ბრუია ბონდო
ართი უკმელა სერც ეშმაკეფი შქა ტყას წყარპიც ეკოხედეს დო ეშმაკურც სხუნუნდეს. ტყაში იშო, რზენც ოფუტე რდჷ, სოდეთ მარდიანი კათა ოხორანდჷნი. ეშმაკეფც ათე ოფუტეში ჯინი უღუდეს, მარა დიო მუთუნქ ვაქიმინეს ეშმაკურქ თექიანი კათაწკჷმა. მეძობელი მეძობელც ინდენდჷ თი ოფუტეს. მაჸალე მაჸალეს ალურდჷ ჯიმაცალო ... ღორონთი წანდეს დო ღორონთიში შქურინი უღუდეს. მუ ვაქიმინეს ეშმაკეფქ: დოწამალეს მორწუმე პაპა დო თიში მანგიორო ოხვამეშა ანაფორა გინოქუნელი სატანა გემნაჩქვეს. შურგიმოჩამილი პაპა პიჩუა დღალეფც არგამათ ჭკუმუნდჷ ხორცის. ირ ონჯუას ღვინით იშუმუდჷ დო საყვარელშა გილეშჷ. ათაში თიში გურშენი ირჯებუდჷ ნამდა კათაშა ღორონთიში შქურინი მეუდინუაფუდუკო, გუთამამებუდუკო დო სატანური შარაშა ქიგურინუაფუდუკონი. პაპა გიჯოგეს ოფუტეს, მარა ოხვამეშა იშენით გილეშეს, სანთელს ეიორზანდეს, იხვამანდეს დო იპიჩანდეს. პაპაშენი თქუანდეს: შური გაგმიჩუდა, ღორონთი მოკითხენცია. შურგიმოჩამილი პაპას ვამათმინებუ დო ართი დღას გოუღვარუ მახვამალეფც. მუშა გილურთია ოხვამეშა. მუთუნი ვარენია თე ოხვამე, ვარწყეთიაო ვართი იპიფჩანქია, ვართი იბხვამანქია მარა მუქ დუმოკორდუა თეში გურშენი. მუთუნი ვარენია თე ოხვამე. ორთვალიშე დიბჭყათია დო ჯინჯიშა დობხუათია, მიდეღითია ნახუა ჸუდეშა.
მორწუმეფქ უგამეს: ჩქი სქანდა ვეგლურთია ოხვამეშა. გვალო ჯგირო ვორწყეთია სი მუ კოჩი რექჷნი, მარა სქანი შურუბადობას თოლც უწკურუნთია, მუშენდა ღორონთი ორწყენია ირფელც დო სარჯელც თინა გაგმოიღანცია. სი თინერ ორექჷნი თინა ჩქინი გამორსა რენია. ღორონც ოკონია გეგასჷნი: სქან გურშენ მივოტენთ დო ვარი ოხვამესი. ოხვამე ურწუმო პაპაში ჸუდე ვარენია. ჩქი თაქი მულა მივოტუათინი, ეშმაკეფც ქიგიოსქიდუნანია ღორონთიში ჸუდე. ათეში გურშენი ხოლო უმოსო მოურთია თაქი დო უმოსი გურჩამილო იფხვამანთია.
მუთუნქ ვეიშურთ ოხვამეს შურგუმოჩამილი პაპას. ის ხოლო უფრაშიქ აღოლჷ. ართი დღას შუმილო ენულებჷ მალ წყარშა, ტანიში ობონშა დო მუდგანერო, ქენოშქვიდელე თექი.
დემარცხეს ეშმაკეფქ, მარა ასე შხვა თუთმაცური დოსხუნეს ხოლო. გვერდი ოფუტეს ქუმუშქირენუათია დო შქირენულეფი რძღელეფც წეკინდე-ბუნანია. გემშატყობეს სერ-სერით ჸვანეფიშა დო თასილც დუღა ქჷმნაბეს. ოფუტეშ ართი დიხაშე ვერთ ნათასაქ დო მაჟრა აკანც თოლიში გასახარო გეფაშქ ირფელქ ... ასე იჭყაფუნია ჩქი მოკონანი თი თოისერი, - ხიოლც ღურდეს ეშმაკეფი, მარა მუთუნქ ვეიშართ იშენით. მიდგას უღუდუნი თიქ ვაუღუდუნ თის ქიმეხვარჷ. ჭიჭე-ჭიჭეს ჭკუმუნდეს, მარა იშენით გეგნიღეს თი უბადო წანა.
ოხვამექ ვემდაღინეს კათაშა, შქირენა მუდვესუნი, თაქ ხოლო გეიშეღეს დუდი. მეტი მუ ქიმნანი ეშმაკეფქ? მარა დიო სო რექ? ეშმაკურც ვაუღჷ დათებუ დო ახალი უბადობა დოსხუნეს ხოლო. კოც ოკო ონჯარუდასია კოჩიში დო თექი იჸუაფუნია ჩქინი გომორძგუა. თქუეს ეშმაკეფქ; ართ კოც ლაგვანიში მოფშა ორქო ქუდურღვეს ოზეში კარწკჷმა. თი კოჩქ მარდიანქ იჸუ, მა მუშენი მიღუდასია შხვაშე უმოსი დო თითო-თითო ორქო აკურიგჷ არძოს. მუს ხოლო ქასქიდჷ ართი ორქოქ.
გვალო გეგნილასეს ეშმაკეფქ დო შური მიხირეს, ასე დიშაყარეს დო ამარ ელახენა უკმელა შქასერც წყარპიც. კოც ლურც, მარა ეშმაკის ვალურც. მუ ფქიმინათ დო მუჭო ვოჩილითუათ ხიი, იჩიებუნა გარღვინჯებულეფი, ათაქ ჭიჭე ეშმაკეფი ხოლო რენა, მარა თინემც ნამთინც ვაჸუნდჷ ვართი დიდა დო ვართი მუმა. ეშმაკის სქუა ვაურჩქინდუ, ერჩქინელიში ხვამილაფა უჩქუნა დო ათაშ იბრაულებუნა. ჭიჭე ეშმაკიქ უწუ კაბეტი ეშმაკის:
- ქომიწი აკა სიკეთე მუ რენი?
- სიკეთე სიბორუე რე. - უგამ კაბეტი ეშმაკიქ.
- სიბორუე მუ რე?
- კარშა ორქო გეიძუდას დო შხვეფც აკურიგე, თენა სიბორუე რე.
- ხოლო მეტი მუ რე სიბორუე?
- ართი ნოკვეთი ქობალი გიღუდას დო თინა ხოლო მაჟრა შქირენულც გოუტახე თენა ხოლო სიბორუე რე ... ვართი მუ იჸუაფჷ რძღელი დო ვართი მაჟრა.
- მარა შურც ხომ ქიდიკირანა ჟირხოლო?!
- ვართი ღურუნა დო ვართი სქიდუნა. ეჯგუა რინას უჯგჷ ართიქ დოღურასუნი. მაჟრა ვარა იჸი ჭყანიერო. - ეშმაკეფც დღას ქაფუნანო სიკეთე ნაქიმინა?
- მეჩირთესჷ-და თიმწკჷმა ქო!
- მუშენი რე ირო სერით იბშაყარუთუნი? დღაშით მუშენ ბტყობუთ?
- დღაშით ცა იძირე. ცა ვა რე ჩქინი. დიხა მიღუნა საგვერდოთ. ცა გვალო მიდამღეს.
- მიქ მიდამღეს ა?
- ო ... იში ჯოხო ვამარაგადე ... შქურინით ვარვალქ გეუოლჷ კაბეტი ეშმაკის. - ცას ვორდით, მარა გეითმორღვეს თუდო.
- მიქ გითმორღვეს ცაშე?
- (!)
- მუშენ გითმორღვეს ცაშე?
- რჩქინაში ხირუაშენი.
- მის მივოხირით რჩქინა?
- უჩქუდუნ თის.
- მუშენი რდჷ ოხირალი რჩქინა. უჩქუდუნი თინა ვამოგურუანდესო?
- მოგურუანდეს მოზოგ-მოზოგო, ჭიი-ჭიეთ, ჭიჭე ქიდიბგურეთინი, დიდი რჩქინელიში ჭკუაქ მენჯარეს.
- მუ მიღუნა მინახირა, უკმელას ვორეთინი თენავო?
- სი მუ გიჩქჷ უკმელა მუ რენი. სინთე გაფუნო ნაძირეფი?
- ვარ, მარა გამგონებჷ.
- ვართი ძირა დო ვართი გეგონუა. სინთე ვარენი თიწკჷმა უკმელა ხოლო ვა რე. უკმელას სინთეშ აკეთენს. სინთე ვარდასუნი უკმელა მუ რენი კოც ვარჩქვენუ. ჩქი ბჟა ოკო დობშქირიტათ. ეთიწკუმა ჩქი იპით უფალი!
- მუ რე უფალი?
- თინა, მუთ ვაფალუნცუნი.
- ღურელიო?
- ვარ. უღურალი. მუთ ვაფალუნცუნი თინა დღას ვახუმუ. ვართი იბადებუ დო ვართი ღურუ. ვართი დაჭყაფუ უღჷ დო ვართ დათებუ. თინა ირიათონი რე.
- ეჯგუას ღორონც უძახუნა კოჩეფი.
- სუ, ვაშინუა თიში ჯოხო! - შქურინით ორნაქ ქეითუოლჷ კაბეტი ეშმაკის.
- აში ქუმოშქურუნა და, მუშენი ვონირზუთ?
- მონჯარუნა დო ვონირზუთ.
- კოჩეფც მუშენი ოშქურუნა?
- ენა გვალო შხვანერი შქურინი რე. გურმულირი მუმაშა ოშქურჷ სქუასინი თინერი, მარა ეს სი დღას ვაგეგენქ, ეშმაკის მუმა ვაჸუნც. ჩქინი ღიაბი ვანჭუ ე შქურინც, რჩქინათ მეფხვადუთ ხვალე.
- მუშენი რე თინა კოჩიშე გურმულირი?
- ჩქი მივოჩილითეთ კოჩი. ვარიებული აფუდუნ ეფერი საღორონთო უშქური ქოფჩით.
- უ - რე უგუთებუ. ქური - რე გიორნალი. მით უგუთებუს გერენ ირიათონი რინა უღჷ. უ - ში ქური - უგუთებუ გიორნალი ... უშქური ქობჩით კოც, მარა იში ჭკუმუა ვაშინერდჷ.
- მუშენი ვაჩანდჷ უშქურც, კოჩი მუწკჷმა ქაკოდჷ-და.
- უკიბირე ბაღანას აჭკუმენო ხორცი? ირფელც მუში ბორჯი უღუნია ოქიანეს. გურქ მურთ, გეგნორაჸ კოჩიში შური ედემიში ბაღიშე.
- აბა მუს უმარდჷნა თის დო მუს აინალა?
- კინ იშო ოკონა დორთა. ოხვეწჷნა პატიებას დო ნარღენა.
- ჩქი ვამნარღენთო?
- ჩქი ვამიჩქჷნა ნარღი დო მით ვანარღენსუნი, ჩქინწკჷმა რე.
- ასე სო ვორეთ ჩქი?
- სამარგალოში ტყას. ბჟაში ეულაშა ჩქინი რე თე ტყა.
- მუ ოკო ფქიმინათ ვაგოთანდასჷნი?
- მარგალურ ნინა ოკო გუვოჭყოლიდუათ მარგალეფც. ჩქი მარგალურო ჯოჯო ბჯოხონა. ქოძირეს ეშმაკეფიში მაფა დო ჯოჯო ხედუა თქუეს.
- ჩქინი ოუნჩაშეს ჯოჯოხეთის უძახუნა. ქომჩინეს დო ჯოხო ქიგმოდვეს.
- ხომ გეგნიპტყურეთ ბრელი აშო?
- დიო ხოლო ვარ ... ბრელც სამოთხეშა უნჯანც თოლი.
- მუ რე სამოთხე?
- სუმი ოთხი რე, ვითოჟირი ზოდიაქო! ართი წირეთ იკირუ თე ვითოჟირი დო ათე წირე ხოლოს რე სასუფეველწკჷმა. ეთექი, ათე სუმი ოთხიშა (სამოთხეშა), ოკონა შურიში მებარება, უში ქურშე რე ზიტყვა შქურინი გიშნაულა დო ოშქურუნა უშქურნაჭკუმა კათას ღორონთიშა.
- მუს მუჩანა მარგალური ნინაში მოსპუალა. ვარა მუშენი ოკო მოშქურდანი მუში მინჯეს ხოლო ვაუჸორცუნი ეფერ ნინაშა?
- ჭიჭე რექ დიო დო ველანჭუქ უმოსის. მარგალურც მიშატყობჷ ორთაშ ნაფულა. თე ნინა მინჯეშე მილიარდშა მეტი ჭკვერი რე. ცა დო დიხაშქას მუთ ქოჸოფენი მუთუნი ვაგოჭყოლადჷ დო ირფელ შჷ. გუჯოგეთ მუში რჯული დო ნინა მარგალეფც, მარა დიო ხოლო ქიჩიებუნა ამერ-ემერ, ინგირი დო ცხენწყარშქას, ართი ტკუ დიხას. სოიშახ მარგალურც შური უდგუნი, ჩქინი მოსვანჯაქ ოკო ვეჸუას. ღურელი რე, მარა დიო ხოლო ტიბუ რე. ვადუძახას მითინქ, ლაზარეცალო გამწოდირთია ვარა, ეთიმწკჷმა მებდინუთ. სერი დღაშო გინირთუ დო ირფელც ქოძირნა სინთეს. ირი ჩქინი ნასაქვარ, მუთ ქორდჷ თე ათასსწანეფც, მუთ მართალც მეგურაფილ ტყურათ დუვოჯერეთ კოჩობანი, ირფელი ბურჩხიცალო გაკოცენც დო დუც ქუმნოფცენა.
- კოჩქ შურით ფურინი გიჭყოლიდუ, ეგემუან დიხაში მუნაჩემქ. ჯგირც ჭკუმუნც დო ჯგირც შუნც. ჯგირი მუკაქუნც დო ჯგირი მაძჷ. ნჩურუა ოკო-და ზუღა დო ოკიანეს რკინაში ხვამარდით თეში გილანჩურუნც, ჩხომეფც ონჯარჷნა. ფურინუა ოკონ-და, ფსუალეფი ვაუღჷ, მარა რკინაში მაფურინალით მუნაფაში ჟი მეფურინუნც. თუთაშა ქიმიოჭირინუ დო მურიცხიშა ხოლო ულამჷ ფურინუა, ნამ არწის დო ორბის შეულებ თენერი ფურინუა? მარა შური აფჷ მანგიორ დამონკებული დო თენა ირფელი ჩქინი ჭყოლოფუა რე. ხორციელო სოთინი ველინე. მიდართუ-და კინე აშო ოკო დირთას დიხაშა, ვარა მეტი სოთინი ვადაბიჯგე კუჩხი. ონდო შური უდგუნი, ღურა ვაშჷ. დოღურუ დო შური გეშალუნი, ცოდათ დამონკებული შურც სოთინი ვალინე დო ეთექი ქუდოსქიდჷ, სოდეთ ჯოჯო ხენი. ათაში გინირთუ ღორონთიში ენნადგუმა შური ეშმაკეფიში მოინალეთ.
მარგალური მურიცხეფიში ორაგადეს იჩიებჷ. მისით ჸუჯი უღუნი ელაფურცქინანც, მარა ვაუღჷ ასეიანი კოც ჸუჯი. ინა გელუკასით ლეტათ დო დუვაჸუნგით. მარგალურიში გაგონაფალი ჸუჯი დუც ვემკოდგჷ. გურით ოკო რჩქილა. ე, გურც ეშმაკეფი ქელუხუნეთ დო ანდანერი ჩილათა ...
ათეს იჩიებუდესინი თეში ეშმაკეფც კოჩიში კუჩხიში ხუმაქ ქელასიმეს. მიოტეს რაგადი დო ჯგირო ქიდეკვირეს მი მიშჷ უკმელასჷნი. კატუში თოლეფი ქელედვეს დო ირფელც კარაკანო ორწყედეს. კოჩი ჯვეშობურო რდჷ მონწყილი. უჩა ღართი მუკაქუნდჷ დო დუც უჩა ბაშლაყი გიორთუდჷ. ხასჷლას ყამა გილაბუდჷ, ვარჩხილიშ ტარამი. კოჩქ მაანჭჷნი, კოჩიში სახე ქიმიჩეს ეშმაკეფქ. მუმალქ დოლანდჷ წყარპიც მიდგარენეფი ელაჯანდესჷნი დო ჰაი, მი რექია დოუძახჷ. ვაგაშქურინასია, მარჩუალეფი ვავორეთია, უწის ეშმაკეფქ.
- მუ გაჭირება გიღუნა, ამსერი შქა ტყას აკოშაყარეთჷნი? კითხჷ მეშარე კოჩქ.
- ჭყიშეფი ვორეთ, ჩხოულეფი მაფუნა დინაფილი. ბგორუნდით დო აკმასერეს. უკული გინობჭყვიდით გოთანაშა ათე წყარპიც ქუვორდათუნი ... ტყურაში აკონწყუალა ვაგაჭირებჷ ეშმაკის.
მეშარე კოჩქ გეთამამ დო ქიმშუდოხოდჷ თინეფც. უკული ფეცხეფი აკოშაყარეს, დაჩხირი გაკარზეს დო კოჩანიერო გიტიბეს.
- თქვა მი ზოჯუნთ დო მუ გოკოდეს ტყას ამსერი?
- შორი შარაშე მურქ მა, ბონდო ბჯოხო სახელი დო ათავრე ვოხორა, ტყაში მელე ოფუტეს.
დაჩხირქ ჯგირო გეიბორბონჩჷ დო გონათჷ. ტყას შურიშქალი ვაფუდჷ. სოლეთინი ბორია ვერქენდჷ დო ვექანცუდჷ ჯაში ჸალეფი. შორც, სოდგარენი, ტურაქ ქიმიორჩხვიუ დო უკული კინ დემუნჯჷ თექიანობაქ.
- გლახა საქმე რღოლამჷნა, ჩხოულეფი მერდინაფჷნა. ქოძირუნთ აბა მორო მუ იჸი. დაიმენდჷ “ჭყიშეფი“ ბონდოქ.
- თქვა სონი ჭყიშეფი რეთ? - იკითხჷ ბონდოქ.
- ჩქი ათაურე, გინძე ჯიხაში იშოიანი ვორეთჷ. - უგამჷ ნამდგარენქ.
- ო ... ეთი ჯიხა ვაგმოშინა! შური გეშაკაშჷ ბონდოქ.
- მუშენი? გეკვირუ ფრიმულამქ.
- ჩქიმ ბოშალას ლჷმა ორდჷ თი ჯიხას დო მახოლო ვოკათუდი მოლიმორეფც.
ხუთი დღა დო სერც მუკოჯანუდჷ ნტერი თი ჯიხას, მარა მუთუნნერო ვეიაჭოფჷ. ბრელქ გუჭყორდჷ მალიმორქ დო გვარიანო დეთხითხარუნი, მიკირთჷ იშო დო ქიგიაჸუნჷ უკახალე თი შარას, ნამუთი აშო მორთუნი. მანგარო მახიოლეს გომორძგუაქ. ფსხაპუნდით დო იბიბრდით. ართი ამბე მაფუდეს. დისერჷ დო ხუთი დღაში უდურულაფჷ მალიმორეფც თოლი გეითომღეს ლურქ. ნტერც დურთინ კინე სერით დო ქუმუტყობაფჷ უკმელას. ჩქი ბლურდესინი თეში გეუჭოფჷ ჩქინი ქიანა ...
- ო ... ენა, ჯვეში ამბე რე. ასე სოლე მურქუნი თინა ქოთქვი, ქირაგადენ-და. - უწუ ართი „ჭყიშიქ“.
- ოფულარი მუთა მიღჷ. ქიგეჩიებუთ ირფელც. კოც მუ მოძუნი, მითინც ვაუჩქჷ, მარა ულირც მუქ მოხვადუნი, მუშენი მოხვადუნი დო მუქ იჸუნი თენა ვაუჩქუ-და, თი კოც დღას მუთუნი ჯგირობუაშა ვეიშართე, დღას ვადათხინე გაჭირება დო უბედრობა. გაჭირებას გინოღალა ოკო. ნამთინე კოჩი ოცადჷ თის ენტასინი, მარა თინა ვაგინჷ, მუში ჭარაშა ვანტინე დო მუთ მოძუნი თინა რე, უჩქუ დო იშენით ჩირთუნი. მი ვორექ დო მუ ვორექ - მითქუალ ჩქიმ დუდშა. მუშა მოფრთი თე ქიანაშა, მუ მიბღი აშო დო მუს იბჯუმა იშო.
“ჭყიშეფს“ ძიცაქ გეუოლეს.
- მუთუნი ვამოიღალჷ დო მუთუნც ვეღანქ. ოულარი ხოლო სოლეთინი ვაიღჷ. მუთუნც ოკო ვაუჩე გური. სქანი დუდიშო ქორდა. ჭკუმი დო შვი.მუთ გემუანი გაჸინი თინა ქიმინი. ვაიღუნ-და ქიში. შხვას ხომ ქაღვენუ მიდგას იჸინი. ვემერჩანც ქოთხუენი, მარა ქიმიოხირი ... ბონდოქ ეჸონდჷ. -რაგადუქინი, შხვას მუჭო მივოხირა ... მიციგანუთო?
“ჭყიშეფქ“ იძიცეს დო ბონდოქ ხოლო ციგანობათ მირჩქინჷ თე ნარაგადი. “ჭყიშეფქ“ ძიცა მიოტეს დო შური ვაქალეს, ვაკოდეს დუდი გეარგამესკონი. ბონდოქ კინე ქიმიაჸუნჷ მუში გაჭირებაში ჩიებას.
- ათავრე, ტყაში მელე, ოფუტეს, ჭიჭე ჸუდე გემიდგჷ. ოსური დო სუმი ბაღანა მაჯინე თექი. ამდღა დო ამსერი ფხანდენდი, მარა ქვალონას გივოხორანდი დო მუნაწის ბრელ მუთას მარზენდჷ თი დიხა. გინობჭყვიდი, სოთინი შხვადო ჭიჭე ფარა ქიფშიკონი. ნოღაშა მიდაფრთი დო საქვარი გიფრჩქინი, მინც ოღალც მიდუნთირუნდი დო ათაში ართი წანა დო ხუთ თუთას გვარიანი ფარა დობშაყარე.
პიც თუმა გიბხოკი, უჯგუში მუკაქუნალი ქიმკიფქუნი, იფიფრქი სქვამას დიბრთუქ ჩქიმ ჸუდეშა დო ფარას ხოლო მიდებღანქ მაქ. ბაღანეფშო მაჭვალი ჩხოუში ჸიდირი მილამუდჷ. შარას დობშურდი დო ართი ჯაში თუდო ქიითიმჯირი. თოლი გეითუღალჷ ლურც შურო ვამგინაფუნი თეში. გობკურცხი დო მიბგორეო, სო რე ჩქიმი ფარა. ქიმუხირაფუდჷ მიდგასჷრენი.ნტერც ვაუზალა თიჯგუა დღას, თოკი ქომჩკონი ეთი ჯაშა ქეითიბუმნუანდი დუც. თოლც სინთე ვამღუდჷ, ბნარღენდი დო იბწვალებუდი, გური ამარ-ამარ გოხორცქუნია თქუანანი ეფერო მამბარუდჷ. მუშა მეფრთა ჸუდეშა მაქ - იფიფრქი დო სოდგარენი, გვალეფიში განშე ქიგვაჸუნი უჩინებუ შარას. ტარკალე გუძუბა მორჩქუდჷ ირ განშე. ჯა მუ რე, ნდოლო ხოლო ვაგაპალუდჷ თე გუძუბეფც. უნელო, ვეველუდინ თეშ მიდგაქჷრენი, უჩა ანაფორათ გონწერილი კოჩქ ქამხვადჷ აშო. დიხაშე ეშართუო - მაქ იფიფრქინ, ტყურათ ვარდჷ. ამდღა ხოლო ვამიჩქ, სოლე გიწიშქვანდჷ თი ზიტყვეფცჷნი. ეში, ჩქიმდე გასაკვირო, მარგალურო იჩიებუდჷ: ფარაქ გიდინუნი თიშენი რექიავო დუდიში მაჸვილუ.
უკული ბკითხჷ, სო მეულია ავრე, ჸუდეშა ვამოკო დორთა, ანწი სოდგა ვორდენი არძა ართი მაფუ - მაქ. ჩქიმი სქუალეფიშა მუთუნი ვამიღჷ მიოღალარი დო მუშა მეფრთა - მაქ.
მუს მეუღანდია სქან სქუალეფს, თიჯგუას ნამდა ირიართო უბაღასჷნი, მაჭვალი ჩხოუში ჸიდირი გოგონუდუნი, ეგებ ნგერქ ოიჭკუმუკო თი ჩხოუნი, მუს ქიმინუნდია თიწკჷმა. სი ჸუდეშე ვარ, სქან დუდშე გინულირი კოჩი რექია. დუდი გაფუნია დინაფილი, დუდი.
მუჭო - მაქ, გებკვირე მა. თიწკჷმა ვითოჟირი ზიტყვა ქომიწუ: მარგალური რდჷ თე ზიტყვეფი, მარა აკა ვანოფჩქვედჷ მა. ვითოჟირი მურიცხიში ჯოხო ქუმუჩამუდჷ მარგალურო დო ელამიჩჷ: ათე ზიტყვეფი მიდეღია ფარაში მანგიორო დო ქუდაგურევა სქანი ბაღანეფც. მეუა ასე დო ხოლო ვადგარულასია სოთინი, შარას. ათენა ქომიწუ დო თოლც ქაწმოდინჷ. მოურქ მა ასე თევრე დო მემიღჷ თე გოჭყოლადირი ზიტყვა ბაღანეფიშა. მიდგარდჷნი, ჩქინი ჯვეში წჷმოხონი რდჷ თი კოჩი დო ოშურთეშე მუნაჩინათ მიბრჩქინი მუთ მიწუნი.
გათუ ბონდოქ რაგადი დო ჭიჭე ხანც შური ვაუქალჷნა “ჭყიშეფც", ბირა, ძიცა დო ლაჸაფი ქუდუჭყეს. უწის: ონარღებელი მუთა ნორღვენია, ფარაში უმოსი ღმალა მეიღუნია ჸუდეშა. უფერუეს დო თიზჷმა მოფერაფათ ლური ქუმუჸუნეს. ბონდოს ოჰამუდჷ რული დო გიჭყოლიდუ თი კოჩიში დჷნაზუკოლა: “ხოლო ვადგარულასია, სოთინი“, სიგემუანეს ქიმეჩჷ დუდი დო დოწკურჷ თოლეფი.
ოჭმარეს გოკურცხჷ დო იშო-აშო გიჯინუნი, მითინი ვა რე. ჭიჭექ ეწყინჷ, მარა გური ვამორთუმჷ. ალბეთ, ჰამას ბლურდუა დო ვაგმოკურცხინესია. ათე შვანც ყვარიაქ ქიგიორჩხვიუ ჟიდოშე. ბონდოს ოკოდჷ ქუდუღვარუკო დო დაშქურინუკონი, მარა ვეკაღინჷ ხონარქ. გეფოც, გეშერჷ დო ქიითიჩანუ პიჯიშა კითი, მარა სო რე ნინა! ქიმუხირაფუდეს ვაუგინაფუნი თეშ. ჭყიშეფიწკჷმა ვარ, ეშმაკეფიწკჷმა ნოღვე საქვარი. მუ ქიმნას ანწი დო სოლე იდას. ჸუდეშა მერთასინი, მუ უწუას მუში ომორდუალეფც? მუჭო ოძირას უჩინებჷ მურიცხეფი დო მუჭო გინოჩას ჯვეშიში ნარაგადი...
“სი ხოლო, ბონდო: ართიშა ქუდგარულუნი, ჯიხა მიდაიღეს; მაჟრაშა ქუდგარულუნი, ღმალა მიდაიღეს; ხოლო ქუდგარულუნი, ნინა ქიმგოხირეს. ბრუია ბონდო, ბრუია, ბრუია!“ - გიაძიცუ ყვარიაქ. უკული ნინძგით ჯაში ფაშა ლერსი ქიგუჭარჷ დო თუდო ქეითუჸოთ:
ახავაი, სქანი ღურუ,
მოფერაფაქ თოლ დოიწკურუ,
ანთას წანეფქ მიკილჷ, მარა
კურცხას რინაქ ვადგაგურუ.