აგაგაშ ელნაჩემი
გოთანდუ, დუდი ნორჩალიშე
ძიუთ გეგთვოსერგელე,
კიდას შპალერი გამკოფსოფი
პასტას ქუმუხერკელე.
მუზას დუძახი, მიბგორე
ვაბძირი... ვორწყექ, აქ ვარე;
ბურდღა ლერსეფი, მოვუსვი დო
წუთის გეგლაფსაქვარე.
მარა ეცალ ლერსეფით
სო გოკო დუდი მიშეღე,
ნამ ჟურნალს ბეშტუე დო
ნამ წიგნიშა მიშეღე.
თეშვანობას მიდგარენქ
გიმოძახუ უნელო;
თიცალ კვეცირ ხონარ უღუდუ
შურქ ქომიფუ ფუნელო.
მიწუ: „წიე ვებორჯა,
აკიკოროფი ჰონია;
ჩელა რაშის ქუმნაქენჯი
შარა ქოძირი ბონია.
შურს ვა ინორჩანს თი ჯაშ
მუს რე ჩხვინჩხვის გორუნქინ;
სქან გურიშ გითნაფალა
გვიგვილს დიხათ ფორუნქინ.
ონჯღორე რე ჯიმაგე,
შხვაშ ნჯოლას უსქუდე;
ვართ თელეფს ოკათუდე,
ვართ ღურელეფს უჯგუდე.
თოლი გელანჯი, ქიგიშინი,
მი რექ, სოვრე მოურქინ
ამდღა სო გიტატურუქ დო
ჭუმენერშო სო ურქინ.
ხაჯალურეფ გაკოტახი
ომაღურეთ მირულე;
ირო ვეგლეჸონა ჸას,
გიბაღუ, მუთ დირულე.
გიკურცხინე, გამწოჟვენგი
კინოხონეფს გუხარი გური;
შურშა ქინიკარკატე
საჸოროფო მარგალური.
თენა თქუ დო გოსისონდუ,
ასე ხოლო ვა მიჩქ მი რდუ:
თი ხვამელიშ ნაზუკოლაქ
გურს პეულცალო მირდუ.
ნინა გელაბდაჩხირე,
ქაღარდეფს მოვუკინი;
ქიკნიპკართე ხეფორჩა დო
პასტას ქუდულაჸაფე კინი.
მარგალურო პჭარი დო პჭარი
ანდანერო გუვამორსი,
ნაკვაჩხირი გინვოტე,
ალდაჩხირი ქუდუვორზი.
29.05.2005.