აბა მუჭო მუოსკიდა
კოჩი, რინაშ დაჭყაფუ რე:
ორანი დო სია ნანა!
მეტი კოჩი აბა მუ რე,
თოლსინთე დო სიამბარა!
მოთას ბებიშ ხე ოჰამუ,
მართალი რე ენა ვარა
დო მოთაშა ბრელ უჩამუ
ლუკა შურიშ მენაბარა.
მოთას მუთუნ ვემშუძუდუ,
ნახაჩქა დო ვართ ნაბარა.
ჸუდეს ბებიშ დაჩხირ რძუდუ,
ნახანდილა, ნაცხვაბარა.
მოთას ვაუჩქ ბები მუ რდუნ,
სქუათ ვაურდ გენანგარათ
დო თიცალი მოთა ურდუ,
მეუჩამუ სიამბარა.
მოკო ღორონთს ვეჩიენი,
ბგორუნქ, ვაბძირჲ ცაში კიდა.
ბები ჩხორო ვერჩქინენი,
აბა მუჭო მუოსკიდა?!
დიდა-მუმა მიჸორს მორეთ,
ჯიმალეფი, უმოსის და...
არძო ბებიშ ნარდი ვორეთ,
აბა მუჭო მუოსკიდა?!
ორაგადეთ ორე ეფი:
ბებიჯგუა სო რე დიდა?!
ჟირ ხე მიღუ, ჟირ თოლეფი,
აბა ნამუს მუოსკიდა?!
ბები მუჭო ვამიჸორდას,
ქიანაშა ვაბთირენი...
ათე გური სქანი ქორდას,
ჩქიმოთ ხოლო ართი რენი.