არძა ბორჯით თოლეფ
არძა ბორჯით თოლეფ მაფ ეფშა
დო ჭუბურიშფერ თუმათ აკოკირილი
ბჟა მოპუნც ხეთ.
გეკობღვარუენი, პიჯიშე მუნაფეფ გეკომცენს.
შუშელო ვორწყექ ბულიშ ჯას,
დო თის ჩქიმ რინაშ კვახჩას გუთმუოქუნა.
მურიცხეფ უკახალე ირთუნან
დიხას ჟირ-ჟირო რჩქინდუნა ადამიერეფი.
მერქას თუმა დარჩიოლებ,
მუმალიშ იშო, ოსინთეშე რჩინ კოჩცალო იძირებე.
მა ბგურაფულე ადამიერობას ღორონთიშე დო
უმოსო მახიოლე ადამიერშე ხოლო ქოდიბგურუანდე
მუ რე ღორონთინ თის.
ჩქიმ თოლიშ წყურგილეს ვეშკვიდუ ნამთინ პეული,
ნამთინ ფურინჯი ვენოლაფე თექ.
ხვალე ქინოშკირატე გოჯოგაფა.
ჩქიმდე იჭყაფუ მურიცხი,
ჩქიმდე იჭყაფუ ჩე ფერი.
დო გვალო ვეგიპინენ თიშენ ხე ოკო იბრქიე.
ზუღაშა მითინც ვენუჸოთამუქ,
ღულა სარკეშათ ვენომიჯინუ მა.
ლაიტშორო გოფუფრჩონი ჩქიმ გინაფეფ
დო კალათიაშა ვენომირღვაფუნ თეშ
ჭუაშ მაღაზას დოფჩვი მუმალშო.
ჩქი უჯინეთუნ თის, ბორჯ ხოლო უჯინე.
მა ზიტყვეფ ჩქიჩქუეფშორო მაფ ნარდი,
თინეფ აკოცენდესჷნ- ნაგორა. თინეფ ქიდელახებუდესჷნ
ლერსით შაშილ ოჭმარეს გითმუფინანდი ჸვაშა დო თინეფც გარზანდჷნ
თი დაჩხირი ჩქიმ რსხულშა მიშამიჸონაფ
დო ათაშ ამდღარ დღაშა ქომიპონი.
სი გაჩინებაფა ხოლო ვა გოკონო?
ჭუჭელე ხო ვარე დორცხვაცხვასჷნ?
მა სქან ინოხ ვორდი ირო ინოფულირი.
სი ნიში მომირულაფენ იმწკჷმა, მა
გვალაშ ჟი ვორდი მუკოჩემებული ბჟაშორო
დო ჩქიმ ზისხირ მუნერ რდუნ,
თიშნერო ოკოდ ორთას ხოლო მოთუაფა.
ჩქიმ ტანშე ეფურინელ ტორონჯეფ ვა გიჭყოლიდუა,
ჩქიმ ჸუდეს ვა მილამიხუნუაფ თინეფ მა.
უჩეფ რდეს დუდშე, ჭვათ-ჭვათო ვარჩიალი, ვარჩიალი
დო გოუტე სქანდა უგუთებ მაფურინჯეფი.
ზუღაშა მითინც ვენუჸოთამუქ,
ღულა სარკეშათ ვენომიჯინუ,
ჩქიმ ნოტეხეფ სქან ძიცა რე.