გაზარხული რე კურცხუ ირფელი
გაზარხული რე, კურცხუ ირფელი,
თოლენსუ ონჯანს ჯასუ კვირტეფი,
ჩე კაბა მაძუ ბულეფიშ ჯას დო
ატამენს ასკვანს ჭითა–ჭითეფი.
დიდი ზოთონჯიშ ჭვალი გულირი
გითიცქვირინანს ჭიჭე ჸომური,
ჩე–ჩე პირეფით გოფარფაშელი,
შურით მორძღანა სხული, უშქური.
ონჯუაშ ნანი ირქენსუ ნელას,
ცას წიმინდანს დო ელჷ მაჭირხოლსუ,
ქარგუნს დო ონწყუნს გოლას დო ტების,
გოლუაფირო ბჟა–ჩხორჲაშ თორსუ.
მარგალ–აფხაზი, შონი, გურული,
ქართ–კახ, იმერ, ფშავ, ხევსურ, რაჭველი,
აი, თე კათა ასკვამანს ირფელს,
თე კათას უჩქუ მუ რე სახელი.
გაზარხული რე იმერ–ამერსუ,
წკირწკოლირი დო ართო კვანწირი,
თელ საქორთუო ჩქიმ ჸოროფა რე,
გენია შოთაშ ლექსო ხანტირი.