မာရဝတ္ထု
၂။ မာရ်နတ်ဝတ္ထု
သုသုခံဝတ ဇီဝါမအစရှိသော ဤတရားဒေသနာတော်ကို မြတ်စွာဘုရားသည် ပဉ္စသာလမြို့ ပုဏ္ဏားတို့ရွာ၌ နေတော်မူစဉ် မာရ်နတ်သားကို အကြောင်းပြု၍ ဟောတော်မူလေ၏။
ဗုဒ္ဓအား ဆွမ်းမလောင်းရန် မာရ်နတ် တားခြင်း
တစ်နေ့သ၌ မြတ်စွာဘုရားသည် ငါးရာကုန်သော သတို့သမီးတို့၏ သောတာပတ္တိမဂ်ရကြောင်း ဥပနိဿယကို မြင်တော်မူ၍ ထိုရွာကို အမှီပြုလျက် နေတော်မူလေ၏။ ထိုသတို့သမီးတို့သည်လည်း တစ်ခုသော နက္ခတ် ပွဲသဘင်နေ့၌ မြစ်သို့သွား၍ ရေချိုးပြီးလျှင် တန်ဆာဆင်ခြင်းနှင့် စပ်ကုန်သည်ဖြစ်၍ ရွာသို့ရှေးရှု သွားကြလေကုန်၏။ မြတ်စွာဘုရားသည်လည်း ထိုရွာသို့ဝင်၍ ဆွမ်းအလို့ငှာ လှည့်လည်တော်မူ၏။ ထိုအခါ မာရ်နတ်သည် အလုံးစုံ ရွာ၌နေသော သူတို့၏ ကိုယ်၌ပူးဝင်၍ အကြင်အခြင်းအရာဖြင့် ပြုသည်ရှိသော် မြတ်စွာဘုရားသည် တစ်ယောက်မမျှသော ဆွမ်းကိုလည်း မရ၊ ထိုသို့သော အခြင်းအရာဖြင့် ပြုသောကြောင့် အကြင်အကြင် ဆေးမြဲတိုင်းသော သပိတ်ဖြင့် ထွက်ကြွခဲ့သော မြတ်စွာဘုရားကို ရွာတံခါး၌ရပ်လျက် “ရှင်ရဟန်း- ဆွမ်းရပါ၏လော”ဟု လျှောက်ဆိုလေ၏။ “ယုတ်မာစွာသော မာရ်နတ်- အသို့နည်း၊ သင်သည် အကြင်အခြင်းအရာဖြင့် ပြုသည်ရှိသော် ငါဘုရားသည် ဆွမ်းကို မရရာ၊ ထိုသို့သော အခြင်းအရာဖြင့် ပြုသည်မဟုတ်လော”ဟု မိန့်တော်မူလျှင် “မြတ်စွာဘုရား- ထိုသို့ဖြစ်မူ တစ်ဖန် ဝင်ကြွတော်မူကြပါလော့”ဟု ဆိုလေ၏။
ထိုခဏ၌ သတို့သမီး ငါးရာတို့သည် ရွာတံခါးသို့ ရောက်လာကြ၍ မြတ်စွာဘုရားကို မြင်လျှင် ရှိခိုးလျက် တင့်အပ်လျောက်ပတ်သော အရပ်၌ တည်နေကြကုန်၏၊ မာရ်နတ်သည်လည်း မြတ်စွာဘုရားကို “မြတ်စွာဘုရား- ဆွမ်းမရကြကုန်သည်ရှိသော် ဆာလောင်ခြင်းဟူသော ဆင်းရဲခြင်းဖြင့် နှိပ်စက်အပ်ကုန်ပြီလော”ဟု လျှောက်ဆိုလေ၏၊ ဘုရားရှင်သည် “မာရ်နတ်ယုတ်- ငါတို့သည် ယနေ့တစ်စုံတစ်ခုကို မရသော်လည်း အာဘဿရဘုံ၌ မဟာဗြာဟ္မာကြီးတို့ကဲ့သို့ ပီတိဟူသော ချမ်းသာဖြင့်သာလျှင် လွန်စေကြကုန်အံ့”ဟု မိန့်တော်မူ၍ ဤဂါထာကို ဟောကြားတော်မူလေ၏။
ဒေသနာတော်
ပီတိဘက္ခာ ဘဝိဿာမ၊ ဒေဝါ အာဘဿရာ ယထာ။
ပါပိမ၊ မာရ်နတ်ယုတ်။ ယေသံနော၊ အကြင်ငါတို့အား။ ကိဉ္စနံ၊ ရာဂစသော တစ်စုံတစ်ခုသော ကြောင့်ကြခြင်းသည်။ နတ္ထိ၊ မရှိ။ တေမယံ၊ ထိုငါတို့သည်။ သုသုခံ၊ အလွန်ချမ်းသာစွာ။ ဇီဝါမ ဝတ၊ အသက်ရှည်ကြရကုန်၏တကား။ အာဘဿရာ၊ အာဘဿရဘုံ၌ ဖြစ်ကုန်သော။ ဒေဝါ၊ ဗြာဟ္မာတို့သည်။ ပီတိဘက္ခာ ယထာ၊ ပီတိဟူသော အစာရှိကုန်သကဲ့သို့။ မယမ္ပိ၊ ငါတို့သည်လည်း။ ပီတိဘက္ခာ၊ ပီတိဟူသော အစာရှိကုန်သည်။ ဘဝိဿာမ၊ ဖြစ်ကုန်အံ့။
ဒေသနာတော်၏အကျိုး
ဒေသနာတော်၏အဆုံး၌ ငါးရာစလုံးလည်းဖြစ်ကုန်သော သတို့သမီးတို့သည် သောတာပတ္တိဖိုလ်၌ တည်ကြလေကုန်၏။