམས་ཅད་འཛིན་པ་མེད་པར་ཤེས་པར་གྱིས་ཤིག
ཟེར་གྱི་ཆོས་ཐམས་ཅད་སྤྲོ་བསྡུ་མེད་པར་ཤེས་པར་གྱིས་ཤིག
༣༨༦
རིག་པའི་ཆོས་ཐམས་ཅད་བདག་རྟོག་གི་བློ་དང་བྲལ་བར་ཤེས་པར་གྱིས་ཤིག
དེ་བཞིན་དུ་ཆོས་ཐམས་ཅད་འགག་པ་མེད་པར་སྐྱོལ་ཅིག
འགག་པ་མེད་པར་ཅིར་ཡང་སྣང་བར་སྐྱོལ་ཅིག
ཅིར་ཡང་སྣང་བ་སྐྱེ་བ་མེད་པར་སྐྱོལ་ཅིག
སྐྱེ་བ་མེད་པ་འགྲོ་འོང་མེད་པར་སྐྱོལ་ཅིག
འགྲོ་འོང་མེད་པ་གཉིས་སུ་མེད་པར་སྐྱིལ་ཅིག
གཉིས་མེད་གསལ་བ་མཐའ་གྲོལ་ཆེན་པོར་སྐྱོལ་ཅིག
དེ་བཞིན་དུ་ཆོས་ཐམས་ཅད་ཅིར་ཡང་མི་རྟོག་མི་སེམས་པར་སྐྱོལ་ཅིག
ཆོས་ཐམས་ཅད་གསལ་ལམ་ཡེངས་པར་སྐྱོལ་ཅིག
ཅེས་བརྗོད་ནས་གསང་བའི་བདག་པོ་ཡང་མི་སྣང་བའི་ངང་དུ་གཤེགས་སོ
དེ་ནས་ཡང་ནམ་མཁའ་ལས་སྒྲ་འདི་སྐད་གྲགས་སོ
བ་ཛྲ
༣༨༧
པ་ནི་དྷ་ཏུ་ཤི་ཧི་རི་མ་ཧ་ས་ནི་ཧ་དྷར་མ་རཏ་ན་མ་ལ་ཨ་སིང་ཨ་དྷ་ཏུ་ཤ་ཨ་དྷ་དུ་ཤམ་ལ་ཨ་ཨ་ཨུ
ཞེས་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཆེན་པོ་ལས
རྒྱུད་ཡོངས་སུ་གཏད་པའི་ལེའུ་སྟེ་བརྒྱད་པའོ
དེ་ནས་མཁའ་འགྲོ་མའི་ཚོགས་རྣམས་རང་རང་གི་འཁོར་རྣམས་ལ་འདི་སྐད་ཅེས་གདམས་སོ
རྒྱུད་འདིའི་མེ་ལ་ཚོ་བྱའོ
དམ་ཚིག་ཉམས་པ་རྣམས་ཀྱི་གཤེད་མ་བྱའོ
ཞེས་གདམས་ནས་ང་རྒྱལ་གྱི་སྒྲ་འདི་སྐད་བསྒྲགས་སོ
ར་གོ་ན་ས་མ་ཡ་སྙིང་ཕྱུང་བྷྱོ་བྷྱོ
ཞེས་བརྗོད་ནས་མི་སྣང་བའི་ངང་དུ་གཤེགས་སོ
༣༨༨
བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་བུ་ལོག་རྟོག་སེལ་བྱེད་ལ་སོགས་དང
ཐུབ་པ་དྲུག་དང
མི་མ་ཡིན་གྱི་འཁོར་རྣམས་རྗེས་སུ་ཡི་རང་ཞིང་མངོན་པར་བསྟོད་དོ
ཞེས་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཅེས་བྱ་བ་ཡང་གསང་གབ་སྦས་ཀྱི་རྒྱུད་རྫོགས་པ་ཆེན་པོ་གཏན་ལ་འབེབས་པ
བཅོམ་ལྡན་འདས་གཞོན་ནུ་དཔའ་བོ་སྟོབས་ལྡན་གྱིས་དུར་ཁྲོད་ཆེན་པོ་མེ་རི་འབར་བར་གསང་བའི་བདག་པོ་ལ་སོགས་པ་རྣམས་ལ་རང་རང་གི་རིག་པ་དངོས་སུ་བསྟན་པའི་བཀའ་དམ་པ
གསང་བའི་རྒྱུད་ཆེན་པོ་རྫོགས་སོ
རྒྱ་རྒྱ་རྒྱ
མཁས་པ་ཆེན་པོ་བི་མ་ལ་མི་ཏྲས་སྒྲ་རང་འགྱུར་དུ་གསུངས་པའོ
སྔགས་ཀྱི་སྲུང་མས་སྲུངས་ཤིག
འགྲེལ་པ་དོན་འགྲེལ་ཕྲ་བཀོད་བྱ་བ་ཡོད
སྙིང་གི་མེ་ལོང་ཉིད་ལ་མ་བུ་བཞི
དགེའོ་དགེའོ་དགེའོ