აგოთანაშ ია-ია
ია – იას ქიგვოქარგა
აიეტიშ ჩეკაბას,
აგოთანას ქუგურუა
მელანიში მაფერას.
ჩილამურსუ ქუხოლუა
შუმნაშუა სუ-ჯუნას
ჭარა მარე მანწერალი,
თუთაშემსუ უგინაფ.
არქანეფი ივალუნა
თოლონჭეში დალიას,
კველა- დინცხო აწყორუნა
ლაზურიში ზღვაიას.
საწიმიშო მიკონათუნს
ჭყონდიდიში ტებიას,
თას - კიბირი დორხინაფე,
ვარე მორსხა გერიაშ.
ოდიარეს მიარჩქილე
მაფა – ბჟაში ჩე სქილა,
ჸოროფა მოძ ბედუდური
კირიბია მედიას.
მეცარეში ორე –მაფუს
გაგორგოთუ ვაია,
იზუაფუ, მაშქვიდაფუ
ლეტა გოძუ აიას.
...ია – იას ქიგვოქარგა
აიეტიშ ჩეკაბას,
ნაცოდარო მიოხედას
ტერიშ ჭირქა -ნახანტას.