ბორია არწი ვა რე
ბორია არწი ვა რე,
ბორია ტორონჯი ვა რე,
მარა ბორია მაფურინჯე რე.
ფსუალეფ უღუ.
ქვერსემ სერი გილუღ,
დო
თოლიშ იშო ოძირაფალ
ქიანეფი.
გვალაშ ოულარი,
ფურცელიშ ოტყობინალი
დო
ვარიაშ მორაგადე ეშაკითხირალი.
ჩილამური, დო ოკვანწაია
ძიცა.
ჯა გობსოფე დო მითიბლენი
ჯა იშენით ვეპიქ,
ვემვუარდუაფუქ თის ჩქიმ
ტანით.
ვართ იბტყობინექ.
თუთა წყარშა ინმურსუნ,
ქუა მობუ კუჩხის
დო ეშულირც
კინე მა მუკმობ თუთა.
თუთა ორეკეშ რე დო ირეკას
ოკო.
ჩქიმ ნარღი განჯაანც ცაშ ოსინთეს,
მა თიშ იშო გუონჯა იმენდეფც.
ჩქიმ შარალუა კიდალეფიშ ტახუათ
მეურც,
ჩქიმ ხონარ სოთინ ვაგოდინუ,
ირო აშუაფ ცა დო დიხას,
თიშენ ნამდა,
კუნტა რინაშე ვამოურთუმ.
აყარებულ ოწონდე სი ვაიჯინე,
მუშ ბორჯით მეურც.
მურიჟი ხოლო მუშ ნოქურც
ტებულენც.
ვემკიჯინა, ბარჩხალი
ირო წიმი რე.
ბორია მაფურინჯე რე
არწი დო ტორონჯი ვა რე,
მარა ფსუალეფ უღუ
მა ირო ხასლას ალაპუნც.
ჩქიმ სირჩქალა თიშ მადიდა რე,
ვეშაბირ მუნაფას,
ვეშაბირ მურიცხის,
კინ მა ოკო იბიბრე.
ჩქიმ ტყები ზღვა დო გვალას
გინოფინ,
ქიგიოხანტი სქანი სახე!