აფანიაშ ფანია
ცა დო ზღვა დო დიხაშ სანძღო თირსუ იშო აკულას,
ენა ღორონს აკუნწყუ დო, ვაკმანწყუე ლერსო მა.
თაქ მესეფით ქიმშადინუ, მი რე გიშმაწურაფალ,
უსუალე კოჩიშ ჭუა ვანჭუ შორიშ როიალს:
,,დო-რე-მი-ფა ქისიმე დო, ,,სოლ-ლა-სი-დო მეუღ ქარს,
მუთი რდუნი, ქომიჩქუ დო ლიაქ მუნერქ იყუას..
გვალო მემოტუანიო შვან დო კვათაშ მასანძღვალქ -
ეში გამაშ გორუასუ ყინქ ბირცხაშა გალმაკათ.
სუმი ნირსიშფერი შური შორშე გუმოცქვირინანს,
ვარი ზღვაშე, ვარი ცაშე მუნაველი ოკო რდან,
მუთ უმოსო მაკინესუ, შიშიქ ქუგმოდირთუ ტანს -
ართ კაკალსუ თოლ ვაძირე, ფიჭვი გოფითქილი აფ.
კუჩხუჩაფლეთ მოჩართუნა დღარი თირიშ ნარზვენას,
ხე შალარშა ქუგნა მარა, ნამთინესუ ჩხურუ ვაფ.
მარწკინდეფ დო ბაწარეფით, ღურელ ჩხომით ქიფჩინ მა,
სუმიხოლოქ ქუგმაშინუ, ოჩამჩირეშ სუმ ხანგაქ:
ყოროფაში გინნალასა ფაქი შანას შაყარანს,
ტყურაია მარწკინდემსუ ჭითა ჭაპუს მაჭაჭანს,
არძა კისერს გიობუდო, ხეშა აკას ვემკინჭანს -
,,მიდგას ელუნ, მალას მურს დო ილორს თინა ქუმაგანს.’’
გურაფაში გინნალასა ბოჩი ქვიშას ხანტურანს,
თოლშა მუთუნქ ვაღოლუნი, ყუჯი ირო ძგიბილ აფ.
კისერს თოკი გაკარკატუ, მიშქვანსუნი, მუნჭირანს,
თელს ორკინუ მუშობიეთ, ქოკითხენი - ,,ჯერღვ იქანც.’’
ბურდღა მეჩხომემს მეუხე, ართ კიბირი უძგიძგანს,
შურო თოლი გეიოღესდა, ვედრას გიმე უხუანს,
შურმალაფ დო ღურელ ჩხომეფს იშო ზღვას ურთინუანს,
ნაშქვიდერი მუმაშ შურსუ ცოდემს ეუქექუანს.
მეთირიაშ გიწნაოთემ ძგიძგონილ ჩხომს შურს უბარს,
ართ ქობალი ქიმეჩესდა, აფანიას ინმურღვანს,
წყარქ ღურელო გეკაათდა, ინძგერსუ დო ალანგარს,
ოსქირაფუს - მოსემს ქართუ, დოხუნს, თოლსუ ქინურღვანს.
,,მაფა ჩხომიშ ბრალი გეძუ, მოსას თიშენ მიშეხართ-
მუმაშ ცოდეფ მუ მონკარენ, ენა ვაგინ ბრელ მითას,
ხოლო ფაქის ქეცოდებუ, ჭიჭეს ქუმუფერუანს,
ხოლო ბოჩის უწინს ვარა, ოძიცეთუ ვაუბაღ შხვას.
...ართი - თირსუ გუმოფართხანს, ,,მიტიბუანს ყინილ ყვას,
მაჟრა - თოკიშ ნასოფერა წონწის მიჭირინუანს,
მასმა – თირიშ რტუაფილი ქობალს მისქილიდუანს:
აფანიას ქომგურესო, ვარ მეტებულ შურსუ მა.
ესუ ხოლო გინიბღანდი, გურ დომიჭუ გვალო შხვაქ-
ჩქიმ ბაღანას გეგთუტყობუ, ზღვაშა თოლი ქასქილად,
ფუგა–გამა მეუტებუ, გორუნს შხვაში გამას თაქ,
ქირსხენსუდა, ხოლო დიდა, მა იშ ქეკომდინუაფ.