აკოწყორილი
ჸათე სისმარი აწმავალუ თოლიშ მონიას,
როხო გებჯანუ მასქურ ვარ დო, მონკა ბორია.
ჸათე გორჩქინუს ვა ნოღვენო სოთინ დორია,
გურ მინძგერც ასე, გევორექჷ აკოკირილი.
სერდაშ ბორზალით გური მაფუ აკონწკირილი.
თუთას ქუვართი დო ცაშ იშო აკიპწყორია.
მოჟვეპურელი მუნაფა რე ჭვათო მოწენცჷ,
ოწმახ ვორდი დო თაქჷ კინე თოლც გინოჲლუა,
ართო ნოთელი უკმელა რე, ირო გორწყექჷ,
სკანი ძირაფა ქობჭარაფუ, სკანი გოლუა.
ოჭირხოლარო ნინა მუჩი, – ქიანას მობდვი,
მუთ მიძირჷ დო მუთ ჩქიმო რდჷ ალაგორილი,
დიო აკოფშქვი, მოკოდ, ვამკოდჷ, კინ ჩხორო გოფრთი,
გურიშ ლერსეფით გუვოტიბე დიხა ჭორილი.
ასე ოხვამეს ჩქიმი შური მოულამუანც,
ენკერიასჷ მუწოჭველე, მუწონკირელე,
ტანც ცირაცალო პეული რე მოუნარუანც,
ჸათე თელარა ირიათონც მუკორცვილი რე.
პირშალ პიორი დინმოჯინე, თოლ ვადომთხინუ
შურით შუშელი, გორჩქინაშე ქაწუდირთინი.
პოპორ ტობა რე ასე წოხლე აწმარხინუნი,
მოჟენთელერი ცა დო დიხა აკოდირთუნი.
ჟვატა ჩანარი გეგნუხანტუ ათე ხიმფორცჷ,
კოდმე ტკილიე გვალო რინა, ართო კაპანი.
ვა უჩქ ბორიას მუშენ ირქენცჷ, მუშენ იბორსუ,
ცაშ ორტყაფუსჷ აკა ართშა ქიმმოღაფანი.
ტანტალერიე ანი-განი, აკორჩხილიე,
არძა საგანი გურც მებგუ დო ზისხირ იზირუ,
ცა დოდირაკე დო გაჩქვენუ ითამ შქვილიე,
შქვიდელ ჸოროფას გურიშ იშო სოთა მიძირუ.
შურიშ ნთქალუა ქუდმაცალი, ვა მიკეკუა,
ჭიჭე ქაქინი ქიდიბჭყინი, თენათ ქოძირი.
აფხას გერდელი ცა მომიღუ, ქიმიფქექუა,
ა, ჩქიმ ლერსი დო ჩილამური თიშე დოწირი.
ტან მახუაფუ, ტანიშ იშო ხოლო ტანიე,
გილაბგორუნა სისმარეფი აბორჯებული,
ასა-გასა რე, მუხური რე, ხოლო განიე,
დო თიშ იშოთჷ მიარე რე მიკოტებული.