ახვამილაფა
ართ დროს ართი კოს ართი სქუა ნოჸვერდჷ .ოდო, ოსური ქიმიჸუნია, ურაგადჷდჷ მუში სქუას. ვა მიპუნანაქია! ურაგადჷდჷ სქუა. ეჩი დო ვითოჟირი წანაშა ქჷმერთჷნი ეფერ ჟანს, -ამუსერ ქჷმიპუნანაქ ოსურსია! ოდო ცხენს უნაგერი ქჷგედგჷ თე ბოშიქ დო ქეგედოხოდჷ დო შარას ქიგიაჸუნჷ. შარას მუჭო მეურსჷ, მეფირქენს: - სოლე მიპუნა ამსერი ოსური? მერაგადანდჷ ხვალე შარას. ქიმერთჷ დრო დო ხანქ ონდღეშა დო წოხოლე ქაუხვადჷ ბოშურო მონწყილი ცირაქ.
- გამარჯობა სქანია, უწუუ.
- სო ურქ ბოშია? უწუუ ათე ცირაქ, ბოშურო მონწყილი ცირაქ.
- მა სო ურქ-და, ეჩი წანერო გინიფრთიანი, უკული ირო მირაგადჷ დჷ ჩქიმი მუმა: ოსურ ქჷმიჸუნია. ირო ვარიას ურაგადჷდი მა. ასე ეჩი დო ვითოჟირი წანერო გინიფრთიანი, სადილობაშ დროს: - ამსერი მიპუნანქ ოსურს მაქ, უწიი ჩქიმ მუმას. ქიგებდოხოდი ცხენს დო მოლაფრთი აშო. ოდო, კოჩი ვა ბძირი, სქანი მეტი. ათე ცირაქ უწუუ:
- მა ხოლო თეშ მაღოლჷ. ოდო ამდღა უწიი ჩქიმ მუმას: - ამსერი ქომონჯიშა ურქ მაქ. ოდო, გინოფრთი დო მოლაფრთი აშო. სქანი მეტი კოჩი ვა მიძირჷ, ოდო, ჩქიმი ქომონჯი სი ჸოფერექ დო მიჸუნი ასე. ე ბოშიქ დიირთჷ აშო დო მოლეჸონჷ, შარას აუხვადჷნი, თი ცირა. ჸუდეშა ხოლოშა ქჷმორთჷ. მეძობელიშ ჸუდეშა მინიილჷ დო მუმას მეუჩქჷ კოჩი:
- ასე, ამსერი მოპუნს ოსური, ოდო, დჷმოხვამილეე კამპანია!
მუმას ძალამ ჯგირო ახიოლჷ. დოჸვილჷ ხოჯი, ქჷდააპეჯჷ კოჩი, გოუტუუ მაყარე დო მუში ნოსა ქჷმიჸუნჷ. იმ სერს კამპანია უღუდეს დო, უკულ იშო ქჷდიინჯირეს. ოდო ბოში დო ძღაბიქ დიირულეს, ქილაჸაფესჷნი უკული. გოკურცხუ თიწკჷმა თე ცირაქ დო ბოში გააკურცხინუუ: - ასე სქუა მაშინია! (ართო დიინჯირეს თიმ სერს). ოდო სქუაქ ქააშუუუ თი საათის, ბოშიქ. თე ცირაშ ქომონჯიქ გედირთჷ დო იშო მიდეჸუნჷ თე ბაღანა, ამსერ დებადჷნი თენა, დო ტყას ქიმშააჸოთჷ იშო დო მიოდჷნუუ. ოდო ათე ბაღანა სქვერქ ქოძირჷ, ძუძუშა ქჷმიიხუნუუ თინ სერს. მოლართჷ ბაღანაშ მუმაქ, ჸუდეშა ქჷმორთჷნი, იშო გოთანდჷ. თე ამბექ იჸუუ ამსერი, ბაღანაქ დებადჷნი, კოჩის ვა უწუუ. მაჟირა სერს ართო ქჷდიინჯირჷ თე ბოში დო ძღაბიქ, ხოლო შქასერს გოკურცხჷნი, მაჟირა სერს:
- ასე ხოლო მაშენია ჩქჷჩქჷ. გედირთჷ თე ბოშიქ ხოლო დო ჩქჷჩქჷქ დებადჷ, ბოშიქ. ხოლო მიდეჸუნჷ ტყაშა, იშო ქიმშაჸოთჷ ტყას ბაღანა. ინა ერცქენქ ქჷმიიხუნუუ ძუძუშა.აშო მოლართჷ ე ბოშიქ დო ჸუდეშა ქჷმორთჷნი, გოთანდჷ. მასუმა სერს ხოლო ქჷდიინჯირესნი, ხოლო თეში აღოლ ოდო, მიდეჸუნ დო ტყას
ქიმშააჸოთ მასმა ბაღანა ხოლო. ინა ირენქ ქიმიიხუნუუ ძუძუშა. ოდო ეთი სუმ-ხოლო ბაღანეფი თი ტყარენქ მორდეს ძუძუთ.
უკულნეშის კოჩიშ სახე უბარგეთ ტყას ქჷდოსქიდეს, უდაჩხირეთ ხოლო.
სოფელიშ ბაღანეფი ორინჯის თხილანდეს, თინა თინენქ ქოძირეს; თინა ვარდუო, საკვეცი უღუდუ სოფელიშ ბაღანენს. თინა თინენქ ქოთხუუ სოფელიშ ბაღანენს ტყარი ბაღანენქ. ქაშქვილი დო ქასაგანი ხოლო უღუდ სოფელიშ ბაღანენს; ხოლო თინა გაიწუღეს. მიდართეს იშო ტყაშა კჷნი თი ტყარი ბაღანენქ. ჸვილჷნდეს ტყარს დო ჭკომუნდეს თის დო ირდუდეს თით. ოდო ტყების ტანიშა მუკიიქუნანდეს. ირდუდეს თენერო. მიირდეს სუმხოლოქ. იჸუეს შეძლებულქ თი ბოშენქ. ართი დროს ქოძირეს გვალაშ ჯინჯის ირემი, მოკოხერდჷ თექ.
- ასე თის ქუოჸოთანქ ქაშქვილი დო ქასაგანსია!
თი უკულაში ბოშიქ.
- ოდო დოპილუნქია თქვა ქჷმიღანთჷ და. ქააჸოთჷ, ოდო, ქჷმოხვადჷ დო დოჸვილჷ იშო. მოლერგინჷ თი ირემქ აშო დო თაქ ქჷმიირგინჷ ბოში წკჷმა. ეთი საგანქ თექი ტკირს ქიმიაგჷ. თექ ქიმთოშქჷ. ეკიილჷ თი ბოშიქ თი საგანიშ გჷთააწყჷმუშა. ოდო მოუქანჩუუ აშო. ტკირქ გამკიიწყუ, საგან ხოლო გაითიიღუ. თი ტკირქ მუკოხორცქჷნ, თექ, შარა ქოძირჷ იშო. ქიგიაჸუნჷ სუმი ხოლოქ შარას. მაჟიარა ჸურე გჷ თიილჷ თი ტუნელსჷ ნი, ზღვა ქოძირჷ, ქარვას მიშაგდჷდჷ ფერი, ზღვას ჸუდე მიშადგჷდჷ. მინიილეს დინახალე. ოჭკომალი დო ოშუმალი ქოძირეს, სტოლს გილადგჷდჷნი, დოხოდეს დო ჭკომეს დო შევს. დიისერჷ იშო, ქიდიინჯირეს დო ქიდიირულეს. უკულაში ბოშის ვადაარულჷ. მოლართჷ დო ყარაულო ქჷგედოხოდჷ პრისტანიშ ძგას, ზღვაშ ძგას. ჭიჭე ხანქ ქიჸუნ, ქჷმოურს ჩე რაშის გეხენ ფერი დეი. ეთიწკჷმა თე ბოშიშ ხოლოშა ქჷმორთჷნი, თე დეი გეხენ ფერი რაშიქ მიოთხჷრჷნ დო უკახალე ქჷდაასხაპჷ.დეიქ უწუუ:
- სი ოკო გოშქურდასიე თე დო თე კოჩიშ სქუაშა, ირემიში ნარდიშა; ინა დიო დასახებული ვა რე, დესახჷ დო იშენი, დაბადებული ვა რე!..
გიაშქუ რაშის მართახი დო, - მეუა, უწუუ, ვა გაშქურინასია! თიმწკჷმა უწუუ ირემიშ ნარდი ბოშიქ:
- ქოთ ქჷდეებსახი დო ქოთ ქჷდეებაბდი! ქოთ ამარი ვორექ! ქააოთჷ დეის ქაშქვილი დო ქასაგანი, დეი დოჸვილჷ, ზღვას ქინაარაგუუ. აშო მოლეჸუნჷ ჩე რაში დო იშო ქჷ დააკირჷ. ხოლო მიდართჷ დო ქოგედოხოდჷ ყარულო. ხოლო მორთჷ უჩა რაშის გეხენ ფერ
დეიქ. ხოლო თეშ მიოთხირინჷ, ოდო მუნდით ქჷდაასხაპჷ იშო. ხოლო უწუუ, დეიქ რაშის:
- სი მუშა გოშქურუნია? სი გოშქურუდასია თე დო თე კოჩიშ სქუაშა, ირემიშ ნარდაშა, დიო ინა დასახებული დო დაბადებული ვა რენია.
- ქოთ ქჷდეებსახი დო ქოთ ქჷდეებაბდია! დო ქააჷოთჷ ქაშქვილო დო ქასაგანი დო დოჸვილჷდეი. უჩა რაში აშო ქჷდააკირჷ. ხოლო თექ ყარულო ქჷდოხოდჷ, ხოლო ქჷმორთჷ ჭითა რაში დო ჭითა დეიქ.
ხოლო თეშ ქიმინჷ, ჭითა დეი ხოლო დოჸვილჷ. აწი, დეი მოუურსუნი, თი შარას ქჷგიაჸუნჷ. მუშ ჯიმალეფი ვა გუკურცხინუაფჷ, ი რაშეფი ხოლო თექ ქჷდიიტუუ. მუჭო თე შარას ქჷმოურსუნი, თეშ მუმურქ მიოჸიუ ჯას. თიწკჷმა ჯას ხე ქემეთხჷ დო მოდჷრიკჷ თი ჯა, ოჭოფG მუმული, ოდო ხე ქიმეთხჷ დო დუდის სოფუნს. თიწკჷმა მუმურქ უწუუ:
- მა ვა პილავა! ქაშქვილი დო ქასაგანი ქააჸოთია ეთი გჷმათანე მურიცხისია, ოდო თინა აშო მოლურს დო კართეშა ქაწგოსხაპანსია, ჯიბეშა ქალეხუნუუ დო თინა ვა გუტუუე თეშ ვა გოთანდჷ! იშო გოუტუუ მუმული, მართალო თეშ ქოქიმინჷ დო ჯიბეშა ქალეხუნუუ მურიცხი. ოდო ქიგიაჸუნ შარას დო მუჭო ქიმეურსუნი, დაჩხირი დორზამილი ქოძირჷ, ოდო თექ ხორცის ქოხაშჷნდჷ დეიეფი, ოდო უკანასკნელი ხუთოში დეი ქოჯანჷდ, ოდო ქოლურდეს თექ. მუს ორთჷთ თაქია? უწუუ თე ბოშიქ თი დიეს, ხორცის ხაშჷდნჷნი, თის. ჩქჷ ჯარი ვორეთია ხენწGფეში, დეიშ ხენწჷფეში, დო ქირსიანიშ ხენწჷფეს გეფთხოზჷთია. სუმი ცირა ჸუნსია, ოდო თი დეიშ ხენწჷფეს ოსურო ოკონია. თიშ გურიშენი ქირსიანიშ ხენწჷფეში ჯარი არძო გოჭყვიდესია. ი ხენწჷფექ, ქირსიანიშ ხენწჷფექ, მოლართჷ დო ჯიხას ქჷნოდოხოდჷ დო ეთის მეუბარგჷთ ჩქჷ. დეი ურაგადჷ თე ბოშის. ეთი ბოშიქ უწუუ თიწკჷმა თი დეის:
- ჭკადჷ ვა გოკათჷნიავო? დეიქ, - ქოვა, უწუუ. გაკურცხინაფუუ ჭკადჷ, ოდო თე ბოშიქ უწუუ თი ჭკადის;
- აკა სალეფი დომიჭკადია, რკინაში! დოჭკადჷ დეიქ სალეფი. მიკააშქჷ ეშე-ეშე თე ბოშიქ თე სალეფი ეთი ჯიხას დო ეშეელჷ ჟი. თექ ქიგედჷრთჷ.
- ეშელით აშოვა!
- უწუუ დეინც, დო დინახელე ინგოხუნუავნთია. ოდო ხენწჷფეში ჯიხა გეპჭპფათია! ქჷდიიჭყეს დეიენქ ეშულა ჯიხაშა. მუჭო ეშართეს დეიენქ ჟი თეშ, თი ბოშიქ დუდი მეკვათჷ არძოს დო დინახალე ქჷნააწკარჷ ჯიხას. დეიეფი არძო დოჷვილჷ დო იშო ინიილჷ ჯიხაშა, ქომიოდირთჷ ხენწჷ ფეშ კარს დოუძახჷ:
- კარი გომინჯია! ცირენქ კჷჟინი ქიდიიჭყეს, აშქურინეს დო, დეიეფი უჩქჷდეს.
- დეი ვა ვორექია, მავა - უწუუ თე ბოშიქ. ოდო კარი გაანჯა მაფუუ, მინიილჷ იშო.
- თქვანი ტერი არძო დოპილია, უწუუ. ოდა აწი დეიშა ვა გაშქურინანია. ასე სქანი სქუალეფი ოსურო ქომუჩია, - უწუუ: - მა ქირსიანე ვორექ, ირემიშ ნარდი, ალრქსანდრევა, უწუუ. ჟირი ჯიმალეფი პუნსია, ოდო ჟირი თიშო მოკონია სქანი სქუალეფი დო ართი ჩქიმოვა, სუმი ნორჸვენია დო.
ახიოლუ ხენწჷ ფეს, სქანი ჭირი, დო ქიმეჩჷ სუმი ხოლო. ფაიტონიშა ქიგუხუნუუ დო ფარეფი ბრელი ქააჩუქჷ. ე ბოშიქ აშო მოლეჷუნჷ ე ცირეფი ფაიტონით. მურიცხი ჯიბეშა ალეხუნჷ ნი, თეიშა ქჷ მორთჷ ნი, მუმურქ ქიმიოჸიუ.
- აწ გოუტეევა მურიცხი, ოდო მალას გოთანდჷნია. გოუტუუ ბოშიქ მურიცხი. აშო მოლართჷ, ზღვას ჷუდე მიშადგჷდჷნი თექ ქჷმორთჷ, მუშ ჯიმალეფი გააკურცხინუუ, ოდო გოთანდჷ იშო. ათე ბოშენს უწუუ, მუშ ჯიმალენს:
- ათენა დეიშ ჸუდე ჸოფერდუა, ოდო თაქ ღუმა მიშესია. სუმი ხოლო დოპილი, ოდო იშ რაშეფი ამარ მითომიკჷრჷ სუმი-ხოლო. ოსურეფი ხოლო ქჷმოიჸუნით. ათეზჷმა ქიფშრომი ღუმა მა! უწუუ მუშ უჩაშ ჯიმალენს. უკულნეშის ეთექი იცხოვრებუდეს სუმი-ხოლო ჯიმალეფი, სუმი სერიშ დჷნაბადი, ართო ოსური-სქუალეფი წკჷმა, მუნეფიში ოსურამო. ღუმა თექ ვორდი, ამდღა აშო მოფრთი. სუმ ბერწული დო სუმი კორწოხული, თითო ჭირქა ღვინი ჩქიმი პიჯის ქოტოხუნი.