ანტუან დე სენტ-ეგზიუპერიშ ხვამა
ღორონთი, ირი დღაშ ნძალას რთხულენქ, მუთუნ თოისერს დო მირაჟეფს ვარი. ჭიჭე, წიმი კუჩხიშ გინოდგუმაშ ხელუანობა ქოდუმოგურე.
გურგოჩამილი დო გაღიერი ქოპი, თიშო ნამდა ირი დღაშ მიარეფერუანობას, თი კილაძირაფეფს მეფჩე თოჸუჯი, ნამუეფქუთ ჩქიმ ფსუაშ ჩანაფა შილებუესინ.
ქოდუმოგურე, ჩქიმ რინაშ ბორჯიშ თეშ გორთუალა, მუჭოთ ოხვილური რენ. ქომუჩი ანჯა, თიშო ნამდა თარიშ გიშასხუნუა ქოშიბლებუე მაჟირახარისხამიშენ.
დუდიშ აწოჭოფუაშ დო კონიერობაშ ღიაბის რთხულენქ, თიშო ნამდა რინაშ ზას ვეგლაფუბრინუნდე დო ვეგლებფიორუდენ, ვარინ გაღიერო გობკოროცხე ირი დღა, ვორწყედე კოთაკონკეფს დო თოლოწონდეს დო მინშა იშენ გეკლაბძირე შვანი ხელუანობათ ჰამებაშონ.
ქომიმეხვარი თიშ გურიშ გოჩამას, ნამდა ვართ ულირბორჯიშე, ვართ მუმალბორჯიშე ნარტობუა ვა შილებე ორდას ჯგირიშ მუმაღალარინ. ქომიმეხვარი ვორდე ათაქ დო ასე დო ქიბგინე ათე მერქა, მუჭოთ ირფელშე უმოს გურიშ გაჩამალი მუთუნინ.
დოფთხილე თი უგუჯარჯუ რწუმაშე, ნამდა შურდგუმას ირფელი ლექინი ოკო ორდასინ. ქომუჩი სინთუან გაღა, თიშო ნამდა ქიგებგენ, აკოკვაჭილობეფი, დონთხაფეფი დო უმუწუძინუობეფი ხვალე თელარაშ აკმადგინალი ნორთი რე, ნამუდგიეფიშ მეშქაშალათ ჩქი იბრდუთ დო იბძინანთინ.
ქოგუმოშინი მინშა, ნამდა გური დო გაღა შხირას ართიანს ვეგლენგარა დო ოლიმუნა ართმაჟიასინ.
მუშ შვანს თინერ ადამიერი ქომომიჯღონი მინშა, მისით გურამობა დოუბაღჷ, ვა დუმაღორას დო ირფელი თეშ ქომიწუას მუჭოთ რენ, მარა თენა ხვალე ჸოროფათ ქიმინასინ!
მიჩქჷ, ნამდა ბრელი პრობლემა მუშით გინმიჭკირუნ, ათეშენ მონჭირაშ ანჯა ქომუჩი.
სი გიჩქჷ მუჭო ვოხვილუთ ჩქი მაჸალობასინ. ქომუჩი კვარზალი, ვორდე ბედიშ ათე ირფელშე უმოს სქვამი დო ჩეჟიერ ძღვინიშ ოჭარაფალინ.
ქომუჩი ქვერსემ ფანტაზია, თიშო ნამდა მუშ შვანს, ადამიერეფს ოხვილურ სიტიბა ქომეფჩენ.
თინერ ადამიერო გინმოშქვი, მით შილებუანს თინეფიშ გურს ქოდინანჭას, ნამნეფით არძოშე უმოს „გიმე“ გერენან.
დოფთხილე შქურინშე, ათე თელარას მუთუნ ვა გიშებტუენ.
ინა ვა მუჩა, მუთ მა მოზალუნ, ვარინ თინა, მუსუთ დასურო ვოხვილუქინ.
ჭიჭე ნობიჯგეფიშ ხელუანობა ქოდუმოგურე ღორონთი.